កាលពីពេលថ្មីៗនេះ សារព័ត៌មាន Shanghaiiest បានចុះផ្សាយថា មានស្ត្រីម្នាក់ បានបើករថយន្តរបស់ខ្លួន បញ្ច្រាស់ទិសដៅចរាចរ ដោយបើកក្នុងល្បឿនយ៉ាងលឿន នៅលើផ្លូវហាយវ៉េ ធ្វើឲ្យអ្នកបើកបរលើផ្លូវនោះ មានការតក់ស្លុត និងភ្ញាក់ផ្អើលយ៉ាងខ្លាំង ហើយបានបន្ថយល្បឿនគ្រប់គ្នា តែទោះជាយ៉ាងណា ស្ត្រីរូបនោះត្រូវបានប៉ូលិស ដេញតាមឃាត់រថយន្តរបស់នាង ភ្លាមៗផងដែរ ។
មន្ត្រីប៉ូលិស បានឃាត់ខ្លួននារីខាងលើ ហើយនាំខ្លួនទៅកាន់ប៉ុស្តិ៍ ដើម្បីធ្វើការសួរនាំពីហេតុផល ដែលធ្វើឲ្យនាងបើករថយន្ត បញ្ច្រាស់ទិសដៅចរាចរ ក្នុងផ្លូវហាយវ៉េ ហើយនាងបានឆ្លើយប្រាប់ប៉ូលិសថា នាងបានបើករថយន្ត តាមប្រព័ន្ធ GPS ហើយនាងបានបើកបរ ដោយប្រុងប្រយ័ត្នបំផុត ។
ប៉ូលិសបានសួរនាំនាងបន្តថា តើនាងបើកបញ្ច្រាស់ទិសនេះ ប៉ុន្មានគីឡូម៉ែត្រហើយ? នាងបានឆ្លើយវិញថា បើកបានជាង១០គីឡូម៉ែត្រហើយ ហើយពេលដែលប៉ូលិសពិនិត្យមើល កាម៉េរ៉ាសុវត្ថិភាព CCTV គឺពិតដូចជាអ្វី ដែលនាងបានប្រាប់មែន ។
ចុងក្រោយនាងត្រូវបានប៉ូលិស ពិន័យដកពិន្ទុចំពោះប័ណ្ណបើកបរ របស់នាង ព្រមទាំងពិន័យទឹកប្រាក់ ៣៥ដុល្លារផងដែរ ៕
