ខេត្តកំពត៖ ក្មេងប្រុសអាយុ៣ឆ្នាំម្នាក់ ត្រូវឪពុកម្តាយផ្ញើទុកឲ្យរស់នៅជាមួយនឹងអ៊ុំបង្កើត ហើយចេញទៅធ្វើការនៅប្រទេសថៃបាត់អស់ ក៏ត្រូវជនដៃដល់លួចធ្វើឃាត បង្កឲ្យភ្ញាក់ផ្អើលឡើង កាលពីថ្ងៃទី៣០ ខែសីហា ឆ្នាំ២០១៧ ស្ថិតក្នុងភូមិត្រពាំងថ្លាន់ ឃុំប្រភ្នំ ស្រុកអង្គរជ័យ ខេត្តកំពត។
មន្ត្រីនគរបាលស្រុកអង្គរជ័យ បានឲ្យដឹងថា កុមារារងគ្រោះ ឈ្មោះ ថេត ទិច អាយុ ៣ឆ្នាំ និងបងប្រុសរបស់គេ រស់នៅជាមួយអ៊ំស្រីបង្កើត ឈ្មោះ អេត សាវន អាយុ ៤០ឆ្នាំ និងប្តី ឈ្មោះ ត្រក រ៉ា រស់នៅភូមិកើតហេតុខាងលើ។ រីឯឪពុកម្តាយរបស់ពួកគេ បានចេញទៅធ្វើការងារ នៅក្នុងប្រទេសថៃ។
បើតាមសម្ដីបងប្រុសរបស់កុមារារងគ្រោះ ឈ្មោះ ថេត វណ្ណៈ អាយុ ៩ឆ្នាំ បានឲ្យដឹងថា កាលពីព្រឹក(មិនចាំម៉ោង) ថ្ងៃទី៣០ ខែសីហា ឆ្នាំ២០១៧ គេបានឃើញអ៊ំថ្លៃ ឈ្មោះ ត្រក រ៉ា ច្របាច់កប្អូនរបស់ខ្លួន រួចបីឡើងទៅលើផ្ទះ។ បន្ទាប់មករូបគេបានឮសូរប្អូនរបស់ខ្លួនស្រែកយំ តែពេលនោះ រូបគេមិនចាប់អារម្មណ៍ ក៏ដើរលេងបាត់ទៅ លុះក្រោយមកទើបគេដឹងថា ប្អូនស្លាប់។ ចំណែកឯអ៊ំប្រុស ឈ្មោះ ត្រក រ៉ា (អ៊ំថ្លៃ) ក៏បានដើរចេញពីផ្ទះបាត់ តាំងពីម៉ោងប្រហែលជាង ១០ព្រឹក នៅថ្ងៃដដែលនោះ និងបិទទូរសព្ទ័ ដោយមិនអាចទាក់ទងបានទៀតផង។
ក្រោយពេលកើតហេតុ សមត្ថកិច្ចបានចុះទៅពិនិត្យ និងធ្វើកោសល្យវិច័យលើសាកសព រួចហើយសន្និដ្ឋានថា ក្មេងប្រុសរងគ្រោះពិតជាត្រូវជនដៃដល់សម្លាប់ប្រាកដមែន។ ករណីនេះ គឺគេដាក់ការសង័្សយទៅលើអ៊ំសាច់ថ្លៃរបស់ជនរងគ្រោះ ហើយនៅពេលនេះ សមត្ថកិច្ចកំពុងស្រាវជ្រាវចាប់ខ្លួនជនសង័្សយ នាំមកសាកសួរ និងចាត់ការតាមច្បាប់៕ សហការី KBN
