ភ្នំពេញ៖ ជនសង្ស័យប្រុសស្រី ២នាក់ ត្រូវជាប្តីប្រពន្ធនិងគ្នា ត្រូវបានសមត្ថកិច្ចប៉ុស្តិ៍នគរបាលស្ទឹងមានជ័យ២ ឃាត់ខ្លួនយកទៅសាកសួរ បន្ទាប់ពីឆែកឆេររកឃើញនូវថ្នាំញៀន និងដាវកែច្នៃមួយដើម ព្រមទាំងឧបករណ៍សំរាប់ប្រើប្រាស់គ្រឿងញៀនមួយចំនួន ហេតុការណ៍ ឃាត់ខ្លួនបានធ្វើឡើងកាលពីវេលាម៉ោង៨ និង៣០នាទីព្រឹក ថ្ងៃទី៣ ខែធ្នូ ឆ្នាំ២០១៧ នៅចំនុចផ្ទះគ្មានលេខ ផ្លូវបេតុង ភូមិភ្នាត សង្កាត់ស្ទឹងមានជ័យ ខណ្ឌមានជ័យ ។
ជនសង្ស័យមានឈ្មោះ ជួរ មិនា ហៅអូន ភេទប្រុស អាយុ ២៩ឆ្នាំ មុខរបរមិនពិតប្រាកដ ស្នាក់នៅ ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ចំនែកប្រពន្ធមានឈ្មោះ គាង លីនដា ភេទស្រីអាយុ ២០ឆ្នាំ មុខលក់ដូរ ស្នាក់ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ ក្រោយឃាត់ខ្លួន សមត្ថកិច្ចបានដកហូត ថ្នាំប្រភេទក្រាមពណ៌សថ្លា ចំនួន ១កញ្ចប់តូច ដាវកែច្នៃមួយដើម ថងសំរាប់ច្រកថ្នាំមួយចំនួន និងឧបករណ៍សំរាប់ប្រើប្រាស់គ្រឿងញៀនមួយឈុត ។
តាមសម្តីលោក តេង សាមឿន មេប៉ុស្តិ៍ស្ទឹងមានជ័យ២ បានឱ្យដឹងថា មុនឈានទៅដល់ការឃាត់ខ្លួន ជនសង្ស័យនោះបាន គឺមានបងប្អូនប្រជាពលរដ្ឋបានទូរសព័្ទប្រាប់គាត់ថា មានបុរសខាងលើ កំពុងតែរករឿង អុកឡុក អ្នកផ្ទះ ហើយបុរសរូបនោះធ្លាប់ប្រើប្រាស់គ្រឿងញៀនផងដែរ ដូចនេះរូបគាត់ ក៏បានដឹកនាំកម្លាំងចុះទៅកន្លែងកើតហេតុភ្លាមៗ រួចហើយបានឃាត់ខ្លួន បុរសរូបនោះ ព្រមទាំងទៅឆែកឆេរត្រួតពិនិត្យ ស្រាប់តែរកឃើញនូវថ្នាំញៀនប្រភេទក្រាមពណ៌សថ្លា ចំនួន ១កញ្ចប់តូច ដាវកែច្នៃមួយដើម ព្រមទាំងឧបករណ៍ប្រើប្រាស់គ្រឿងញៀនមួយឈុត រួចហើយក៏នាំខ្លួនជនសង្ស័យរូបនោះ យកទៅសាកសួរនៅប៉ុស្តិ៍នគបាលស្ទឹងមានជ័យ២ ។
នៅចំពោះមុខសមត្ថកិច្ច ជនសង្ស័យទាំងនោះ បានសារភាពថា ពួកគេពិតជាបានប្រើប្រាស់ និងចែកចាយគ្រឿងញៀនពិតប្រាកដមែន ហើយបុរសសង្ស័យ ក៏ធ្លាប់ជាប់គុក អស់រយៈពេល ១០ឆ្នាំម្តងរួចមកហើយ ពាក់ព័ន្ធជាច្រើនករណី ។
សមត្ថកិច្ចបានឱ្យដឹងទៀតថា ជនសង្ស័យរូបនោះ តែងតែបង្កហិង្សារ អុកឡុក អ្នកផ្ទះ និងប្រជាពលរដ្ឋដែលរស់នៅក្បែរនោះជារៀងរាល់ថ្ងៃ នៅពេលដែលជនសង្ស័យរូបនោះ ប្រើប្រាស់គ្រឿងញៀន ម្តងៗ ។
ក្រោយពេលកើតហេតុ បន្ទាប់បន្ទាប់ពីសាកសួររួចហើយ ជនសង្ស័យព្រមទាំងវត្ថុតាង ត្រូវបានសមត្ថកិច្ចកសាងសុំនុំរឿងបញ្ជូនខ្លួន នៅអធិការដ្ឋាន ខណ្ឌមានជ័យ ដើម្បីចាត់ការបន្តតាមនីតិវិធី ៕