ភ្នំពេញ៖ នៅក្នុងអំឡុងពេល លោកចៅក្រមស៊ើបសួរ នៃសាលាដំបូងរាជធានីបានចុះសាកសួរនៅក្នុងពន្ធនាគារត្រពាំងថ្លុង ជាលើកទីពីរ ពីករណីឃុបឃិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា ក្រោមបទចោទប្រកាន់ថា ជាអំពើក្បត់ជាតិនោះ លោក កឹម សុខា បានឆ្លើយថា លោកមានទំនាក់ទំនងជាមួយនឹងបរទេស គឺដើម្បីលទ្ធិប្រជាធិបតេយ្យ និងប្រយោជន៍ជាតិ មិនមែនដើម្បីផ្ដួលរំលំរដ្ឋាភិបាលនោះឡើយ។
បើតាមសម្ដីរបស់មេធាវីការពារក្ដីឲ្យលោក កឹម សុខា ប្រធានអតីតគណបក្សសង្គ្រោះជាតិ បានឲ្យដឹងថា ការផ្សារភ្ជាប់ទំនាក់ទំនងកូនក្ដីរបស់លោកជាមួយនឹងបរទេស នាពេលកន្លងមក គឺដើម្បីពង្រឹងនូវលទ្ធិប្រជាធិបតេយ្យ នៅក្នុងប្រទេសកម្ពុជា និងផលប្រយោជន៍ជាតិ មិនមែនដើម្បីផ្តួលរំលំរដ្ឋាភិបាលនោះឡើយ។
លោក ហែម សុជាតិ មេធាវីមួយរូបរបស់លោក កឹម សុខា ដែលបានចូលរួមស្តាប់ការសាកសួររបស់ចៅក្រមស៊ើបសួរ នៃសាលាដំបូងរាជធានីភ្នំពេញ បានឲ្យដឹងថា លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំ នៅក្នុងពន្ធនាគារត្រពាំងផ្លុង អស់រយៈពេលជាងពីរខែមកហើយនេះ បានឆ្លើយនៅចំពោះមុខចៅក្រមស៊ើបសួរ ដោយលោកបានច្រានចោលនូវការចោទប្រកាន់ថា លោកមានទំនាក់ទំនងជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។ ផ្ទុយទៅវិញ អតីតប្រធានគណបក្សប្រឆាំងរូបនេះ ប្រាប់ទៅចៅក្រមស៊ើបសួរថា ទំនាក់ទំនងរបស់លោកជាមួយបរទេស នាពេលកន្លងមក គឺស្ថិតក្នុងក្របខ័ណ្ឌការងារ ដើម្បីលើកស្ទួយសិទ្ធិមនុស្ស និងលទ្ធិប្រជាធិបតេយ្យ ដែលស្របនឹងច្បាប់ជាតិនិងច្បាប់អន្តជាតិ។
លោកមេធាវី ហែម សុជាតិ បានសង្ខេបប្រសាសន៍របស់លោក កឹម សុខា ដែលឆ្លើយទៅកាន់ចៅក្រមស៊ើបសួរ ថា«លោក កឹម សុខា ថាគាត់ ជាកូនខ្មែរ។ គាត់គិតតែពីអ្វីដែលផ្តល់នូវផលប្រយោជន៍ឲ្យខ្មែរ។ ការឃុបឃិត ឬការសមគំនិតជាមួយបរទេស មិនដែលកើតមានម្តងណាឡើងសម្រាប់គាត់នោះទេ។ រីឯរូបគាត់(លោក កឹម សុខា) ស្រឡាញ់សិទ្ធិមនុស្ស ប្រជាធិបតេយ្យ និងចង់ជួយកសាងប្រទេសឲ្យរីកចម្រើន។ គាត់មិនដែលបានធ្វើអ្វីមួយ នាំឲ្យប៉ះពាល់ដល់ប្រយោជន៍ជាតិនោះទេ»។
លោក ហែម សុជាតិ បន្តថា បញ្ហាសំខាន់ដែលចៅក្រមស៊ើបសួរ លើកទៅសួរលោក កឹម សុខា គឺផ្តោតលើទំនាក់ទំនងជាមួយបរទេស ជាពិសេសសហរដ្ឋអាមេរិក និងអង្គការអន្តរជាតិមួយចំនួយទៀត ដូចជា វិទ្យាស្ថានជាតិដើម្បីប្រជាធិបតេយ្យ (NDI) និងវិទ្យាស្ថានសាធារណរដ្ឋអន្តរជាតិ (IRI) ជាដើម។
លោកមេធាវី បានបន្តថា៖«ការសាកសួរកន្លងមក គឺអត់មានភ័ស្តុតាង ដែលបញ្ជាក់ថា គាត់(លោក កឹម សុខា) បានប្រព្រឹត្តដូចការចោទប្រកាន់នោះទេ ព្រោះចម្លើយរបស់គាត់ គឺបញ្ជាក់ថា អ្វីដែលគាត់ធ្វើ គឺសុទ្ធតែជាសកម្មភាពលើកស្ទួយសិទ្ធិមនុស្ស និងប្រជាធិបតេយ្យទាំងអស់។ ដូចអត់មានអ្វីខុសពីហ្នឹងផង»។ នេះជាលើកទីពីរហើយ ដែលលោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ អមដោយក្រឡាបញ្ជីពីររូបបានធ្វើដំណើរទៅជួបលោក កឹម សុខា នៅក្នុងពន្ធនាគារត្រពាំងផ្លុង ខេត្តត្បូងឃ្មុំ កាលថ្ងៃទី១៤ ខែធ្នូ ឆ្នាំ២0១៧ ដើម្បីសួរពីការឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។
