ភ្នំពេញ៖ បន្ទាប់ពីប្រកាសសុពលភាពតំណាងរាស្ត្រថ្មីចំនួន១៦រូបបន្ថែម នៅថ្ងៃទី៧ ខែធ្នូ ខាងមុខនេះ រដ្ឋសភានឹងរៀបចំរចនាសម្ព័ន្ធឲ្យបានត្រឹមត្រូវឡើងវិញ ដោយរៀបចំរចនាសម្ព័ន្ធឲ្យសមស្របនឹងកៅអីរដ្ឋសភា ដែលមានតំណាងរាស្ត្រ១២៣រូប ហើយរដ្ឋសភានឹងសម្រេចបែងចែកកៅអីអនុប្រធានទី១ និងគណៈកម្មការជំនាញរបស់អតីតបក្សប្រឆាំងនេះ ទៅឲ្យគណបក្សហ្វ៊ុនស៊ិនប៉ិចទាំងអស់។
លោក ឡេង ប៉េងឡុង អ្នកនាំពាក្យរដ្ឋសភា បានប្រាប់គេហទំព័រក្នុងស្រុកថា នៅថ្ងៃទី៨ ខែធ្នូ ខាងមុខនេះ រដ្ឋសភានឹងកោះប្រជុំសម្រេច បោះឆ្នោតគាំទ្រពីសមាជិករដ្ឋសភា ក្នុងប្រគល់កៅអីគណៈកម្មការជំនាញរបស់អតីតគណបក្សសង្រ្គោះជាតិទៅឲ្យគណបក្សហ្វ៊ុនស៊ិនប៉ិច ចូលមកជំនួសកន្លែងដែលនៅទំនេរក្នុងនោះមន្ត្រីមកពីគណបក្សពីរទៀត ដែលបានកៅអីក្នុងរដ្ឋសភាដែរនោះ គឺជាសមាជិកគណៈកម្មការនេះ។ ចំណែកកៅអីអនុប្រធានទី១រដ្ឋសភា នឹងប្រគល់ឲ្យគណបក្សហ្វ៊ុនស៊ិនប៉ិច ដើម្បីបង្គ្រប់ឲ្យមានអនុប្រធាន២រូបឡើងវិញ។
ទោះជាយ៉ាងណាក៏ដោយ លោកឡេង ប៉េងឡុង មិនទាន់ដឹងច្បាស់អំពីតំណែងអនុប្រធានទី១ នៃរដ្ឋសភានេះ ថាតើមន្ត្រីគណបក្សហ្វ៊ុនស៊ិនប៉ិចរូបណាជាអ្នកទទួលនូវតួនាទីនេះ។ ប៉ុន្តែកន្លងមក សម្ដេចក្រុមព្រះនរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច ធ្លាប់បានបដិសេធក្នុងការទទួលយកតំណែងអនុប្រធានទី១នេះ ដោយព្រះអង្គបានបង្ហាញសញ្ញាបើកផ្លូវឲ្យលោក យូ ហុកគ្រី ធ្វើជាអនុប្រធានទី១ នៃរដ្ឋសភា។
ដោយឡែកកៅអីគណៈកម្មការជំនាញវិញ គណបក្សហ្វ៊ុនស៊ិនប៉ិច នឹងត្រូវបានតួនាទីជាប្រធានគណៈកម្មការជំនាញទី១ គណៈកម្មការជំនាញទី៣ គណៈកម្មការជំនាញទី៧ គណៈកម្មការជំនាញទី៨ និងគណៈកម្មការជំនាញទី១០ ព្រមទាំងតួនាទីអនុប្រធាន នៃគណៈកម្មការជំនាញចំនួន៥ទៀតរបស់អតីតគណបក្សសង្គ្រោះជាតិបន្ថែមទៀត៕