បុរសម្នាក់ ជិះម៉ូតូពីភ្នំពេញ ធ្វើដំណើរទៅស្រុកកំណើត ដើម្បីធ្វើសំបុត្រកំណើតអោយកូន ជាអកុសល ដល់ពាក់កណ្តាលផ្លូវ ស្រាប់តែរថយន្ត មិនស្គាល់ម៉ាក់ បើកទៅបុកចំពីមុខ ពេញទំហឹង បណ្តាលអោយ បុរសរូបនោះ រយះដៃជើងខ្ទាំទ្រូង ស្លាប់នៅកន្លែងកើតហេតុ ចំនែករថយន្តបង្ករ បានបើករត់គេចខ្លួន បាត់ស្រមោល ហេតុការណ៍នេះ បានកើតឡើងនៅវេលាម៉ោង ៩និង៣០នាទីយប់ ថ្ងៃទី៣ ខែធ្នូ ឆ្នាំ២០១៧ នៅលើស្ពាន៧មករា ផ្លូវជាតិលេខ៣ ភូមិក្រាំងពង្រ សង្កាត់ក្រាំងពង្រ ខណ្ឌដង្កោ ។
សពជនរងគ្រោះ មានឈ្មោះ ហេង សារ៉ុត ភេទប្រុស អាយុ ៣៥ឆ្នាំ មុខរបរកម្មកររោងចក្រ ស្នាក់នៅផ្ទះជួល ម្តុំផ្សារបែកចាន ស្រុកអង្គស្នួល ខេត្តកណ្តាល មានស្រុកកំណើត នៅភូមិត្រាំងកំណប់ ឃុំដំបូកខ្ពស់ ស្រុកអង្គរជ័យ ខេត្តកំពត ។
តាមប្រភព័ត៌មាន ពីកន្លែងកើតហេតុ បានអោយដឹងថា មុនពេលកើតហេតុ គេបានឃើញ បុរសខាងលើ មិនដឹងថាគោលបំណង ទៅណានោះទេ គឺបានជិះម៉ូតូម៉ាកស៊ុយសុគី ស្មាសរ៉េវ៉ូ ពណ៌ខ្មៅ ពាក់ស្លាកលេខ កំពង់ឆ្នាំ 1A 4071 បានធ្វើដំណើរ តាមផ្លូវជាតិលេខ៣ ក្នុងទិសដៅ ជើងទៅត្បូង ខណៈមកដល់ចំនុចកើតហេតុ លើស្ពាន៧មករា ដែលជាផ្លូវកោង ហើយងងឹតទៀតនោះ ធ្វើអោយម៉ូតូបើក ចូលទៅផ្លូវរបស់គេ ស្របពេលនោះដែរ ក៏ស្រាប់តែរថយន្តប្រភេទ បែនដឹកដីមួយគ្រឿង មិនចាំម៉ាក បានបើកធ្វើដំណើរ តាមផ្លូវជាតិលេខ៣ ក្នុងទិសដៅបញ្ច្រាសគ្នា ពីត្បូងទៅជើង ក្នុងល្បឿនលឿន បានជ្រុលទៅបុក ចំពីមុខពេញទំហឹង បណ្តាលអោយអ្នកបើកម៉ូតូ រងរបួសរយះដៃរយះជើង មុខ និងខ្ទាំទ្រូង ស្លាប់នៅកន្លែងតែម្តង ចំនែកម៉ូតូវិញរងការខូចខាត ខ្ទេចខ្ទីផ្នែកខាងមុខ។
ដោយឡែករថយន្តបង្ករវិញ នៅពេលដែលឃើញ ហេតុការណ៍បែបនេះ បានបន្ថែមល្បឿន រត់គេចខ្លួនបាត់ស្រមោល។ ក្នុងហេតុការណ៍នេះដែរ មានបងប្អូនរបស់ ជនរងគ្រោះ បានទៅកន្លែងកើតហេតុ និងបាននិយាយថា ជនរងគ្រោះខាងលើ គឺបានជិះម៉ូតូចេញពីភ្នំពេញ គោលបំណងត្រលប់ ទៅស្រុកកំណើត ដើម្បីធ្វើសំបុត្រកំណើត អោយកូន ដែលទើបនិងបានជិះ មួយខែ តែសំណាងមិនល្អ ក៏ជួបគ្រោះថ្នាក់បែបនេះទៅ ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញ់បានចុះទៅដល់ កន្លែងកើតហេតុ រួចហើយបានធ្វើលិខិត ប្រគល់សពជនរងគ្រោះអោយបងប្អូន សាច់ញាតិ យកធ្វើបុណ្យ នៅស្រុកកំនើតខេត្តកំពត ចំនែកម៉ូតូវិញ ត្រូវបានសមត្ថកិច្ចយកទៅ រក្សាទុកនៅអធិការដ្ឋាន ខណ្ឌដង្កោ ដើម្បីរងចាំប្រគល់អោយ សាច់ញាតិរបស់ជនរងគ្រោះវិញ ៕
