ខេត្តកណ្តាល៖ សមត្ថកិច្ចនគរបាលខេត្តកណ្ដាល បានចេញប្រតិបត្តិការបង្ក្រាបទីតាំងស្ដុកឈើប្រណីតមួយកន្លែង នៅក្នុងក្រុងតាខ្មៅ ដោយឡោមព័ទ្ធ តាំងពីល្ងាចថ្ងៃទី៩ រហូតដល់ព្រឹកព្រឹក ថ្ងៃសុក្រ ទី១០ ខែវិចិ្ឆកានេះ ក៏មិនទាន់បញ្ចប់ប្រតិបត្តិការនេះនៅឡើយ។
លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានបានឲ្យដឹងថា សមត្ថកិច្ចរបស់លោកពិតជាបានបង្ក្រាបឈើគ្រញូងប្រាដមែន។ ស្របគ្នានេះដែរ មន្ត្រីតុលាការខេត្តកណ្ដាល ក៏បានថ្លែងស្រដៀងគ្នានឹងលោកស្នងការថា ប្រតិបត្តិការឡោមព័ទ្ធឃ្លាំងស្តុកឈើនេះ មិនទាន់បញ្ចប់នៅឡើយទេ ហើយនីតិវិធីនេះអាចនឹងឈានដល់ថ្ងៃស្អែក។
លោក ទិន សុចិត្រា ព្រះរាជអាជ្ញារងអមសាលាដំបូងខេត្តកណ្តាល បានប្រាប់ក្រុមអ្នកសារព័ត៌មានថា ក្រោយពីបានតាមដានរថយន្តឈើដឹកឈើ តាំងពីម៉ោង៥ល្ងាច ថ្ងៃទី៩ ខែវិចិ្ឆកា រួចមក ទើបសមត្ថកិច្ចឈានដល់ការឡោមព័ទ្ធ និងឆែកឆេរឃ្លាំងស្តុកឈើ នៅក្រុងតាខ្មៅ ខណៈឈ្មួញដឹកឈើ តាមរថយន្តយកមកស្តុកនៅទីនោះ។
លោក ទិន សុចិត្រា បានបន្តថា ក្រោយពីទទួលព័ត៌មានបែបនេះភ្លាម លោក និងលោក ឯក ស៊ុនរស្មី ព្រះរាជអាជ្ញារងខេត្តកណ្តាល ក៏បានដឹកនាំសមត្ថកិច្ចនគរបាលខេត្តកណ្តាល និងមន្ត្រីរដ្ឋបាលព្រៃឈើ ចុះតាមដាន និងប្រដេញតាមរថយន្តដឹកឈើភ្លាមៗ រហូតឈានដល់ឡោមព័ទ្ធពេញមួយយប់ ហើយក៏នៅតែមិនទាន់ចប់ប្រតិបត្តិការនេះនៅឡើយ។
ទោះជាយ៉ាងណា បើតាមមន្រ្ដីនគរបាលខេត្តកណ្ដាល បានឲ្យដឹងថា នៅក្នុងប្រតិបត្តិការយប់មិញនេះ សមត្ថកិច្ចឆែកឆេរឃ្លាំង ស្តុករកឃើញឈើគ្រញូងជាច្រើន និងឃាត់ខ្លួនជនពាក់ព័ន្ធចំនួន១៧នាក់ ក្នុងនោះមានជនជាតិវៀតណាម៣នាក់ផងដែរ៕