ខេត្តកំពង់ស្ពឺ៖ ស្រ្ដី២នាក់បានរងរបួសធ្ងន់ ដោយសាររថយន្តបើកលឿនបុកម៉ូតូ កាលពីថៃ្ងទី៦ ខែតុលា ឆ្នាំ២០១៧ នៅលើផ្លូវក្រាលក្រួសក្រហម ស្ថិតក្នុងភូមិអង្គក្រសាំង ឃុំជង្រុក ស្រុកគងពិសី។
មន្ត្រីនគរលបាលចរាចរស្រុកគងពិសី បានឲ្យដឹងថា ម៉ូតូរងគ្រោះ ម៉ាកហុងដាគុបជ្រុង សេ៥០ ពណ៌ទឹិកសមុទ្រ គ្មានលេខ បើកបរដោយឈ្មោះ ចែ មួយ ភេទស្រី អាយុ៣៧ឆ្នាំ និងអ្នករួមដំណើរម្នាក់ ឈ្មោះ រឿន ស្រីអូន ភេទស្រី អាយុ ២៥ឆ្នាំ។ ពួកនាងទាំអ២នាក់រស់នៅភូមិជាមួយគ្នា (មិនពាក់មួកសុវត្ថិភាពទាំង២នាក់) ក្នងស្រុកគងពិសី។
ប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាកឡិចស៊ី RX330 ពណ៌មាស ពាក់ស្លាកលេខ ស្លាកលេខភ្នំពេញ 2AL-6678 បោះពួយយ៉ាងលឿន តាមបណ្ដោយផ្លូវក្រាលក្រួស ចេញពីផ្សារស្រង់ ឆ្ពោះទៅកាន់ផ្សារត្រាំខ្នារ។ លុះពេលរថយន្តបើកមកដល់ចំណុចកើតហេតុ ក៏ជ្រុលចង្កូតទៅបុកម៉ូតូពេញទំហឹង បណ្ដាលឲ្យអ្នកជិះម៉ូតូទាំង២នាករងរបួសធ្ងន់។ រីឯម៉ូតូបានរងនូវការខូចខាតយ៉ាងដំណំ និងរថយន្តខូចខាតផ្នែកខាងមុខ។
ក្រោយពេលកើតហេតុ សមត្ថកិច្ចបានចុះទៅពិនិត្យ និងបញ្ជូនអ្នករងរបួសទាំង២នាក់ទៅសង្រ្គោះ នៅក្នុងមន្ទីរពេទ្យ។ ដោយឡែករថយន្ត និងម៉ូតូ ត្រូវសមត្ថកិច្ចវាស់វែង និងយកទៅរក្សាទុក នៅក្នុងអធិការដ្ឋាននគរបាលស្រុកគងពិសី ដើម្បីកសាងសំណុំរឿងចាត់ការតាមនីតិវិធី ៕
