ប៉ូលិសស្រុកធុងយៃ ខេត្តនគរស៊ីធមរាជ បានរាយការណ៍មកថា មានក្មេងស្រីម្នាក់ ត្រូវបានគេធ្វើបាប ហើយបានរត់មកសុំឲ្យ ប្រជាជនជួយនៅក្នុងផ្ទះរបស់ប្រជាជនម្នាក់ ក្បែរចំការកៅស៊ូ។ ពេលប៉ូលិសទៅដល់កន្លែងកើតហេតុ បានប្រទះឃើញក្មេងស្រី អាយុ៩ឆ្នាំ ជាកូនសិស្សថ្នាក់ទី៣ បានឈរស្រែកយំ ជាមួយនិងភាពភ័យខ្លាច នៅក្នុងខ្លួនរបស់នាង ហើយបានប្រជាជន ដែលនៅក្បែរនោះ ចេញមកជួយនិយាយ ដើម្បីលួងលោមនាង កុំឲ្យមានការភ័យខ្លាចតទៅទៀត និងរង់ចាំក្រុមប៉ូលិស និងក្រុមជួយសង្គ្រោះមកដល់ ។
បើតាមការសាកសួរនាំ ក្មេងស្រីរងគ្រោះបានរៀបរាប់ថា នៅម៉ោងប្រហែល៧យប់ នាងបានអង្គុយក្នុងខ្ទម នៅក្នុងចំការកៅស៊ូ ដែលមានចំងាយឆ្ងាយពីកន្លែង កើតហេតុប្រហែល១គីឡូម៉ែត្រ ដោយនៅជាមួយជីតាម្នាក់ ដែលកំពុងតែឈឺ ។ ខណៈដែលនាង កំពុងអង្គុយភ្លេចខ្លួន ស្រាប់តែមានជនល្មើស២នាក់ ដែលពាក់អាវដៃវែង និងបិទមុខ ហើយជិះម៉ូតូមិនដឹងពណ៌អ្វីនោះទេ ព្រោះងងឹតខ្លាំងពេក ហើយពួកគេបានចូលមកឈប់ នៅខាងមុខខ្ទមរបស់នាងតែម្តង ។
នាងបានបន្តថា ក្រោយមកជនល្មើសទាំង២នាក់ បានដើរចូលមកក្នុងខ្ទមរបស់នាង ហើយបានទាញយកកាំបិត មកភ្ជង់ខ្លួននាង ហើយបានរើឥវ៉ាន់នៅក្នុងកាបូបរបស់នាង មិនតែប៉ុណ្ណោះ នាងបានសួរទៅកាន់ជនល្មើស ទាំង២នាក់នោះថា តើពួកអ្នកឯងចូលមកធ្វើអ្វី? ហើយជនល្មើសបានឆ្លើយតប ទាំងលក្ខណៈបែបស្រវឹងថា “មករកនាង” ។
បន្ទាប់មកជនល្មើស បានចាប់រូបនាង ចងដៃបន្ថែមទៀត ទោះជានាងខំប្រឹងរើបំរះយ៉ាងណា ក៏រើពុំរួចឡើយ ព្រោះជនល្មើសបានយកដៃ មកបិទមាត់របស់នាង ជិតទៅហើយ សូម្បីតែលោកតា ដែលកំពុងតែដេកលក់ នៅក្បែរនោះក៏គាត់ ពុំបានឮនាងស្រែកឲ្យជួយដែរ ។ ជនល្មើសទាំង២នាក់ បានលើករូបនាង ទៅដាក់លើម៉ូតូ ដោយឲ្យនាងអង្គុយនៅកណ្តាល ។
ពេលដែលពួកគេដឹកនាងចេញទៅ នាងក៏បានរើបំរះម្តងទៀត ដោយធាក់និងរុញច្រាន បុរសដែលជិះនៅពីក្រោយនាង ឲ្យធ្លាក់ពីលើម៉ូតូ ហើយនាងបានលោតចុះ ទាំងដួលពីរបីត្រឡប់ផង ទើបនាងបានស្រាយខ្សែរចេញ ហើយរត់បានចំងាយប្រហែល៥០០ម៉ែត្រ ក៏បានទៅដល់ផ្ទះប្រជាពលរដ្ឋ ដែលនៅក្បែរនោះ ដើម្បីឲ្យពួកគាត់ជួយ ហើយជនល្មើសមើលឃើញ សភាពការណ៍មិនស្រួល ក៏បានបើកម៉ូតូរត់គេចខ្លួន បាត់ស្រមោលតែម្តង ។
ក្រោយពីប៉ូលិសបានសួរនាំ ក្មេងស្រីរងគ្រោះរួចហើយ ក៏បានបញ្ជូននាងទៅមន្ទីរពេទ្យ ដើម្បីពិនិត្យជាបឋម ព្រមទាំងតាមដានចាប់ជនល្មើស ទាំង២នាក់នោះ មកដាក់ទោសតាមច្បាប់បន្ត ៕
