សិល្បៈ៖ ពេលនេះតារាកំប្លែង ស្រេង សុកាន់ដា ហៅ នាងខ្ញុង កំពុងរួមរស់យ៉ាងមានសុភមង្គលជាមួយ នាយ កៃដ ដែលជាស្វាមីក្រោយរបស់នាង ប៉ុន្ដែមកទល់ពេលនេះ គូស្នេហ៍សិល្បៈខាងលើ ពុំទាន់ទទួលបានដំណឹងល្អទាក់ទងនឹងរឿងមានបុត្រនៅឡើយ ។
ទើបតែថ្មីៗនេះ តារាកំប្លែងស្រីស្ថិតក្នុងក្រុមនាយពែកមី ខាងលើ ស្រាប់តែបង្ហោះសារជាសាធារណៈលើបណ្ដាញសង្គមហ្វេសប៊ុក កំពុងត្រៀមខ្លួនទទួលយកសមាជិកថ្មី ដោយនាងត្រូវកាត់បន្ថយចំណាយមួយចំនួនដែលមិនសូវចាំចាច់ ។
ខ្ញុង បានរៀបរាប់ថា «ពេលនេះខ្ញុំត្រូវកាត់បន្ថយការចំណាយ ក្នុងការដើរលេងទិញសម្លៀកបំពាក់ របស់ប្រើប្រាស់ ហើយក៏ត្រៀមទទួលយកនូវសមាជិកបន្ថែមទៀតដែរ ព្រោះសម័យនេះបើគ្មានលុយ ស្អីក៏គ្មានដែរ សូម្បីតែសុភមង្គលគ្រួសារ» ។
យ៉ាងណាមិញ តាមរយៈការឆ្លើយតាម Comment ជាមួយអ្នកគាំទ្ររបស់ចៅកែសាច់ក្រក នាងខ្ញុង បានបញ្ជាក់ថា ពេលនេះនាងមិនទាន់មានផ្ទៃពោះនៅឡើយទេ ប៉ុន្ដែគ្រាន់តែត្រៀមកាត់បន្ថយចំណាយឱ្យហើយ ដើម្បីចាំទទួលយកសមាជិកថ្មីដែលជាតំណក់ឈាមរួមគ្នារវាងនាង ស្វាមីក្រោយ នាយកៃដ ប៉ុណ្ណោះ ៕ Cake KBN