ប្រទេសថៃ៖ រថយន្តមួយគ្រឿង បានបើកដឹកពលករខ្មែរ និងជនជាតិថៃ មានប្រុសស្រីចាស់ក្មេង បោះពួយយ៉ាងលឿន ជ្រុលចង្កូតទៅបុកបង្គោលភ្លើង និងរបងផ្ទះប្រជាពលរដ្ឋថៃ បណ្ដាលឲ្យទារកម្នាក់ទើបនឹងកើតបាន១អាទិត្យស្លាប់ និងជាង២០នាក់ផ្សេងទៀតរងរបួស កាលពីព្រលប់ ថ្ងៃទី១៥ ខែតុលា ឆ្នាំ២០១៧ នៅលើកំណាត់ផ្លូវពេជ្រក្សេម ត្រង់ចន្លោះបង្គោលគីឡូម៉ែត្រលេខ២៧៩ -២៨០ ស្ថិតក្នុងឃុំកុយបុរី ស្រុកកុយបុរី ខេត្តប្រាក់ជួប។
ប្រភពព័តមានពីប្រទេសថៃ បានឲ្យដឹងថា មុនពេលកើតមានគ្រោះថ្នាក់ចរាចរណ៍នោះ គេឃើញរថយន្តមួយគ្រឿង ម៉ាកតូយ៉ូតា ពាក់ស្លាកលេខ ១៤២០ ដឹកពលករខ្មែរ និងថៃចំនួន២២នាក់ ក្នុងនោះមានមនុស្សធំចំនួន១៧នាក់ និងក្មេង៥នាក់ ក្នុងមានទារកម្នាក់ទើបនឹងមានអាយុ ៧ថ្ងៃប៉ុណ្ណោះ ។ លុះពេលរថយន្តបើកមកដល់ចំណុចកើតហេតុ ក៏រេចង្កូតទៅបុកបង្គោលភ្លើងបាក់អស់មួយដើម ហើយជ្រុលទៅបុកនឹងរបងថ្មផ្ទះរបស់ប្រជាពលរដ្ឋថៃ ធ្លាយចេញក្បាលរថយន្តទៅបុកជាប់នឹងដើមឈើមួយដើមទៀត ដែលនៅខាងក្នុងរបង។ បន្ទាប់ពីជួបនឹងគ្រោះថ្នាក់ចរាចរណ៍ភ្លាម គេឃើញអ្នកបើកបរខំប្រឹងព្យាយាមលូនចេញពីរថយន្ត ដោយមានស្នាមបែកក្បាលយ៉ាងធ្ងន់។
ប្រភពព័ត៌មានដដែល បានបន្តថា អ្នកបើកបររថយន្តខាងលើ ឈ្មោះ ស រ៉េះសឺនិ ភេទប្រុស អាយុ៤៧ឆ្នាំ ហើយស្ត្រីជនជាតិខ្មែរ និងមនុស្សដទៃទៀត មិនទាន់ស្គាល់ពីអត្តសញ្ញាណនោះទេ។ ប៉ុន្តែភ្លាមៗនោះ ក្រុមសង្រ្គោះបន្ទាន់ បានមកដឹកជនរងគ្រោះបញ្ជូនទៅសង្រ្គោះ នៅក្នុងមន្ទីរពេទ្យកុយបុរី។
មន្ត្រីនគរបាលថៃ បានឲ្យដឹងដែរថា ក្រោយពេលកើតហេតុ សមត្ថកិច្ចថៃបានសាកសួរទៅលើព្រូរថយន្តម្នាក់ ឈ្មោះ យ៉ារ៉ូហ្សា ភេទប្រុស អាយុ៤៦ឆ្នាំ អំពីករណីនេះ តែត្រូវបុរសរូបនោះនិយាយថា រថយន្តនេះគឺដឹកពលករខ្មែរចេញពីកន្លែងត្រួតពិនិត្យជនអន្តោប្រវេសន៍ ក្នុងខេត្តនរ៉ាធីវ៉ាត ដើម្បីនាំជនជាតិខ្មែរទាំង១៩នាក់ទៅកាន់ច្រកអន្តរជាតិ ក្នុងខេត្តស្រះកែវ ហើយខ្លួនក៏បានប្តូរដៃឲ្យអ្នកបើកបរខាងលើ កាន់ចង្កូតម្តង ដោយចាប់ពីខេត្តឈុំផន មកម្ល៉េះ ហើយខ្លួនក៏បានដេកលក់ចាប់ពីពេលនោះមក លុះភ្ញាក់ឡើងវិញ គឺចំពេលរថយន្តបុកនឹងបង្គោលភ្លើងតែម្តង ដូច្នេះខ្លួនមិនបានដឹងអំពីមូលហេតុអ្វីទាំងអស់។
ដោយឡែកក្រុមតម្រួតថៃ ក៏មិនអាចសួរនាំអ្នកបើកបរបានឡើយ ដោយសារតែពេលនេះអ្នកបើកបរកំពុងស្ថិតក្នុងស្ថានភាពសង្គ្រោះបន្ទាន់ ដោយសារបែកក្បាល ដូច្នេះមានតែរង់ចាំក្រោយពេលក្រុមគ្រូពេទ្យសង្គ្រោះសិន៕
