ភ្នំពេញ៖ បន្ទាប់ពីប្រមុខរាជរដ្ឋាភិបាល បានប្រកាសប្រាប់ដល់ មន្ត្រីអតីតគណបក្សសង្គ្រោះជាតិ ឲ្យបង្កើតគណបក្សថ្មី ដើម្បីចូលរួមក្នុងការបោះឆ្នោត នាឆ្នាំ២០១៨នោះមក មន្ត្រីជាន់ខ្ពស់របស់គណបក្សនេះ ក៏បានប្រកាសថា ខ្លួននឹងមិនដើរតាមផ្លូវ ដែលរដ្ឋាភិបាលគូសវាស ឲ្យខ្លួនតាមនោះឡើយ ពីព្រោះនៅពេលនេះ រដ្ឋាភិបាលកំពុងរងនូវ សម្ពាធយ៉ាងធ្ងន់ពីអន្តរជាតិ ទើបបង្កើតយុទ្ធសាស្ត្របង្វែរស្ថានការណ៍បែបនេះ។
បើតាមអ្នកវិភាគ ស្ថានការណ៍នយោបាយ នៅក្នុងប្រទេសកម្ពុជា មួយចំនួន នៅតែរំពឹងទុកថា គណបក្សសង្គ្រោះជាតិ នឹងមិនមានវត្តមាន នៅក្នុងការបោះឆ្នោត នាឆ្នាំ២០១៨ ខាងមុខនេះ ព្រោះតែឱកាសរស់ឡើងវិញ របស់អតីតគណបក្សសង្គ្រោះជាតិ ហាក់គ្មានផ្លូវបើកឲ្យដំណើរការ ឡើងវិញនោះឡើយ។ ស្របគ្នានេះ សម្ដេចនាយករដ្ឋមន្ត្រី ហ៊ុន សែន ក៏បានព្រលយពាក្យសំដីថា គ្មានឡើយវត្តមាន អតីតគណបក្សសង្គ្រោះជាតិ ដែលអាចកើតសារជាថ្មី។
បើតាមបណ្ដាញសង្គមហ្វេសប៊ុក របស់សម្ដេច ហ៊ុន សែន បានសរសេរថា៖ «ដោយសារមានការខ្សឹបខ្សៀវ និងការប្រឌិត ព័ត៌មានមិនពិតដដែលជាដដែល អំពីការរស់ឡើងវិញ នៃអតីតបក្ស សង្គ្រោះជាតិ គឺខ្ញុំសូមផ្តាំផ្ញើ និងបញ្ជាក់សាជាថ្មីថា អតីតបក្សដែលត្រូវបានរំលាយហើយ (សង្គ្រោះជាតិ) ដោយសាលដីការបស់តុលាកំពូល គឺបានចូលជាស្ថាពរហើយ។ ឈ្មោះអតីតបក្សនេះ គឺនឹងគ្មានកើតឡើងសារជាថ្មីទៀតឡើយ»។ ប៉ុន្តែអតីតគណបក្សសង្គ្រោះជាតិ ក៏គ្មានច្រកចូលធ្វើនយោបាយទាំងស្រុងដែរ។
សម្ដេច បានបន្តថា ផ្លូវដែលអតីតគណបក្សសង្គ្រោះជាតិ អាចចូលរួមប្រកួតប្រជែង ក្នុងការបោះឆ្នោត នាពេលឆ្នាំ២០១៨ខាងមុខបាន គឺមានតែការបង្កើតគណបក្សថ្មីតែប៉ុណ្ណោះ។ «ខ្ញុំសូមឲ្យយោបល់ខ្លះៗដែលអាចមានប្រយោជន៍ ហើយកុំឲ្យខាតពេលច្រើន គឺមានតែវិធីមួយគត់ គឺបង្កើតបក្សថ្មីចូលរួមប្រកួតប្រជែង តាមលក្ខណៈប្រជាធិបតេយ្យ នៅក្នុងការបោះឆ្នោតខាងមុខ គឺវាប្រសើរជាងដើរនិយាយឃោសនាមិនពិត ហើយខាតបង់ពេលវេលាកាន់តែច្រើន»។
ដោយឡែកលោក អេង ឆៃអ៊ាង មន្រ្ដីជាន់ខ្ពស់របស់អតីតគណបក្សសង្រ្គោះជាតិ ក៏បានចាត់ទុកការឲ្យយោបល់របស់សម្ដេច ហ៊ុន សែន នាយកដ្ឋមន្រ្ដី នៃព្រះរាជាណាចក្រកម្ពុជាថា នេះគ្រាន់តែជាយុទ្ធសាស្ត្រមួយ ដើម្បីបង្វែរស្ថានការណ៍នយោបាយ ឲ្យរួចផុតពីសម្ពាធរបស់សហគមន៍អន្តរជាតិតែប៉ុណ្ណោះ។ លោក អេង ឆៃអ៊ាង បាននិយាយបែបសើចចំអកឲ្យវិញថា អតីតគណបក្សខ្លួនក៏មិនដើរតាមផ្លូវ ដែលប្រមុខរដ្ឋាភិបាល បើកច្រកឲ្យចូលនោះឡើយ។
