ខេត្តសៀមរាប៖ អាជ្ញាធរខេត្តសៀមរាប កាលពីរសៀល ថ្ងៃទី៩ ខែវិច្ឆិកា ឆ្នាំ២០១៧ ម្សិលមិញនេះ បានរៀបចំពិធីទទួលស្វាគមន៍ និងអាហារសាមគ្គីមួយជូនចំពោះគណៈប្រតិភូបវរកញ្ញាពិភពលោក ឆ្នាំ២០១៧ ដែលអញ្ជើញមកទស្សនកិច្ច និងឈ្វេងយល់ពីសក្តានុពលលើទេសចរណ៍វប្បធម៌ ធម្មជាតិ នៅលើទឹកដីប្រវត្តិសាស្ត្រខេត្តសៀមរាប។
ពិធិនេះបានធ្វើឡើង នៅក្នុងសណ្ឋាគារសុខា សៀមរាប ក្រោមវត្តមានរបស់លោក ឃឹម ប៊ុនសុង អភិបាលខេត្តសៀមរាប លោក នូ ផល្លា ប្រធានក្រុមប្រឹក្សាខេត្ត និងលោកស្រី រួមទាំង លោក លោកស្រី សមាជិកក្រុមប្រឹក្សាខេត្ត អស់លោក លោកស្រី ជាថ្នាក់ដឹកនាំមន្ទីរ អង្គភាព តំណាងក្រុមហ៊ុនស្រាបៀរហ្គេនបឺត និងអាជីវកររបស់ស្រាបៀរហ្គេនបឺតជាច្រើនរូបទៀត។
នៅក្នុងឱកាសនោះដែរ លោក Brune តំណាងក្រុមហ៊ុនស្រាបៀរហ្គេនបឺត និងកញ្ញា Angela Bonila ជាម្ចាស់មកុដបវរកញ្ញាពិភពលោកឆ្នាំ២០១៦ និងបវរកញ្ញាពិភពលោក ឆ្នាំ២០១៧ ក៏បានលើកឡើងពីភាពអស្ចារ្យ នៃព្រះរាជាណាចក្រកម្ពុជា សម្បូរទៅដោយតំបន់ទេសចរណ៍វប្បធម៌ និងធម្មជាតិ ដែលជាមន្តស្នេហ៍ក្នុងការទាក់ទាញភ្ញៀវទេសចរ ឲ្យចូលមកទស្សនាកម្សាន្ត នៅក្នុងទឹកដីដ៏ពិសិដ្ឋនេះ។
ជាមួយគ្នានេះ លោក ឃឹម ប៊ុនសុង អភិបាលខេត្តសៀមរាប ក៏បានស្វាគមន៍ចំពោះគណៈប្រតិភូបវរកញ្ញាឯកពិភពលោកឆ្នាំ២០១៧ ដែលបានអញ្ជើញមកធ្វើទស្សនកិច្ច នៅក្នុងទឹកដីខេត្តសៀមរាប ដើម្បីឈ្វេងយល់ពីសក្តានុពលទេសចរណ៍វប្បធម៌ និងធម្មជាតិ ដ៏សម្បូរបែប នៅក្នុងទឹកដីអង្គរនេះ។ ក្រៅពីនេះ លោកក៏បានបញ្ជាក់ថា ខេត្តសៀមរាប នាពេលបច្ចុប្បន្ននេះមានសន្តិសុខសណ្តាប់ធ្នាប់ បរិស្ថាន និងអនាម័យល្អ ហើយជីវភាពរស់នៅរបស់ប្រជាពលរដ្ឋ នៅក្នុងខេត្តសៀមរាប បានពឹងផ្អែកលើវិស័យកសិកម្ម និងទេសចរណ៍។
លោកអភិបាលខេត្ត បានជម្រាបជូនគណៈប្រតិភូបវរកញ្ញាពិភពលោកថា ខេត្តសៀមរាប គឺជាអតីតរាជធានី នៃអធិរាជអាណាចក្រខ្មែរ សម័យអង្គរ នាសតវត្សទី៩ ដល់ទី១៤ ហើយក៏ជាទីក្រុងដ៏ប្រណិត ដែលផ្នែកវប្បធម៌ប្រវត្តិសាស្ត្រមួយ នៅតំបន់អាស៊ី។ នៅក្នុងខេត្តនេះសម្បូរទៅដោយកេរមរតកវប្បធម៌ ដែលជាស្នាដៃ នៃបុព្វបុរសជំនាន់ដើម បានបន្សល់ទុកមក ហើយក្លាយជាកំណប់ទ្រព្យដ៏មហាសាល ទាំងវិស័យទេសចរណ៍វប្បធម៌ និងធម្មជាតិ៕