ភ្នំពេញ៖ បន្ទាប់ពីសហរដ្ឋអាមេរិក និងសហភាពអឺរ៉ុបបានរឹតបន្តឹងទិដ្ឋាការ គំរាមបង្កកទ្រព្យសម្បត្តិមន្ត្រីរដ្ឋាភិបាលកម្ពុជា និងការលុបចោលនូវការអនុគ្រោះពន្ធនោះមក សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហាក់មិនព្រួយបារម្ភចំពោះការអំពាវនាវរបស់ក្រុមសមាជិកសភា នៃសហភាពអឺរ៉ុបនោះឡើយ។
សម្ដេចនាយករដ្ឋមន្រី្ដ បានចាត់ទុកការអំពាវនាវនេះថា គ្មានឥទ្ធិពលអ្វីដល់រដ្ឋាភិបាលសហភាពអឺរ៉ុប ក្នុងការដាក់សម្ពាធមកលើរដ្ឋាភិបាលកម្ពុជានោះទេ។ ត្រង់ចំណុចនេះ ប្រមុខរដ្ឋាភិបាលបានពន្យល់ថា បើទោះជាក្រុមសមាជិកសភា នៃសហភាពអឺរ៉ុបលើកឡើងបែបណាក្តី ប៉ុន្តែការសម្រេចចិត្តអនុវត្តអ្វីមួយមកលើកម្ពុជានោះ គឺអាស្រ័យលើរដ្ឋាភិបាលសហភាពអឺរ៉ុបតែប៉ុណ្ណោះ។
សម្ដេច ហ៊ុន សែន ក៏បានថ្លែងសម្តីបែបផ្លែផ្កា និងលើកទឹកចិត្តឲ្យសហភាពអឺរ៉ុបបង្កកទ្រព្យសម្បត្តិរបស់មន្ត្រីរដ្ឋាភិបាលណា ដែលយកប្រាក់ទៅផ្ញើទុក នៅក្នុងធនាគាអឺរ៉ុបផងដែរ។ ប្រមុខរដ្ឋាភិបាល ក៏មិនខ្វល់ពីរឿងរឹតបន្តឹងទិដ្ឋាការរបស់មន្ត្រីកម្ពុជានោះទេ។ សម្ដេចថ្លែងបែបនេះ នៅក្នុងពិធីប្រគល់ប្រាក់រង្វាន់រាជរដ្ឋាភិបាល ជូនកីឡាករ កីឡាការិនី ដែលបានឈ្នះមេដាយមាសក្នុងការប្រកួត Sea Games លើកទី២៩ និងការប្រកួតជើងឯកគ្រប់កម្រិតជាលក្ខណៈអន្តរជាតិ។
ក្រុមសមាជិកសភា នៃសហភាពអឺរ៉ុបនេះ បានអំពាវនាវដល់សេវាកម្មកិច្ចការក្រៅប្រទេស នៃសហភាពអឺរ៉ុប (European External Action Services) ឲ្យរឹតបន្តឹងនូវទិដ្ឋាការ និងបង្កកទ្រព្យសម្បត្តិមន្ត្រីរបស់រដ្ឋាភិបាលកម្ពុជា ដែលពាក់ព័ន្ធនឹងការរំលាយគណបក្សសង្គ្រោះជាតិ។ ការអំពាវនាវត្រូវបានធ្វើឡើងនៅក្នុងសេចក្តីស្នើមួយ កាលពីថ្ងៃទី១៣ ខែធ្នូ ឆ្នាំ២០១៧កន្លងទៅថ្មីៗនេះ។ ការអំពាវនាវនេះមិនបានធ្វើឲ្យអាជ្ញាធរកម្ពុជាព្រួយបារម្ភនោះទេ។ នេះបើតាមការអះអាងរបស់អ្នកនាំពាក្យនៃគណបក្សកាន់អំណាច។
បន្ទាប់ពីប្រតិភូសហភាពអឺរ៉ុបសម្រេចព្យួរជំនួយរបស់ខ្លួនទៅគណៈកម្មាធិការជាតិរៀបចំការបោះឆ្នោត ពេលនេះដល់វេន ក្រុមសមាជិកសភា នៃសហភាពអឺរ៉ុបវិញម្តង។ ក្រុមសមាជិកសភា នៃសហភាពអឺរ៉ុបនេះបានអំពាវនាវដល់សេវាកម្មកិច្ចការក្រៅប្រទេសនៃសហភាពអឺរ៉ុប (European External Action Services) ឲ្យរឹតបន្តឹងទិដ្ឋាការ និងបង្កកទ្រព្យសម្បត្តិមន្ត្រីរបស់កម្ពុជាដែលពាក់ព័ន្ធនឹងការរំលាយគណបក្សសង្គ្រោះជាតិ។
សេចក្តីស្នើនោះសរសេរយ៉ាងដូច្នេះថា៖ «អំពាវនាវដល់ EEAS និងគណៈកម្មការឲ្យរៀបចំបញ្ជីឈ្មោះនូវរាល់បុគ្គលណាដែលទទួលខុសត្រូវ ក្នុងការរំលាយគណបក្សប្រឆាំង និងសកម្មភាពរំលោភសិទ្ធិមនុស្សយ៉ាងធ្ងន់ នៅកម្ពុជា ដោយពិនិត្យមើលទៅលើការកំហិតផ្តល់ទិដ្ឋាការ និងការបង្កកនូវទ្រព្យរបស់ពួកគេ»។
