ភ្នំពេញ៖ អ្នកនាំពាក្យគណបក្សប្រជាជនកម្ពុជា បានថ្លែងថា នៅពេលរដ្ឋសភា បែងចែកអាសនៈរបស់បក្សដែលនៅទំនេរ ទៅឲ្យគណបក្សនានារួចហើយ សភានឹងដំណើរការនីតិវិធីរៀបចំគណៈកម្មាធិការជាតិរៀបចំការបោះឆ្នោត(គជប)ឡើងវិញ តាមគោលការណ៍ នៃច្បាប់ ស្ដីពីការរៀបចំ និងការប្រព្រឹត្តទៅរបស់គជប។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានបន្តថា ការរៀបចំគជបឡើងវិញនេះ គឺធ្វើឡើង បន្ទាប់ពីសមាជិករបស់គជប៣រូប មកពីកូតារបស់អតីតគណបក្សសង្រ្គោះជាតិ (CNRP) បានដាក់ពាក្យលាឈប់ពីតំណែង ក្រោយពីបក្សរបស់ខ្លួនត្រូវបានរំលាយចោល ដោយអំណាចតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧។
អ្នកនាំពាក្យគណបក្សប្រជាជនកម្ពុជា បានបញ្ជាក់ ក្រោយបញ្ចប់កិច្ចពិភាក្សាតុមូលស្ដីពីដំណើរការប្រជាធិបតេយ្យ នៅកម្ពុជា នារាជបណ្ឌិត្យសភា ក្រោយអវត្តមានគណបក្សសង្គ្រោះជាតិ នៅថ្ងៃទី២១ ខែវិច្ឆិកា ឆ្នាំ២០១៧ថា ក្រោយពេលបែងចែកអាសនៈទៅឲ្យគណបក្សនានារួចហើយ សភានឹងដំណើរការនីតិវិធី គជប ឡើងវិញ តាមគោលការណ៍ច្បាប់ស្ដីពីការរៀបចំរៀបចំ និងការប្រព្រឹត្តទៅរបស់គជប។
ជាមួយគ្នានេះ អ្នកនាំបក្សដដែលបានបន្តថា បក្សប្រឆាំងមិនអាចយកពលរដ្ឋទាំង១៥លាននាក់ មកធ្វើជាចំណាប់ខ្មាំងបានទេ។ ទោះបីជាអវត្តមានគណបក្សប្រឆាំងមួយនេះក្ដី ក៏ប្រជាធិបតេយ្យ នៅកម្ពុជានៅតែដើរទៅមុខជានិច្ច។
លោក សុខ ឥសាន បានបន្ថែមថា កម្ពុជាមិនបានប្រតិកម្មលើប្រទេសមួយចំនួននោះទេ ព្រោះប្រទេសមួយចំនួន គឺជាយន្តការនៃបដិវត្តពណ៌ ដែលបានដឹកនាំឲ្យបក្សប្រឆាំងឲ្យធ្វើខុសតែប៉ុណ្ណោះ ដូច្នេះជាធម្មតាទេ ចៅហ្វាយនាយ និងអាយ៉ង់ការពារឲ្យគ្នាទៅវិញទៅមកនោះ។
ការលើកឡើងរបស់អ្នកនាំពាក្យរូបនេះ ថ្វីបើមិនបានបញ្ចេញចំឈ្មោះប្រទេសមួយណាក៏ដោយ ប៉ុន្តែគេអាចយល់ថា អ្នកនាំពាក្យរូបនេះចង់និយាយសំដៅលើអាមេរិក ព្រោះរាជរដ្ឋាភិបាល នៃប្រទេសកម្ពុជាបានចោទអំពើក្បត់ជាតិរបស់ លោក កឹម សុខា គឺមានបរទេសនៅពីក្រោយខ្នង។
