សិល្បៈ៖ អ្នកសិល្បៈមួយចំនួនសុខចិត្តបោះបង់ការសិក្សា ឬការងារដែលខ្លួន ដើម្បីចូលប្រឡូកសិល្បៈ ហើយក្នុងចំណោមអ្នកទាំងនោះក៏មានអ្នកជោគជ័យ និងអ្នកបរាជ័យ ដូចជាលោក ផេង សុភារឿន ហៅ លិកាង ព្រោះតែចង់ក្លាយជាតារាចម្រៀងលោកបានជម្រុះចោលអាជីពជាគ្រូបង្រៀនភាសាចិនរត់មកចាប់អាជីពសិល្បៈ ដែលកំពុងទទួលបានពន្លឺជោគជ័យខ្លះៗហើយ។ ប៉ុន្តែមុននឹងការងារសិល្បៈទទួលបានលទ្ធផលប៉ុននេះលោកបានឆ្លង់កាត់ការលំបាកជាច្រើន ។
លោក ផេង សុភារឿន រៀបរាប់ពីដំណើរខ្សែជីវិតថា លោកធ្លាប់ធ្វើជាគ្រូបង្រៀនភាសាចិនមានរយៈពេលបួនឆ្នាំមកហើយ ប៉ុន្តែថ្មីៗនេះលោកក៏បានបោះបង់អាជីពគ្រូបង្រៀនចោល ងាកមកស្រវាចាប់អាជីពសិល្បៈ ជាតារាចម្រៀងនៅក្នុងផលិតកម្ម សាស្តា ក្រោយពីលោកបានជាប់ក្នុងការធ្វើតេស្តសំឡេង និងបានធ្វើកុងត្រារយៈពេល៥ឆ្នាំតែម្ដង។
តារាថ្មីរូបនេះបន្តថា មកដល់ពេលនេះលោកបានចេញបទចម្រៀងជាAusio មានចំនួន៦បទមកហើយ មានដូចជាបទ “ឱបជាប់ទ្រូងហើយនៅតែគេឆក់បាត់ ឈឺចាប់ដល់ស្លាប់ជារឿងរបស់បង គ្មានអូនបេះដូងបងស្រាប់តែឈប់លោត នៅស្រលាញ់អូនដូចថ្ងៃមុន ព្រមធ្វើជាមនុស្សខូចចិត្តកំដរ ក្ដីសុខរបស់អូន និងបទ ស្រលាញ់បងប៉ុន្មានថ្ងៃទៀត? “។
លោក លិកាង បន្តថា បទទាំងអស់នេះក៏បានថតជាMVមួយចំនួនហើយដែរ រង់ចាំតែថ្ងៃចេញលក់ទេ។ តារារូបនេះបញ្ជាក់ថា ការបោះបង់អាជីពជាគ្រូបង្រៀនមកស្រវាអាជីពចម្រៀងជាជម្រើសរបស់លោក ដូច្នេះហើយលោកត្រូវតែខិតខំពង្រឹងការច្រៀង ដើម្បីទទួលបានការគាំទ្រពីសំណាក់ទស្សនិកជន ហើយពេលនេះអាជីពចម្រៀងលោកក៏អាចនិយាយបានថាជោគជ័យមួយកម្រិតហើយ ព្រោះមានផលិតកម្មគេហៅកុងត្រា ៕ សហការី KBN