ភ្នំពេញ៖ ស្រីស្អាតវ័យក្មេង២នាក់បានជួញដូរគ្រឿងញៀន ក៏អស់លក្ខណ៍ត្រូវបានកម្លាំងនគរបាលខណ្ឌដង្កោ ចុះទៅឃាត់ខ្លួន និងឆែកឆេរឃើញ កាលពីវេលាម៉ោង៤ និង៣០ទៀបភ្លឺ ថ្ងៃទី១៧ ខែមករា ឆ្នាំ២០១៨ នៅតាមផ្លូវលំមួយខ្សែ ស្ថិតក្នុងភូមិដំណាក់សង្កែ សង្កាត់ព្រែកកំពិស ខណ្ឌដង្កោ។
មន្ត្រីនគរបាលខណ្ឌដង្កោ បានឱ្យដឹងថា ជនសង្ស័យដែលសមត្ថកិច្ចឃាត់ខ្លួន ទី១-ឈ្មោះ មុំ សុខចន្ថា អាយុ២៨ឆ្នាំ និងទី២-ឈ្មោះ សៅ បុប្ផា អាយុ១៨ឆ្នាំ ស្នាក់នៅជាមួយគ្នា ក្នុងភូមិកើតហេតុខាងលើ។
មន្ត្រីនគរបាលដដែល បានបន្តថា មុនពេលឃាត់ខ្លួន កម្លាំងប៉ុស្ដិ៍នគរបាលរដ្ឋបាលព្រែកកំពិស និងកម្លាំងនគរបាលខណ្ឌដង្កោ បានសហការគ្នា ចេញល្បាត នៅក្នុងដែនដីរបស់ខ្លួនគ្រប់គ្រង ដើម្បីរក្សានូវសន្ដិសុខជូនប្រជាពលរដ្ឋ និងទប់ស្កាត់នូវបទល្មើសនានា។ លុះពេលសមត្ថកិច្ចល្បាតទៅដល់កន្លែងកើតហេតុខាងលើ ក៏ជួបនឹងស្រីស្អាតទាំង២នាក់ដែលមើលទៅគួរឲ្យសង្ស័យ ទើបសមត្ថកិច្ចសុំឆែកឆេរ ក៏រកឃើញថ្នាំញៀន។
ក្រោយពេលឃាត់ខ្លួន សមត្ថកិច្ចបាននាំជនសង្ស័យមកកាន់ប៉ុស្ដិ៍នគរបាលរដ្ឋបាលសង្កាត់ព្រែកកំពិស ដើម្បីសាកសួរ និងកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌ ចាត់ការបន្តតាមនីតិវិធី៕