ដោយឡែក លោក ឡេង ប៉េងឡុង អ្នកនាំពាក្យរដ្ឋសភា បានឲ្យដឹងថា តាមរដ្ឋធម្មនុញ្ញ បេក្ខភាពសមាជិក គជប ថ្មីដែលនឹងចូលទៅអង្គុយជំនួស កន្លែងសមាជិកចាស់ចាកចេញនោះ គឺជាកូតាមកពីគណបក្សនៅក្រៅរដ្ឋាភិបាល។ គណបក្សនៅក្រៅរដ្ឋាភិបាលបច្ចុប្បន្ នគឺអាចមានរហូតដល់៦គណបក្ស។ នេះបើតាម គជប ដែលប្រកាសឲ្យគណបក្សទាំង៦នោះ ផ្តល់ព័ត៌មានមកកាន់គជប ក្នុងការទទួលយកអាសនៈរបស់គណបក្សសង្រ្គោះជាតិដែលត្រូវបានរំលាយ។ ប៉ុន្តែគណបក្សសម្ព័ន្ ធដើម្បីប្រជាធិបតេយ្យរបស់លោក ខឹម វាសនា បដិសេធជាផ្លូវការ មិនទទួលអាសនៈដែលផ្តល់ឲ្យ ដោយគជប នេះទេ។
អ្នកនាំពាក្យគជប លោក ហង្ស ពុទ្ធា បានសម្ដែងនូវការសោកស្តាយចំពោះការចាកចេញរបស់សមាជិក គជបទាំង៣រូប ដោយថាពួកគេធ្វើការងារជាមួយគ្នាបានល្អ ក្នុងការរៀបបោះឆ្នោតឃុំ-សង្កាត់ នាពេលកន្លងមកនេះ។
សូមបញ្ជាក់ថា សមាជិកគជប ៣រូប ដែលបានប្រកាសដើរចេញពីគជប នោះ រួមមាន លោក គួយ ប៊ុនរឿន ជាអនុប្រធានគជប លោក រ៉ុង ឈុន និងលោកស្រី តែ ម៉ានីរ៉ុង ជាសមាជិក។ មន្រ្ដីជាន់ខ្ពស់ទាំង៣រូបនេះ សុទ្ធសឹងជាកូតាមកពីគណបក្សសង្រ្គោះជាតិ។ ដោយឡែកលោក ហ៊ីង ធីឬទ្ធិ ជាកូតាមកពីអតីតគណបក្សសង្រ្គោះជាតិដែរនោះ បានបញ្ជាក់ថា “ខ្ញុំនៅរក្សាជំហរបន្តការងារ ក្នុងគជប តទៅទៀត ដើម្បីការពារផលប្រយោជន៍របស់គណបក្សនយោបាយទាំងអស់ដែលចូលរួមក្នុងការបោះឆ្នោត រហូតដល់ចប់អាណត្តិ”។
សម្រាប់សមាជិកគ.ជ.ប ដែលចាកចេញបានគូសបញ្ជាក់ថា មូលហេតុដែលពួកគេមិនអាចបន្តការងារបោះឆ្នោតបានតទៅទៀតដោយសារតែមានការបែងចែកអាសនៈអតីតគណបក្សសង្រ្គោះជាតិទៅឲ្យគណបក្សដទៃទៀតដែលពលរដ្ឋមិនគាំទ្រ។ បើតាមសមាជិក គ.ជ.ប ទាំង៣រូបនេះ ក្នុងនាមជាអាជ្ញាកណ្តាល ពួកគេមិនអាចនៅបន្តការងារ ក្នុងស្ថាប័នរៀបចំការបោះឆ្នោតតទៅទៀតទេ ដោយថាវាក្បត់នឹងឧត្តមគតិរបស់ពួកគេ និងឆន្ទៈរបស់ប្រជាពលរដ្ឋជាម្ចាស់ឆ្នោត ដែលនាំឲ្យជាប់ឈ្មោះអាក្រក់ក្នុងប្រវត្តិសាស្ត្រ៕