ភ្នំពេញ៖ សមត្ថកិច្ចចម្រុះបានចុះឆែកឆេរទីតាំងផលិតស្ករត្នោក្លែងក្លាយដ៏ធំមួយកន្លែង សង័្សយមានលាយនូវសារធាតុគីមីដែលច្បាប់ហាមឃាត់ កាលពីវេលាម៉ោង១០ព្រឹក ថ្ងៃទី១៧ ខែមករា ឆ្នាំ២០១៨ នៅតាមបណ្តោយផ្លូវបេតុង ស្ថិតក្នុងភូមិដើមម៉ាក់ក្លឿង សង្កាត់ច្បារអំពៅទី១ ខណ្ឌច្បារអំពៅ។
មន្ត្រីនគរបាលខណ្ឌច្បារអំពៅ បានឲ្យដឹងថា នៅក្នុងប្រតិបត្តិការចុះឆែកឆេរទីតាំងផលិតស្ករត្នោតខាងលើនេះ មានការចូលរួមពីកម្លាំងសមត្ថកិច្ច នៃនាយកដ្ឋានប្រឆាំងបទល្មើសសេដ្ឋកិច្ច ក្រសួងមហាផ្ទៃ មន្ត្រីកាំកុងត្រូល មន្ត្រីក្រសួងឧស្សាហកម្ម និងសមត្ថកិច្ចពាក់ព័ន្ធ ក្រោមការសម្របសម្រួលពីលោក ហ៊ឹង ប៊ុនថន ព្រះរាជអាជ្ញាររងអមសាលាដំបូងរាជធានីភ្នំពេញ។ ជាលទ្ធផល នៃប្រតិបត្តិការនេះ សមត្ថកិច្ចចម្រុះបានឃាត់ខ្លួនម្ចាស់ទីតាំង ឈ្មោះ ឆែរ គីម ភេទស្រី អាយុ៥៨ឆ្នាំ ស្នាក់នៅក្នុងទីតាំងផលិតស្ករត្នោតខាងលើ រួចបញ្ជូនទៅកាន់ នាយកដ្ឋានប្រឆាំងបទល្មើសសេដ្ឋកិច្ច នៃក្រសួងមហាផ្ទៃ ដើម្បីសាកសួរ ក្រោយរកឃើញភាពមិនប្រក្រតីមួយចំនួន នៅក្នុងស្ករត្នោត។
លោក គង់ វុទ្ធី អនុប្រធានផែស្ងួតចុងទី នៃអគ្គនាយកដ្ឋានកាំកុងត្រូល បានបញ្ជាក់ថា ក្នុងការចុះទៅពិនិត្យជាក់ស្តែងនោះ កម្លាំងជំនាញបានរកឃើញថា ស្ករត្នោតទាំងនេះ គឺពុំមែនសារធាតុស្ករត្នោតសុទ្ធ១០០ភាគរយឡើយ គឺម្ចាស់ទីតាំងបានផលិតស្ករត្នោត បានប្រើស្ករសជាច្រើន រួមជាមួយសារធាតុសូហ្វីត ដែលធ្វើឲ្យបាត់បង់នូវគុណភាព និងបរិមាណសារធាតុដើមរបស់ស្ករត្នោត។
លោកអនុប្រធានផែស្ងួតចុងទី នៃអគ្គនាយកដ្ឋានកាំកុងត្រូល បានបន្ថែមថា ចំពោះស្ករត្នោតដែលមាននៅក្នុងទីតាំងខាងលើ ប្រមាណជិត៣០តោននេះ គឺលោកមិនអាចពិនិត្យមើលនៅនឹងកន្លែង ថាតើវាមានផ្ទុកនូវសារធាតុគីមី ឬយ៉ាងណានោះទេ? ដូច្នេះហើយទើបលោកសម្រេចដកហូតយកស្ករត្នោតមួយចំនួន យកទៅពិនិត្យមើល នៅក្នុងមន្ទីរពិសោធន៍ ឬហៅថា ឡាប៉ូ ទើបអាចដឹងថា ស្ករត្នោតទាំងនោះមានលាយឡមជាមួយនឹងសារធាតុគីមីដែលច្បាប់ហាមខាត់ឬយ៉ាងណា?
ក្រោយពេលចុះឆែកឆេររួច ទីតាំងផលិតស្ករត្នោតខាងលើ ត្រូវសមត្ថកិច្ចចម្រុះសម្រេច ផ្អាកដំណើរការអាជីវកម្មជាបណ្តោះអាសន្នសិន និងមិនអនុញ្ញាតឲ្យមានការប្រមែប្រមូលសម្ភារ និងស្ករត្នោត យកចេញពីទីតាំងផលិតជាដាច់ខាត គឺត្រូវរង់ចាំលទ្ធផល ចេញពីមន្ទីរពិសោធន៍សិន ទើបសម្រេចដោះស្រាយទៅតាមការជាក់ស្តែង៕