ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងនៅក្នុងពិធីសម្ពោធដាក់ឲ្យប្រើប្រាស់អគារព្យាបាលជំងឺមហារីក និងសម្ភពថ្មី នៅក្នុងបរិវេណ នៃមន្ទីរពេទ្យកាល់ម៉ែត កាលពីព្រឹក ថ្ងៃទី១៥ ខែមករា ឆ្នាំ២០១៨នេះថា សម្ដេចនឹងឈប់ឈរឈ្មោះធ្វើជានាយករដ្ឋមន្ត្រី នៅឆ្នាំ២០២៨ខាងមុខនេះ។
សម្ដេចនាយករដ្ឋមន្ត្រី បានបន្តថា សម្ដេចនឹងនៅបន្តកាន់តំណែងនាយករដ្ឋមន្ត្រី មិនតិចជាង១០ឆ្នាំទៀតទេ ដោយសម្ដេចបានលើកឡើងថា នៅពេលនេះសម្ដេចទើបតែមានអាយុជាង៦០ឆ្នាំ ហើយសុខភាពរបស់សម្ដេចនៅរឹងមាំនៅឡើយ។ ប៉ុន្តែនេះមិនមានន័យថា ប្រធានគណបក្សប្រជាជនកម្ពុជារូបនេះ នឹងកាន់តំណែងនាយករដ្ឋមន្ត្រី រហូតដល់ចាស់ជរាទ្រោមខ្លួននោះដែរ។
ប្រមុខរដ្ឋាភិបាល បានប្រកាសទៀតថា សម្ដេចនឹងដកខ្លួនពីបេក្ខជននាយករដ្ឋមន្ត្រី នៅឆ្នាំ២០២៨ ខាងមុខ ដើម្បីទុកឱកាសឲ្យយុវជនជំនាន់ក្រោយ ក្លាយជានាយករដ្ឋមន្ត្រីវិញម្ដង។ សម្រាប់រយៈពេលពីរអាណត្តិខាងមុខ សម្ដេចនាយករដ្ឋមន្ត្រី ហ៊ុន សែន ចង់ឃើញប្រជាពលរដ្ឋអាចទទួលបានជីវភាពធូរធារ តាមរយៈគោលដៅរបស់រដ្ឋាភិបាលដែលបានកំណត់ឲ្យពលរដ្ឋទទួលបានប្រាក់ចំណូលមធ្យមកម្រិតខ្ពស់ នៅឆ្នាំ២០៣០។
សម្ដេចនាយករដ្ឋមន្រ្ដី បានមានប្រសាសន៍បន្តថា៖ «ពិតមែនហើយឯកឧត្តម ម៉ម ប៊ុនហេង បានជូនពរថា សូមឲ្យខ្ញុំជោគជ័យ ដឹកនាំនៅអាណត្តិទី៦ អាណត្តិទី៧ និងអាណត្តិបន្តបន្ទាប់ទៀត ។ រីឯការកាន់តំណែងជាបន្តបន្ទាប់នោះពិបាកណាស់ ត្រឹមអាណត្តិទី៦ អាណត្តិទី៧ បានហើយ ព្រោះនេះជាការប្ដេជ្ញាចិត្ត ដែលខ្ញុំបានប្រកាសរួចហើយថា នឹងបន្តកាន់តំណែងមិនតិចជាង១០ឆ្នាំនោះទេ។ រដ្ឋធម្មនុញ្ញរបស់កម្ពុជា មិនបានកំណត់អាណត្តិនាយករដ្ឋមន្ត្រីទេ។ ប្រទេសនៅលើពិភពលោកនេះ គ្មានប្រទេសណាមួយកំណត់អាណត្តិនាយករដ្ឋមន្ត្រីទេ…។ ខ្ញុំចង់អមដំណើរជាមួយអ្នកទាំងអស់គ្នា ដើម្បីចូលទៅឲ្យកៀកជាមួយប្រទេសដែលមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ ព្រោះបើយោងតាមការគិតពីអាណត្តិ នៃរដ្ឋសភា គឺនៅឆ្នាំ២០២៨ ទើបខ្ញុំត្រូវដកខ្លួនចេញ»។
សម្តេចតេជោ ហ៊ុន សែន បានមានប្រសាសន៍បញ្ជាក់ថា ក្នុងនាមជានាយករដ្ឋមន្ត្រី រយៈពេល៣៣ឆ្នាំនេះ សម្តេចតេជោបានឆ្លងកាត់ការតស៊ូ ក្នុងកិច្ចការនយោបាយជាច្រើន ដោយបានយកអាយុជីវិត មកធ្វើជាដើមទុន រហូតដល់ប្រទេសជាតិមានការអភិវឌ្ឍ និងរីកចម្រើនរហូតមកដល់សព្វថ្ងៃនេះ។
សម្តេចតេជោ ហ៊ុន សែន បានបញ្ជាក់សាជាថ្មីថា បច្ចុប្បន្ន រាជរដ្ឋាភិបាលបាន និងកំពុងដាក់ចេញនូវគោលនយោបាយជាតិគាំពារសង្គមដែលគោលនយោបាយនេះ បានចាប់ផ្តើមអនុវត្តមុនគេ ចំពោះស្ត្រីមានផ្ទៃពោះឆ្លងទន្លេ។ បើគិតមកដល់ថ្ងៃម្សិលមិញនេះ (១៤ មករា ឆ្នាំ២០១៨) មានស្ត្រីជាកម្មការិនីឆ្លងទន្លេ ចំនួន១៦៦៥ នាក់ ដែលត្រូវទទួលបានសាច់ប្រាក់ និងការថែទាំងសុខភាពទាំងម្តាយ និងកូន ពីមូលនិធិសមធម៌ដែលយើងនឹងត្រៀមផ្តល់ជូនជាបន្តបន្ទាប់។
សូមបញ្ជាក់ថា អគារព្យាបាលជំងឺមហារីក និងសម្ភពដ៏ថ្មីសន្លាងដែលសម្ពោធពីព្រឹកមិញ នៅក្នុងបរិវេណ នៃមន្ទីរពេទ្យកាលម៉ែតនេះ ត្រូវគេដាក់ឈ្មោះ «អគារតេជោសន្តិភាព» ហើយវាមានលក្ខណៈពិសេសដែលរៀបចំ និងរចនាដោយស្ថាបត្យករជាតិ និងអ្នកជំនាញការអន្តរជាតិ ដោយបែងចែក ចេញជាពីរផ្នែកដាច់ដោយឡែកពីគ្នា ដោយរក្សាបាននូវសុវត្ថិភាពខ្ពស់ រវាងមជ្ឈមណ្ឌលជាតិជំងឺមហារីក និងសម្ភព។ អគារនេះ ត្រូវបានសាងសង់ឡើងអំពីបេតុងអាមេ មានទទឹងប្រវែង ៤០,៥០ម៉ែត្រ និងបណ្តោយប្រវែង ៤៨,៦០ម៉ែត្រ ហើយមានកម្ពស់៩ជាន់ ដោយមានតម្លៃជាង២៣លានដុល្លារសហរដ្ឋអាមេរិក៕
