ខេត្តឧត្តរមានជ័យ៖ បុគ្គលិកមីក្រូហិរញ្ញវត្ថុ២នាក់ជាប់ពាក់ព័ន្ធនឹងករណីលួចលុយ ក៏ត្រូវសមត្ថកិច្ចឃាត់ខ្លួន កាលពីវេលាម៉ោង១១ព្រឹក ថ្ងៃទី១២ ខែតុលា ឆ្នាំ២០១៧ នៅក្នុងស្រុកត្រពាំងប្រាសាទ។
មន្ត្រីនគរបាលស្រុកត្រពាំងប្រាសាទ បានឲ្យដឹងថា ជនសង័្សយដែលសមត្ថកិច្ចឃាត់ខ្លួន ទី១-ឈ្មោះ ម៉ាន់ ស៊ីម៉េង ភេទប្រុស អាយុ២៨ឆ្នាំ រស់នៅភូមិថ្នល់កែង ឃុំអន្លង់វែង មុខរបរជាបុគ្គលិកមីក្រូហិរញវត្ថុLOLC ជាប់ចោទពីបទលួចលុយខ្មែរចំនួន១ ៣៥១ ៥០០រៀល និងប្រាក់អាមេរិកចំនួន៣ ៥១១ដុល្លារ និងទី២-ឈ្មោះ ផាត់ សុផាច ភេទប្រុស អាយុ២៧ឆ្នាំ រស់នៅភូមិគោកគូ សង្កាត់ក្រុងសំរោង ជាបុគ្គលិកមីក្រូហិរញវត្ថុ ជាប់ចោទពីបទលួចលុយចំនួន១៥ ៩៦៤ ១០០ រៀល និងប្រាក់អាមេរិក ចំនួន៣ ៨៣៦ដុល្លារ។ រីឯជនរងគ្រោះជាដើមបណ្ដឹង ឈ្មោះ ម៉ៅ បូរ៉េត ភេទប្រុស អាយុ៣៦ឆ្នាំ មានតួនាទីជានាយកសាខាមីក្រូហិរញវត្ថុ LoLc ប្រចាំស្រុកអន្លង់វែង និងស្រុកត្រពាំងប្រាសាទ
មន្ត្រីនគរបាលដដែល បានបន្តថា មុនពេលឃាត់ខ្លួន នាយកសាខាមីក្រូហិរញ្ញវត្ថុខាងលើ បានប្ដឹងបុគ្គលិកខ្លួនទាំង២នាក់ ពីបទរំលោកលើទំនុកចិត្ត (លួចលុយពីក្រុមហ៊ុនមីក្រូហិរញ្ញវត្ថុរបស់ខ្លួន ប្រាក់ខ្មែរ ចំនួន ១៧ ៣១៥ ៦០០រៀល និង ប្រាក់ដុល្លារ ចំនួន៧ ៣៤៧ដុល្លារ កាលពីថ្ងៃទី៣១ ខែកក្កដា ឆ្នាំ២០១៧)។ បន្ទាប់ពីមានពាក្យបណ្ដឹងបែបនេះ សមត្ថកិច្ចក៏បានចុះទៅឃាត់ខ្លួនតែម្ដង។
ក្រោយពេលឃាត់ខ្លួន សមត្ថកិច្ចបាននាំជនសង័្សយទាំង២នាក់ ទៅកាន់អធិការដ្ឋាននគរបាលស្រុក ដើម្បីសាកសួរ និងចាត់ការតាមនីតិវិធី៕