ខេត្តបន្ទាយមានជ័យ៖ នៅក្នុងតំបន់អភិរក្សអាងត្រពាំង ស្ថិតក្នុងស្រុកភ្នំស្រុក នាពេលនេះ មានសត្វដ៏កម្រចំនួន១៩ប្រភេទ ក្នុងនោះក្រៀលក្បាលក្រហមបានកើនឡើង រហូដល់៤១៥ក្បាល។
លោក សុខ រិទ្ធី មន្ត្រីសាលាស្រុកភ្នំស្រុក និងជាប្រធានអភិរក្សសត្វក្រៀលក្បាលក្រហមអាងត្រពាំងថ្ម បានឲ្យដឹងថា អាងត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ នេះ គឺជាកន្លែងអភិរក្សសត្វដ៏កម្រ នៅក្នុងពិភពលោក មានចំនួន១៩ប្រភេទ ក្នុងនោះមានសត្វល្មូន មានសត្វរម៉ាំង សត្វស្លាបសត្វក្រៀលក្បាលក្រហម ដែលជាសត្វស្ទើរដាច់ពូជ និងកម្រក្នុងលោក។ ប៉ុន្តែនៅពេលនេះ សត្វទាំងអស់នេះកំពុងស្ថិតក្រោមការយកចិត្តទុកដាក់ការពារអភិរក្ស ពីរដ្ឋាភិបាល និងមន្រ្ដីជំនាញ។
លោកប្រធានអភិរក្សសត្វក្រៀលក្បាលក្រហមអាងត្រពាំងថ្ម បានបញ្ជាក់ថា តំបន់អភិរក្សអាងត្រពាំងថ្មនេះ ដំបូងរកឃើញសត្វក្រៀលក្បាលក្រហម មានចំនួនតែប្រហែល៦០ក្បាលប៉ុណ្ណោះ ហើយចាប់ផ្ដើមពីឆ្នាំ២០០០នោះមក ត្រូវបានអភិរក្សឡើង ដោយអង្គការICS រហូតមកដល់ឆ្នាំ២០០៥ ក៏បានអភិរក្សដោយអង្គការWCS(សមាគមន៍ការពារសត្វព្រៃប្រចាំកម្ពុជា)។
លោក សុខ រិទ្ធី បានបន្តថា បន្ទាប់មក គ្រប់គ្រងដោយក្រសួងកសិកម្មរុក្ខាប្រមាញ់ និងនេសាទ ហើយបន្តបន្ទាប់មកទៀត រាជរដ្ឋាភិបាលបានអនុញ្ញាតឲ្យក្រសួងបរិស្ថានគ្រប់គ្រងអភិរក្ស ដោយមានមន្ត្រីបរិស្ថាន និងមន្ត្រីជំនាញសាលាស្រុកភ្នំស្រុក និងកងកម្លាំងពាក់ព័ន្ធជាអ្នកអភិរក្ស។ នៅដើមឆ្នាំ២០១៨នេះ សត្វក្រៀលក្បាលក្រហមសត្វនេះបានកើនឡើង រហូតដល់ចំនួន៤១៥ក្បាល។
លោកប្រធានអភិរក្សសត្វក្រៀលក្បាលក្រហមអាងត្រពាំងថ្ម បានបន្តថា សត្វក្រៀលក្បាលក្រហមនេះ គឺនៅអំឡុងខែកក្កដា បានហើរចេញពីតំបន់អភិរក្សអាងត្រពាំងថ្មទៅរកពងកូន នៅក្នុងទឹកដីខេត្តព្រះវិហារ ហើយនៅអំឡុងខែមករា សត្វក្រៀលក្បាលក្រហម បានហើរត្រឡប់មកអាងត្រពាំងថ្ម ស្រុកភ្នំស្រុក ខេត្តបន្ទាយមានជ័យវិញដើម្បី រស់នៅតំបន់អភិរក្សអាងត្រពាំងថ្ម ក្រោយពេលវាពងកូនហើយ៕
ជាមួយគ្នានេះ លោក សុខ រិទ្ធី ក៏សូមអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមថែរក្សា ការពារ និងអភិរក្សសត្វក្រៀលក្បាលក្រហមដែលជាសត្វកម្រ នៅលើពិភពលោករបស់យើងឲ្យបានគង់វង្ស និងមិនត្រូវបាញ់សម្លាប់វាឡើយ ដើម្បីថែរក្សាសត្វដ៏កម្រទុកឲ្យកូនចៅជំនាន់ក្រោយរបស់ខ្មែរយើង បានឃើញ និងអភិរក្សសម្រាប់ទាក់ទាញភ្ញៀវទេសចរជាតិ និងអន្តរជាតិបានមកមើលសត្វទាំងនេះផង៕
