ភ្នំពេញ៖ បន្ទាប់ពីជំនួបកំពូលរវាងប្រមុខរដ្ឋាភិបាលកម្ពុជា និងបង់ក្លាដែសរួចមក សម្ដេចនាយករដ្ឋមន្ត្រី ហ៊ុន សែន និងលោកស្រី សេក្ខ ហាស៊ីហា នាយករដ្ឋមន្ត្រីបង់ក្លាដែស ក៏បានព្រមព្រៀងចុះហត្ថលេខាលើអនុស្សារណចំនួន១១ ហើយប្រទេសទាំង២បានសម្រេចដាក់ឈ្មោះផ្លូវ “បិតាឯករាជ្យ” នៅក្នុងប្រទេសរៀងៗខ្លួន ដើម្បីរំឭកពីសំណងសាមគ្គីភាពរវាងប្រទេសទាំង២។
https://1.bp.blogspot.com/-6RQlFrxwVvo/WiUKCCjA9xI/AAAAAAAAFzI/gAYTfrmjv8UWKf2O6oQQ9C9MeWQXzV3hACLcBGAs/s1600/24302252_1535304869851338_5657397462424036540_o.jpg
នៅក្នុងពិធីចុះអនុស្សារណៈ នៅថ្ងៃទី ៤ ខែធ្នូ ព្រឹកមិញនេះ សម្ដេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា កម្ពុជានឹងយកផ្លូវមួយដាក់ ឈ្មោះ«Sheikh Mujibur Rahman» ដែលជាបិតាឯករាជ្យរបស់ប្រទេសបង់ក្លាដែស។ ចំណែកភាគីបង់ក្លាដែសវិញ ក៏នឹងយកផ្លូវដ៏ល្បីមួយ នៅក្នុងរដ្ឋធានីដាក្កា ដាក់ព្រះនាម «សម្ដេចនរោត្តម សីហនុ» ដើម្បីជានិមិត្តរូប នៃការរំឭកពីចំណងសាមគ្គីភាពរវាងប្រទេសទាំងពីរ។
នៅក្នុងជំនួបកំពូលរវាងប្រមុខរដ្ឋាភិបាល នៃប្រទេសកម្ពុជា និងបង់ក្លាដែសនោះ កម្ពុជាបានចុះហត្ថលេខាលើឯកសារទាំង១១ចំណុច រួមមាន ទី១-សេចក្តីថ្លែងការណ៍រួម ស្តីពីលទ្ធផលនៃដំណើរទស្សនកិច្ចផ្លូវការរបស់នាយករដ្ឋមន្ត្រីបង់ក្លាដែស រវាងលោក ប្រាក់ សុខុន ទេសរដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា និងលោក Abul Hassan Mahmood Ali រដ្ឋមន្ត្រីក្រសួងការបរទេសបង់ក្លាដែស។ ទី២-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការ និងកិច្ចសហការលើបញ្ហាពាក់ព័ន្ធ ក្នុងការអនុវត្តគោលដៅអភិវឌ្ឍន៍ ដោយចីរភាពរហូតដល់ឆ្នាំ២០៣០។ ទី៣-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ។ ទី៤-អនុស្សារណៈយោគយល់គ្នា ស្តីពីកិច្ចសហប្រតិបត្តិការលើវិស័យទេសចរណ៍។ ទី៥-អនុស្សារណៈយោគយល់គ្នា ស្តីពីម៉ូដែលសម្រាប់កិច្ចសហប្រតិបត្តិការរ វាងស្ថាប័នចំណុះក្រុមប្រឹក្សាពាណិជ្ជកម្មចម្រុះ។ ទី៦-អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការស្ថាប័នលើកិច្ចការពាក់ព័ន្ធនឹងការជំរុញវិនិយោគ រវាងក្រុមប្រឹក្សាអភិវឌ្ឍន៍កម្ពុជា និងអាជ្ញាធរអភិវឌ្ឍន៍ការវិនិយោគបង់ក្លាដែស។ ទី៧-អនុស្សាណៈយោគយល់គ្នា ស្តីពីកិច្ចសហប្រតិបត្តិការលើវិស័យបច្ចេកវិទ្យាព័ត៌មាន និងគមនាគមន៍។ ទី៨-អនុស្សារណៈយោគយល់គ្នាស្តីពីកិច្ចសហប្រតិបត្តិការលើវិស័យវារីវប្បកម្ម។ ទី៩-អនុស្សារណៈយោគយល់គ្នា ស្តីពីកិច្ចសហប្រតិបត្តិការក្នុងការអភិរក្សប្រវត្តិសាស្ត្រសង្គ្រាម បូជនីយស្ថានសង្គ្រាម និងកេរតំណែលសង្គ្រាម។ ទី១០-អនុស្សារណៈយោគយល់គ្នាស្តីពីកិច្ចសហប្រតិបត្តិការលើវិស័យសិក្សាស្រាវជ្រាវ រវាងរាជបណ្ឌិត្យសភាកម្ពុជា និងវិទ្យាស្ថានសិក្សាអន្តរជាតិ និងយុទ្ធសាស្ត្របង់ក្លាដែស និងទី១១-កិច្ចព្រមព្រៀងស្តីពីសហប្រតិបត្តិការរវាង សភាពាណិជ្ជកម្មកម្ពុជា និងសហព័ន្ធន៍សភាពាណិជ្ជកម្ម និងឧស្សាសហកម្មបង់ក្លាដែស៕
