ភ្នំពេញ៖ ក្រោយពេល រដ្ឋសភាបានប្រកាសសុពលភាព កាលពីថ្ងៃទី២៧ ខែវិច្ឆិកា ម្សិលមិញនេះ រួចមក តំណាងរាស្ត្រថ្មីទាំង៤៤រូប មកពីគណបក្សសហ្វ៊ុនស៊ិនប៉ិច គណបក្សសញ្ជាតិកម្ពុជា និងគណបក្សខ្មែរអភិវឌ្ឍន៍សេដ្ឋកិច្ច នឹងត្រូវចូលធ្វើពិធីសម្បថ នៅចំពោះព្រះភ័ក្រ្ដរបស់ព្រះមហាក្សត្រ នៅក្នុងព្រះបរមរាជវាំងនារសៀល ថ្ងៃទី២៨ ខែវិច្ឆិកា នេះ។
បន្ទាប់ពីតុលាការកំពូលបានសម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ នោះមក អាសនៈតំណាងរបស់គណបក្សសង្គ្រោះជាតិទាំង៥៥ បានអស់សុពលភាព ចាប់តាំងពីពេលនោះមក។ រីឯអាសនៈទាំង៥៥នេះ ក៏ត្រូវបានគណៈកម្មាធិការជាតិរៀបចំការបោះឆ្នោត បានយកមកបែងចែកទៅឲ្យគណបក្សនយោបាយដែលចូលរួម ក្នុងការបោះឆ្នោត កាលពីឆ្នាំ២០១៣ កន្លងទៅនេះ។
បើតាមច្បាប់បោះឆ្នោតថ្មីដែលធ្វើវិសោធនកម្ម ដោយតំណាងរាស្រ្ដ មកពីគណបក្សប្រជាជនកម្ពុជា ( CPP ) គឺអាសនៈទាំង៥៥នោះ គជបបានបែងចែកទៅឲ្យគណបក្ស ចំនួន៥ រួមមាន ទី១-គណបក្ស
ហ្វ៊ុនស៊ិនប៉ិច ដឹកនាំដោយសម្ដេចក្រុមព្រះ នរោត្តម រណឫទ្ធិ ទទួលបាន៤១អាសនៈ ទី២-គណបក្សសម្ព័ន្ធដើម្បីប្រជាធិបតេយ្យ ដឹកនាំដោយលោក ខឹម វាសនា ទទួលបាន៦អាសនៈ ទី៣-គណបក្សខ្មែរឈប់ក្រ ដឹកនាំដោយលោក ក្រវ៉ាញ ដារ៉ន ទទួលបាន៥អាសនៈ ទី៤-គណបក្សសញ្ជាតិកម្ពុជា ដឹកនាំដោយលោក សេង សុខេង ទទួលបាន២អាសនៈ និងទី៥-គណបក្សខ្មែរអភិវឌ្ឍន៍សេដ្ឋកិច្ច ដឹកនាំដោយលោក ហួន រាជចំរើន ទទួលបាន១អាសនៈ។
ដោយឡែក គណបក្សសម្ព័ន្ធដើម្បីប្រជាធិបតេយ្យ ដឹកនាំដោយលោក ខឹម វាសនា និងគណបក្សខ្មែរឈប់ក្រ ដឹកនាំដោយលោក ក្រវ៉ាញ ដារ៉ន បានបដិសេធនូវការទទួលយកអាសនៈរបស់ខ្លួនដែលបានមកពីការរំលាយគណបក្សសង្គ្រោះជាតិ ដោយតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧។ ដូច្នេះអាសនៈទាំង១១ដែលគណបក្សទាំង២នេះ បានបោះបង់ចោលនោះ គឺគណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចប្រគល់ជូនទៅគណបក្សប្រជាជនកម្ពុជា ដែលកំពុងកាន់អំណាច ដែលធ្វើឲ្យគណបក្សនេះ មានអាសនៈរហូតដល់៧៩អាសនៈ។
