ភ្នំពេញ៖ បន្ទាប់ពីបើកសវនការអស់រយៈពេលពេញមួយថ្ងៃរួចមក តុលាការកំពូលបានសម្រេចចេញដីការំលាយគណបក្សសង្គ្រោះជាតិ និងគណៈកម្មាធិការនាយក នៃគណបក្សសង្គ្រោះជាតិ១១៧នាក់ ព្រមទាំងទីប្រឹក្សា ដោយម្នាក់ៗត្រូវផ្អាកសកម្មធ្វើនយោបាយ រយៈពេល៥ឆ្នាំ។
មុនពេលប្រកាសសាលដីកានោះ មន្ត្រីតុលាការកំពូលម្នាក់ អះអាងថា តុលាការជាន់ខ្ពស់មួយនេះ នឹងប្រកាសសាលដីកាករណីរំលាយបក្សប្រឆាំង នៅល្ងាច ថ្ងៃទី១៦ វិច្ឆិកា នេះ តែម្ដង បន្ទាប់ពីធ្វើសវនាការមួយថ្ងៃពេញ ដោយមិនរង់ចាំថ្ងៃស្អែកឡើយ។
សារព័ត៌មានក្នុងស្រុក បានស្រង់សម្ដីមន្ត្រីនាំពាក្របស់តុលាការកំពូល លោក អ៊ុក គឹមសិទ្ធិ ថា ការកាត់ទោសរំលាយគណបក្សសង្គ្រោះជាតិ ចេញពីឆាកនយោបាយតាមសំណើក្រសួងមហាផ្ទៃ នឹងត្រូវប្រកាសនៅថ្ងៃទី១៦ វិច្ឆិកា តែម្ដង ដោយមិនរង់ចាំស្អែកទេ។
មន្រ្ដីតុលាការកំពូល បានបន្តថា សវនាការរបស់តុលាការកំពូលនេះ បានចាប់ផ្ដើមដំណើរ តាំងពីម៉ោងជាង៨ព្រឹក ដោយមានចៅក្រម៩រូប ដែលដឹកនាំដោយលោក ឌិត មុន្ទី តំណាងមហាអយ្យការ ១រូប ក្រឡាបញ្ជី ១រូប និងមេធាវីដើមបណ្ដឹង៤រូប។
បើទោះជាសវនាការនេះ ជាសាធារណៈក្ដី ប៉ុន្តែនៅខាងក្រៅរបងតុលាការនេះ សមត្ថកិច្ចបានដាក់កម្លាំងចម្រុះយ៉ាងច្រើន និងរនាំងរាំងផ្លូវស្អេកស្កះ មិនឲ្យចរាចរបានឡើយ។ ចំណែកនៅក្នុងសវនាការ មិនបានអនុញ្ញាតឲ្យថតសំឡេង ឬរូបភាព គឺគ្រាន់តែអាចកត់ត្រាបាន។
ព្រឹត្តិការណ៍នេះហាក់បីដូចជាចម្លែកមួយ គឺថាស្របពេលតុលាការកំពូលកំពុងដំណើរការក្តីសំណុំរឿងរំលាយគណបក្សសង្រ្គោះជាតិ គេឃើញព្រះមហាក្សត្រ ព្រះករុណា សម្តេចព្រះបរមនាថ សីហមុនី ព្រះអង្គបានយាងទៅសោយក្រយាថ្ងៃត្រង់ នៅក្នុងភោជនីយដ្ឋានមួយ ឈ្មោះមាលា ដែលមានទីតាំងនៅចំពីក្រោយតុលាការកំពូល។
ទោះជាយ៉ាងណាលោក អ៊ុំ ដារ៉ាវុធ ទីប្រឹក្សាព្រះរាជលេខាធិការដ្ឋាន ព្រះមហាក្សត្រត្រី នរោត្តម មុនីនាថ សីហនុ មានប្រសាសន៍ថា ព្រះមហាក្សត្រមានកម្មវិធីពិសេសដែលត្រូវយាងទៅសោយក្រយានៅទីនោះ។