លោក សំ សុគង់ មេធាវីមួយរូបទៀតរបស់លោក កឹម សុខា បានប្រាប់ថា ចៅក្រមស៊ើបសួរ បានលើកឡើងនូវសំណួរជាង៥០។ ប៉ុន្តែ លោកមេធាវីរូបនេះ អះអាងថា សំណួរភាគច្រើន ក្នុងចំណោមសំណួរជាង៥០នោះ ត្រូវបានលោក កឹម សុខា មិនឆ្លើយតប ហើយនៅស្ងៀម ដែលជាសិទ្ធិរបស់ជនត្រូវចោទ។
លោក សំ សុគង់ បន្តថា ចៅក្រមស៊ើបសួរ នឹងសួរលោក កឹម សុខា ពីរដងទៀត គឺនៅថ្ងៃទី២១ និងថ្ងៃទី២២ ខែធ្នូ ឆ្នាំ២០១៧។ លោក បន្ថែមថា ក្រុមមេធាវី នឹងដាក់សំណើទៅកាន់ចៅក្រមស៊ើបសួរ ក្នុងថ្ងៃនេះ ឬថ្ងៃស្អែក ដើម្បីសុំឲ្យនាំលោក កឹម សុខា ទៅសួរក្នុងបរិវេណតុលាការវិញ។
លោកមេធាវី សំ សុគង់ បញ្ជាក់ពីហេតុផលថា៖ «ទីមួយ-ការស្នើបែបនេះ គឺជាឆន្ទៈរបស់គាត់ផ្ទាល់ (លោក កឹម សុខា)។ ទីពីរ-នីតិវិធី តម្រូវឲ្យសួរគាត់ ក្នុងបន្ទប់ចៅក្រមស៊ើបសួរ មិនមែនក្នុងពន្ធនាគារទេ និងទីបី-ការសួរក្នុងពន្ធនាគារ គឺហាក់ដូចជាកាត់បន្ថយសិទ្ធិរបស់មេធាវី ក្នុងការការពារក្តី»។
គួររំឭកថា កាលពីវេលារំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ មន្ត្រីតុលាការភ្នំពេញបានដឹកនាំកម្លាំងសមត្ថកិច្ច ចុះទៅចាប់ខ្លួនលោក កឹម សុខា ដល់គេហដ្ឋាន បន្ទាប់ពីប្រមុខរដ្ឋាភិបាលបានបង្ហាញវីដេអូឃ្លីបមួយ ដែលលោក កឹម សុខា បាននិយាយ នៅក្នុងអំឡុងឆ្នាំ២០១៣ នៅឯប្រទេសអូស្រ្ដាលី។ យោងតាមភ័ស្ដុតាងនេះ ទើបតុលាការបានយកវាមកធ្វើជាអង្គហេតុ ក្នុងការចាប់ខ្លួន និងដាក់លោក កឹម សុខា ឲ្យស្ថិតនៅក្រោមការសង្ស័យថា បានឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។
ក្នុងវីដេអូឃ្លីបនោះ លោក កឹម សុខា បាននិយាយទៅកាន់អ្នកគាំទ្រថា ខ្លួនមានអ្នកជំនាញជាជនបរទេសនៅពីក្រោយ ដើម្បីជួយជ្រោមជ្រែង ក្នុងការផ្លាស់ប្តូរមេដឹកនាំនៅកម្ពុជា។ ក្តីសង្ស័យលើលោក កឹម សុខា ជុំវិញអំពើក្បត់ជាតិ ត្រូវបានក្រសួងមហាផ្ទៃ យកទៅផ្សារភ្ជាប់ជាមួយគណបក្សសង្គ្រោះជាតិទាំងមូល។ ក្រសួងមហាផ្ទៃ បានយល់ថា គណបក្សសង្គ្រោះជាតិ ក៏អាចជាប់ទាក់ទងនឹងអំពើក្បត់ជាតិ ដូចលោក កឹម សុខា ដែរ ទើបដាក់បណ្តឹងទៅកាន់តុលាការកំពូល ដើម្បីសុំឲ្យរំលាយគណបក្សនេះចោល។ លុះមកដល់ថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលក៏បានយកសំណុំរឿងហ្នឹងមកបើកសវនាការ ពេញមួយថ្ងៃ ហើយក៏សម្រេចចេញសាលដីការំលាយគណបក្សសង្គ្រោះជាតិ និងដាក់បម្រាមដល់មន្ត្រីជាន់ខ្ពស់របស់គណបក្សនេះចំនួន១១៨នាក់ ត្រូវផ្អាកសកម្មភាពនយោបាយ រយៈពេល៥ឆ្នាំ៕