លោក សោម សូរីដា អគ្គលេខាធិការរង នៃគណៈកម្មាធិការជាតិរៀបចំការបោះឆ្នោត បានមានប្រសាសន៍ប្រាប់គេហទំព័រក្នុងស្រុក កាលពីម្សិលមិញនេះ ថា គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប នឹងចុះហត្ថលេខា លើបញ្ជីឈ្មោះបេក្ខជនតំណាងរាស្ត្រទាំង១១រូបនេះ ហើយរៀបចំបញ្ជូនទៅកាន់រដ្ឋសភា ដើម្បីពិនិត្យ និងប្រកាសសុពលភាពជូនពួកគាត់ ដោយមិនបង្អង់យូរទេ គឺបើមិនថ្ងៃស្អែក គឺថ្ងៃខានស្អែក។
លោក អគ្គលេខាធិការរង នៃគណៈកម្មាធិការជាតិរៀបចំការបោះឆ្នោត បានបន្តថា គណៈកម្មាធិការជាតិរៀបចំការបោះឆ្នោត បានបែងចែកអាសនៈទាំង១១ដែលនៅទំនេរ ទៅឲ្យគណបក្សចំនួន៤ ក្នុងនោះ មានគណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សសញ្ជាតិកម្ពុជា និងគណបក្សខ្មែរអភិវឌ្ឍន៍សេដ្ឋកិច្ច។
ទោះជាយ៉ាងណា លោកអគ្គលេខាធិការរង នៃគណៈកម្មាធិការជាតិរៀបចំការបោះឆ្នោត រូបនេះ បានអះអាងថា គណបក្សប្រជាជនកម្ពុជា អាចនឹងត្រូវទទួលបានអាសនៈទាំង១១នេះតែម្តង។ រីឯគណបក្ស៣ទៀត មិនទទួលបានឡើយ ព្រោះសន្លឹកឆ្នោត ដែលពលរដ្ឋបោះឲ្យ មានចំនួនមិនគ្រប់គ្រាន់។ រីឯគណបក្សប្រជាជនកម្ពុជា មានសំឡេងច្រើនលើសលុប ដូច្នេះត្រូវតែទទួលបានទាំងអស់នេះ»។
ក្នុងការបែងចែកលើកទី១ គណបក្សហ្វ៊ុនស៊ិនប៉ិច ទទួលបាន៤១អាសនៈ គណបក្សសញ្ជាតិកម្ពុជា ទទួលបាន២អាសនៈ និងគណបក្សខ្មែរអភិវឌ្ឍសេដ្ឋកិច្ច ទទួលបាន១អាសនៈ។ នៅព្រឹក ថ្ងៃទី២៧ ខែវិច្ឆិកា ឆ្នាំ២០១៧ តំណាងរាស្ត្រថ្មីទាំង៤៤រូប ដែលមកពីគណបក្សទាំង៣ខាងលើនេះ ត្រូវបានរដ្ឋសភាបើកកិច្ចប្រជុំពេញអង្គ ប្រកាសសុពលភាពជូនពួកគាត់ ជាផ្លូវការរួចហើយ។ ដោយឡែក បេក្ខជនតំណាងរាស្ត្រថ្មីរបស់គណបក្សប្រជាជនកម្ពុជា ចំនួន១១រូបផ្សេងទៀត ក៏នឹងត្រូវទទួលការប្រកាសសុពលភាព ពីរដ្ឋសភា នៅពេលក្រោយ។
ទោះជាយ៉ាងណា រដ្ឋសភាមិនទាន់បានកំណត់កាលបរិច្ឆេទ ដើម្បីបើកកិច្ចប្រជុំពេញអង្គ ក្នុងការប្រកាសសុពលភាពជូនបេក្ខជនតំណាងរាស្ត្រទាំង១១រូបនេះនៅឡើយទេ។
ក្រោយពេលបែងចែកអាសនៈតំណាងរាស្រ្ដរបស់អតីតគណបក្សសង្គ្រោះជាតិរួចហើយ គណៈកម្មាធិការជាតិរៀបចំការបោះឆ្នោត នឹងចាប់ផ្តើមបែងចែកអាសនៈសមាជិកក្រុមប្រឹក្សាឃុំ-សង្កាត់របស់គណបក្សនេះប្រមាណជាង៥ពាន់ ទៅឲ្យគណបក្សដទៃទៀត។ ប៉ុន្តែការបែងចែកអាសនៈក្រុមប្រឹក្សាឃុំ-សង្កាត់ទាំងអស់របស់គណបក្សសង្គ្រោះជាតិ ទៅឲ្យគណបក្សដទៃ នៅមិនទាន់ចេញជាលទ្ធផលឡើយ។