នៅក្នុងសេចក្តីស្នើដដែលនេះ ក្រុមសមាជិកសភានៃសហភាពអឺរ៉ុប ក៏បានគាំទ្រប្រតិភូសហភាពអឺរ៉ុបដែលបានសម្រេចចិត្តព្យួរជំនួយទៅដល់គណៈកម្មាធិការជាតិរៀបចំការបោះឆ្នោតផងដែរ។ ការបោះឆ្នោតដែលសហភាពអឺរ៉ុបបានជួយ ក្នុងពេលកន្លងមក ដើម្បីធានាអំពីការប្រកួតប្រជែង តាមលទ្ធិប្រជាធិបតេយ្យ ប្រកបដោយសេរីពហុបក្ស។ ដូច្នេះក្រុមសមាជិកសភាអឺរ៉ុបបានស្នើដល់តំណាងជាន់ខ្ពស់ នៃសហភាពអឺរ៉ុប ទទួលបន្ទុកកិច្ចការក្រៅប្រទេស និងគោលនយោបាយសន្តិសុខ លោកស្រី ហ្វេដេរីកា ម៉ូហ្គេរីនី (Federica Mogherini) រួមទាំងតំណាងពិសេសទទួលបន្ទុកសិទ្ធិមនុស្សរបស់សហភាពអឺរ៉ុប ឲ្យស្វែងរកមធ្យោបាយណាក៏ដោយ ដើម្បីការពារសិទ្ធិជាមូលដ្ឋានរបស់ពលរដ្ឋខ្មែរ។
ក្រៅពីលើកយករឿងទិដ្ឋាការ និងការបង្កកទ្រព្យសម្បត្តិឯកជនមក ព្រមានអាជ្ញាធរកម្ពុជា ក្រុមសមាជិកសភា នៃសហភាពអឺរ៉ុប បានស្នើឲ្យលោកស្រី ហ្វេដេរីកា ម៉ូហ្គេរីនី ពិនិត្យជាបន្ទាន់នូវការអនុវត្តរបស់កម្ពុជាក្នុងក្របខ័ណ្ឌ នៃកិច្ចព្រមព្រៀងគោលនយោបាយ Everything But Arms ដែលកម្ពុជាបានចុះហត្ថលេខាជាមួយសហភាពអឺរ៉ុប។ នៅក្នុងលិខិតស្នើដដែលនោះ ក្រុមសមាជិកសភាអឺរ៉ុបបានសរសេរបញ្ជាក់យ៉ាងដូច្នេះ៖ «មាត្រា១៩ នៃវិធានEBA គូសបញ្ជាក់ថា បើសិនជាកម្ពុជារំលោភទៅលើកាតព្វកិច្ចរបស់ខ្លួន ក្នុងក្របខណ្ឌ នៃវិធាន EBA នេះ ការទទួលបានការអនុគ្រោះ ត្រូវលុបចោលជាបណ្តោះអាសន្ន»។
ក្រុមសមាជិកសភាអឺរ៉ុប ក៏បានអំពាវនាវឲ្យអាជ្ញាធរកម្ពុជា ទម្លាក់ចោលដោយឥតលក្ខខណ្ឌនូវការចោទប្រកាន់លើលោក កឹម សុខា និងមេដឹកនាំគណបក្សប្រឆាំងនានាបន្តទៀត។
ជុំវិញការព្រមានដាក់ទណ្ឌកម្មពីសហគមន៍អន្តរជាតិ លោក សុខ ឥសាន អ្នកនាំពាក្យគណបក្សប្រជាជនកម្ពុជា ធ្លាប់លើកឡើងថា អ្វីដែលរដ្ឋាភិបាល បានធ្វើកន្លងមក គឺស្ថិតក្នុងក្របខណ្ឌច្បាប់របស់កម្ពុជា ដើម្បីការពារឯករាជ្យ អធិបតេយ្យ សន្តិភាព និងស្ថិរភាពនយោបាយ។ លោកបានសង្កត់ធ្ងន់ថា រដ្ឋាភិបាលនៅតែប្តេជ្ញាឈរលើមូលដ្ឋានច្បាប់របស់ខ្លួន ដើម្បីធ្វើយ៉ាងណាឲ្យប្រទេសកម្ពុជា ដើរលើមាគ៌ាប្រជាធិបតេយ្យ និងការគោរពសិទ្ធិមនុស្ស ។
អ្នកនាំពាក្យគណបក្សកាន់អំណាចរូបនេះ បានប្រាប់ក្រុមអ្នកកាសែតតាមបណ្តាញទំនាក់ទំនងតេឡេក្រាម (Telegram) យ៉ាងដូច្នេះថា៖«ការចង់បាន និងចង់ឃើញសកម្ពុជា ត្រឡប់ទៅរកសភាពដើម និងចង់ឲ្យបក្សប្រឆាំងរស់មកវិញ គឺមិនអាចទៅរួចទេ។ បើចង់យ៉ាងដូច្នេះ មានន័យថា លទ្ធិប្រជាធិបតេយ្យ និងនីតិរដ្ឋនៅកម្ពុជា នឹងគ្មានន័យឡើយ»។
ប្រសិនបើ ការព្រមានខាងលើ ក្លាយជាការពិតមែននោះ សហភាពអឺរ៉ុប នឹងក្លាយជាភាគីទីពីរ បន្ទាប់ពីសហរដ្ឋអារមេរិក ដែលបានដាក់ទណ្ឌកម្មលើមន្ត្រីកម្ពុជា ដោយរឹតបន្តឹងការផ្តល់ទិដ្ឋាការ៕