អ្នកនំាពាក្យគណបក្សប្រជាជនកម្ពុជា លោក សុខ ឥសាន បានអះអាងថា សម្រាប់ដំណើរការរឿងក្តីរំលាយគណបក្សប្រឆាំង នៅព្រឹកថ្ងៃទី១៦ ខែវិច្ឆិកា ឆ្នាំ២០១៧ មានភាពល្អប្រសើរ ទោះបីជាមន្ត្រីជាន់ខ្ពស់គណបក្សប្រឆាំងនេះ បានអំពាវនាវឲ្យសកម្មជន ប្រមូលផ្តុំនៅមុខតុលាការកំពូលក្តី ប៉ុន្តែមិនមានបញ្ហាអ្វីកើតឡើង គួរឲ្យកត់សម្គាល់នោះទេ ។
លោក សុខ ឥសាន បានឲ្យដឹងនៅថ្ងៃទី១៦ វិច្ឆិកា ថា ស្របពេលតុលាការកំពូល កំពុងដំណើររឿងក្តីរំលាយគណបក្សប្រឆាំង តែបរិយាកាសក្នុងពេលតុលាការ ដំណើរការជាធម្មតា មានលក្ខណៈល្អប្រសើរ ស្ងប់ស្ងាត់ មានសន្តិសុខសុវត្ថិភាពល្អ គ្មានបញ្ហាអ្វីគួរកត់សម្គាល់ឡើយ ។
លោកសុខ ឥសាន បញ្ជាក់ថា “សភាពការណ៍ពិតនេះ វាផ្ទុយស្រឡះពីការនិយាយ បំភិតបំភ័យពីមជ្ឈដ្ឋានអគតិមួយចំនួន” ។
លោកថា ទោះបីមានការអំពាវនាវ ឲ្យប្រុងប្រយ័ត្នក៏ដោយ ក៏នៅតែមានការស្ងប់ស្ងាត់ល្អ ជីវភាពសង្គមនៅតែរស់រវើក និងមមាញឹកជាធម្មតា មានប្រក្រតីភាព អត់មានការព្រួយបារម្ភភ័យខ្លាចអ្វីឡើយ ។
ទាក់ទិននឹងស្ថានការណ៍នេះ អ្នកនំាពាក្យបក្សកាន់អំណាច បានគូសបញ្ជាក់យ៉ាងដូច្នេះថា “នេះបង្ហាញថា ប្រជាពលរដ្ឋមាន ការយល់ដឹងច្បាស់ពីអត្ថន័យ នៃសន្តិភាព ស្ថិរភាពនយោបាយ និងសុខសុវត្ថិភាពសង្គម ក្រោមការដឹកនាំថែរក្សា របស់រាជរដ្ឋាភិបាលកម្ពុជា មានការជឿទុកចិត្ត មិនជឿការញុុះញ៉ង់ បំភិតបំភ័យទាល់សោះឡើយ”។
លោក សុខ ឥសានថា ចាប់ពីពេលនេះតទៅ មិនបាច់ឃោសនាអូសទាញ ប្រជាជនកម្ពុជាយ៉ាងណាទេ ប្រជាជនកម្ពុជា នៅតែរឹងមាំដាច់ខាត មិនលុះដោយការអូសទាញ ណាមួយឡើយ ។ ប្រជាជនមិនមែនយកខ្លួន ទៅពាំងតវ៉ាជំនួសក្រុមមេបក្សប្រឆាំង ដែលកម្សាករត់ចោលស្រុកនោះទេ។
https://4.bp.blogspot.com/-0YLP1ZqaviQ/Wg1pQx80ExI/AAAAAAAAFQs/MD3-4vfCvyM9xlc-hu_QaHSIucS4FqFPACLcBGAs/s1600/23517748_2052523484977955_5260618690836902785_n.jpg