ការបោះឆ្នោតថ្នាក់ជាតិ កាលពីឆ្នាំ២០១៣ គណបក្សហ្វ៊ុនស៊ិនប៉ិច ដែលកាលណោះ ស្ថិតក្រោមការដឹកនាំរបស់ព្រះអង្គម្ចាស់ក្សត្រី នរោត្តម អារុណ រស្មី មិនទទួលបានកៅអីណាមួយឡើយ ពោលគឺបានសំឡេងគាំទ្រតែ ៣,៦៦ភាគរយប៉ុណ្ណោះ ខណៈគណបក្សប្រជាជនកម្ពុជាឈ្នះ៦៨កៅអី រីឯសង្គ្រោះជាតិ បាន៥៥កៅអី។
ក្នុងចំណោមមន្ត្រីជាន់ខ្ពស់របស់គណបក្សហ៊្វុនស៊ិនប៉ិច ដែលត្រូវរដ្ឋសភាប្រកាសសុពលភាពនោះ គឺមន្ត្រីខ្លះធ្លាប់ធ្វើជារដ្ឋមន្ត្រី ដូចជា លោក ញ៉េប ប៊ុនជិន លោក នុត សុខុម លោក យូ ហុកគ្រី ជាដើម។ រីឯមន្ត្រីខ្លះទៀត ក៏ធ្លាប់ធ្វើជាជាអតីតអភិបាលខេត្ត រួមមាន លោក ហេង ចាន់ថា លោក សាយ ហាក់ លោក ចាប ញ៉ាលីវុធ លោក ថាវ គឹមឡុង ហើយខ្លះទៀត ជា អតីតថ្នាក់ដឹកនាំ តាមក្រសួងនានា រួមទាំងតំណែងទីប្រឹក្សារដ្ឋាភិបាលផងដែរ។
ក្រោយការរំលាយគណបក្សសង្គ្រោះជាតិ ដោយតុលាការកំពូល កាលពីថ្ងៃទី១៦ ខែវិច្ឆិកា គណបក្សហ្វ៊ុនស៊ិនប៉ិច ដែលជាដើមបណ្តឹងប្រឆាំង CNRP មុនដំបូងគេបំផុតនោះ ស្ថិតក្នុងចំណោមគណបក្សទាំង៦ ដែលត្រូវទទួលបានកៅអី ពីការបែងចែក ដោយគណៈកម្មាធិការជាតិរៀបចំការបោះឆ្នោត (គ.ជ.ប)។
សូមបញ្ជាក់ថា តុលាការកំពូល បានសម្រេចរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ នោះ គឺធ្វើឡើង បន្ទាប់ពីប្រមុខរដ្ឋាភិបាល បានចោទប្រកាន់លោក កឹម សុខា ប្រធានគណបក្សសង្គ្រោះជាតិ ពីបទ “ក្បត់ជាតិ”។ បន្ទាប់មក គណបក្សយុវជនកម្ពុជា ដឹកនាំដោយលោកពេជ្រ ស្រស់ និងគណបក្សហ្វ៊ុនស៊ិនប៉ិច ក៏បានប្ដឹងទៅក្រសួងមហាផ្ទៃ ដើម្បីសុំឲ្យប្ដឹងទៅតុលាការកំពូលរំលាយគណបក្សប្រឆាំងដ៏ល្បីមួយនេះ។
ក្រោយមក ក្រសួងមហាផ្ទៃក៏បានដាក់ពាក្យបណ្ដឹងទៅតុលាការកំពូល ទើបតុលាការមួយនេះបានលើកយកសំណុំរឿងនេះមកជំនុំជម្រះ ហើយក៏សម្រេចរំលាយគណបក្សប្រឆាំង និងដាក់បម្រាមដល់មន្ត្រីជាន់ខ្ពស់របស់គណបក្សនេះចំនួន១១៨នាក់ មិនឲ្យធ្វើនយោបាយ រយៈពេល៥ឆ្នាំ។ រីឯបទចោទប្រកាន់ ក្បត់ជាតិ នេះ បានកើតឡើង ក្រោយពេលមានវីដេអូឃ្លីបមួយ ដែលលោក កឹម សុខា ថ្លែងនៅក្នុងប្រទេសអូស្រ្ដាលី កាលពីពីអំឡុងឆ្នាំ២០១៣ ហើយត្រូវគេបង្ហោះតាមបណ្ដាញសង្គមហ្វេសប៊ុកតៗគ្នា ទើបមានការចាប់ខ្លួនមេបក្សប្រឆាំងរូបនេះ បញ្ជូុនទៅកាន់ពន្ធនាគារត្រពាំងផ្លុង ខេត្តត្បូងឃ្មុំ៕