ខេត្តកំពត៖ ជនបរទេសប្រុស-ស្រី២នាក់ ទំនងជាទើបនឹងចេញពីផឹកស៊ីស្រវឹង បានជិះម៉ូតូដឹកគ្នា បោះពួយយ៉ាងលឿន ជ្រុលចង្កូតទៅបុករបងថ្ម បណ្ដាលឲ្យស្លាប់ម្នាក់យ៉ាងអណោចអធ័មម្នាក់ និងរបួស២នាក់ កាលពីវេលាម៉ោង២រំលងអធ្រាត្រ នៅថ្ងៃទី៣ ខែធ្នូ ឆ្នាំ២០១៧ នៅត្រង់ចំណុចផ្លូវកែង នាទិសអាគ្នេយ៍ នៃសាលាខេត្តកំពត ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត។
មន្ត្រីនគរបាលចរាចរក្រុងកំពត បានឲ្យដឹងថា ជនរងគ្រោះ នៅក្នុងហេតុការណ៍គ្រោះថ្នាក់ចរាចរណ៍ខាងលើនោះ ទី១-ឈ្មោះ Medine Emeric Philippe ភេទប្រុស ឆ្នាំកំណើត ០១ ខែមករា ឆ្នាំ១៩៨៨ ជនជាតិបារាំង មុខរបរជាអ្នកទេសចរ (ជាអ្នកបើកបរ ស្លាប់នៅកន្លែងកើតហេតុ) និងទី២-ឈ្មោះ LAO ENTHEOS ភេទប្រុស ថ្ងៃខែឆ្នាំកំណើត ០៥-១០-១៩៨៩ ជនជាតិបារាំង មុខរបរជាអ្នកទេសចរ (រងរបួសផ្ទៃមុខ ជាអ្នករួមដំណើរជាមួយ)។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញជនរងគ្រោះបានជិះម៉ូតូមួយគ្រឿង ម៉ាកអ៊ែរប្លែក ពណ៌ទឹកមាស ស្លាកលេខ ភ្នំពេញ 1FD 5271 ដឹកគ្នាបោះពួយយ៉ាងលឿន។ លុះពេលពួកគេធ្វើដំណើរមកដល់ចំណុចកើតហេតុ ទំនងជាអ្នកបើកបរស្រវឹងផង ហើយបាត់បង់ម្ចាស់ការលើខ្លួនឯង ទើបធ្វើឲ្យម៉ូតូរេចង្កូតទៅបុករបងថ្ម បោកផ្ទប់នឹងជញ្ជាំងឥដ្ឋ បណ្ដាលឲ្យអ្នកបើកបរស្លាប់យ៉ាងអណោចអធ័មមួយរំពេច និងអ្នករួមដំណើរជាមួយរងរបួសបែកក្បាលហូរឈាម។
មន្ត្រីនគរបាលចរាចរ បានសន្និដ្ឋានថា ករណីគ្រោះថ្នាក់ចរាចរណ៍ខាងលើនេះ គឺបណ្ដាលមកពីអ្នកបើក បរស្រវឹង ទើបជ្រុលចង្កូតទៅរបងថ្មដោយខ្លួនឯង បណ្ដាលឲ្យស្លាប់យ៉ាងដូច្នេះ (តាមការបំភ្លឺរបស់អ្នករងរបួស។
ក្រោយពេលកើតហេតុ សមត្ថកិច្ចបានចុះទៅពិនិត្យ និងយកសាកសពរបស់ជនរងគ្រោះទៅតម្កល់ទុក នៅក្នុងមន្ទីរពេទ្យបង្អែកខេត្តកំពត។ ដោយឡែកម៉ូតូរបស់ជនរងគ្រោះ ត្រូវមត្ថកិច្ចយកទៅរក្សាទុកនៅក្នុងអធិការដ្ឋាននគបាលក្រុងកំពត ដើម្បីរង់ចាំចាត់ការបន្តតាមនីតិវិធី៕