មុនពេល និងស្របពេល តុលាការកំពូលកំពុងបើកសវនការ លើសំណុំរឿង រំលាយគណបក្សសង្រ្គោះជាតិនោះ អាជ្ញាធរាជធានីភ្នំពេញ បានដាក់ពង្រាយកម្លាំងសមត្ថកិច្ចចម្រុះ នៅគ្រប់ច្រកផ្លូវចូលមកកាន់រាជធានីភ្នំពេញ ស្ទើរតែទាំងស្រុង ចាប់តាំងពីព្រឹកព្រលឹម ថ្ងៃទី១៦ ខែវិច្ឆិកា។ លើសពីនេះ នៅជុំវិញបរិវេណតុលាការកំពូល ក្នុងរង្វង់ជាង៥០០ម៉ែត្រ អ្នកដែលគ្មានភារកិច្ ចមិនត្រូវបានអនុញ្ញាតឲ្យចូលជាដាច់ខាត។ នេះជាវិធានការ ដើម្បីទប់ស្កាត់នូវការជួបជុំតវ៉ារបស់ក្រុមអ្នកគាំទ្រគណបក្សសង្រ្គោះជាតិ ប្រឆាំងនឹងសវនាការរំលាយគណបក្សសង្រ្គោះជាតិ។
មិនមានការជួបជុំណាមួយកើតឡើង នៅថ្ងៃដែលតុលាការកំពូលបានបើកសវនាការរំលាយគណបក្សសង្រ្គោះជាតិ នៅថ្ងៃទី១៦ វិច្ឆិកា នេះទេ។ មិនថា នៅមុខតុលាការកំពូល ដែលស្ថិតនៅក្បែរព្រះបរមរាជវាំង ឬ នៅទីស្នាក់ការកណ្តាលគណបក្សសង្រ្គោះជាតិ ដែលស្ថិតនៅសង្កាត់ចាក់អង្រែលើ ក្រុងភ្នំពេញ គឺមិនឃើញមានការជួបជុំពីសំណាក់អ្នកគាំទ្រគណបក្សសង្រ្គោះជាតិ ដូចការព្រួយបារម្ភរបស់អាជ្ញាធរនោះទេ។
បើតាមសេចក្តីរាយការណ៍ នៅឯទីស្នាក់ការគណបក្សសង្រ្គោះជាតិ គឺមិនមានតំណាងរាស្រ្ត ឬមន្រ្តីជាន់ខ្ពស់គណបក្សណាម្នាក់ បានស្ថិតនៅក្នុងទីស្នាក់ការគណបក្សសង្រ្គោះជាតិឡើយ។ ពោលគឺ គេឃើញមានតែសន្តិសុខពីរបីនាក់ដែលយាមប្រចាំនៅទីស្នាក់ការដែលស្ងាត់ជ្រងំ និងក្រុមអ្នកសារព័ត៌មានពីរបីនាក់ ដែលរង់ចាំតាមដានយកព័ត៌មាន នៅឯទីស្នាក់ការគណបក្សនេះតែប៉ុណ្ណោះ។
គួរជម្រាបជូនថា សន្តិសុខត្រូវបានរឹតបន្តឹងយ៉ាងណែន នៅថ្ងៃទី ១៦ វិច្ឆិកា ជាថ្ងៃដែលតុលាការកំពូលបើកសវនការរំលាយគណបក្សសង្រ្គោះជាតិ តាមបណ្តឹងក្រសួងមហាផ្ទៃ កាលពីថ្ងៃទី ០៦ តុលា។ នៅតាមច្រកផ្លូវសំខាន់ៗ ចូលមកកាន់រាជធានីភ្នំពេញ ត្រូវបានអាជ្ញាធរបានដាក់បារាស់ តាំងពីព្រឹកព្រលឹមស្រាងៗ ដើម្បីត្រួតពិនិត្យទៅលើរថយន្ត និងអ្នកធ្វើដំណើរមកពីបណ្តាខេត្តនានា៕