លោក អេង ឆៃអ៊ាង បានសរសេរនៅលើហ្វេសប៊ុករបស់ខ្លួនថា «នេះជាយុទ្ធសាស្ត្រនយោបាយ ដោះស្រាយសម្ពាធពីអន្តរជាតិរបស់លោក ហ៊ុន សែន ហើយក៏ជាផ្លូវដែលលោក ហ៊ុន សែន ចង់ដើរ និងគូសវាសឲ្យយើងដើរតាមគាត់ បន្ទាប់ពីចាប់ខ្លួនលោកប្រធាន កឹម សុខា និងប្តឹងរំលាយគណបក្សសង្គ្រោះជាតិ។ ប៉ុន្តែផ្លូវនេះ យើងមិនដើរតាមអ្វីដែលលោក ហ៊ុន សែន ចង់បាននោះទេ ពីព្រោះផ្លូវនេះ នាំឲ្យលោក ហ៊ុន សែន ក្លាយជាមេដឹកនាំផ្តាច់ការ ហើយកម្ពុជានឹងក្លាយជាប្រទេសឯកោពីសហគមន៍អន្តរជាតិ ឯប្រជាពលរដ្ឋខ្មែរ រស់នៅក្នុងភាពក្រីក្រ និងភ័យខ្លាចដដែល»។
លោក អេង ឆៃអ៊ាង បានសរសេរបន្តថា ផ្លូវដែលអតីតគណបក្សលោកបានកំណត់គោលដៅនោះ គឺការទាមទារឲ្យមានការលុបចោលសេចក្តីសម្រេចរំលាយគណបក្សសង្គ្រោះជាតិ, ដោះលែងលោក កឹម សុខា និងអ្នកទោសមនសិការទាំងអស់, ទម្លាក់ចោលនូវការចោទប្រកាន់មកលើអ្នកនយោបាយ មន្ត្រីសង្គមស៊ីវិល និងអ្នកសារព័ត៌មាន, អនុញ្ញាតឲ្យអង្គការសង្គមស៊ីវិល និងប្រព័ន្ធផ្សព្វផ្សាយ ធ្វើសកម្មភាពដូចមុន និងរៀបចំការបោះឆ្នោត ដោយសេរី ត្រឹមត្រូវ និងយុត្តិធម៌ នាឆ្នាំ២០១៨ខាងមុខនេះ។
ដោយឡែកអ្នកវិភាគនយោបាយឯករាជ្យដទៃទៀត បានឲ្យដឹងថា ស្ថានការណ៍នយោបាយ នៅក្នុងប្រទេសកម្ពុជា នាពេលខាងមុខ នឹងមានការវិវឌ្ឍទៅរកភាពល្អប្រសើរឡើងវិញ តាមរយៈការធ្វើសម្បទាននយោបាយឲ្យគ្នាទៅវិញទៅមក ក្រោមរូបភាពដោះស្រាយបញ្ហារួមគ្នា រវាងគណបក្សកាន់អំណាច និងគណបក្សប្រឆាំង។ បើភាគីទាំង២នៅតែរឹងត្អឹងដាក់គ្នានោះ គឺមិនមានប្រយោជន៍អ្វីដល់ប្រជាពលរដ្ឋ និងសង្គមជាតិទាំងមូលនោះឡើយ។
គួររំឭកថា គណបក្សសង្គ្រោះជាតិ ត្រូវបានតុលាការកំពូលសម្រេចរំលាយ កាលពីថ្ងៃទី១៦ វិច្ឆិកា ឆ្នាំ២០១៧ និងដាក់បម្រាមដល់មន្ត្រីជាន់ខ្ពស់របស់បក្សនេះចំនួន១១៨នាក់ ក្នុងការធ្វើសកម្មភាពនយោបាយ ក្នុងរយៈពេល៥ឆ្នាំ។ តុលាការកំពូលបានសម្រេចរំលាយគណបក្សសង្គ្រោះជាតិ ដែលជាបក្សប្រឆាំងដ៏ធំបំផុតរបស់ប្រទេសកម្ពុជា គឺធ្វើឡើងតាមពាក្យបណ្ដឹងរបស់ក្រសួងមហាផ្ទៃ បន្ទាប់ពីគណបក្សយុវជនកម្ពុជា ដឹកនាំដោយលោក ពេជ្រ ស្រស់ និងគណបក្សហ៊ុនស៊ិនប៉ិច ដឹកនាំដោយសម្ដេចក្រុមព្រះ នរោត្ដម រណឫទ្ធិ បានប្ដឹងទៅក្រសួងមហាផ្ទៃ ទាមទារឲ្យក្រសួងនេះ ប្ដឹងទៅតុលាការកំពូល ដើម្បីរំលាយគណបក្សសង្រ្គោះជាតិ៕