ខេត្តត្បូងឃ្មុំ៖ ជនសង្ស័យម្នាក់បានលួចគាស់ផ្ទះប្រជាពលរដ្ឋលួចលុយបានជិត៩លានរៀល ក៏ត្រូវម្ចាស់ឆែកកាមេរ៉ាសុវត្ថិភាព ស្គាល់ពីអត្តសញ្ញាណរបស់ជននោះ ក៏ប្ដឹងទៅសមត្ថកិច្ចឲ្យចុះទៅឃាត់ខ្លួននាំមកចាត់ការតាមច្បាប់។ ហេតុការណ៍គាស់ផ្ទះនេះបានកើតឡើង កាលពីវេលាម៉ោង២ និង២នាទីរំលងអធ្រាត្រ ឈានចូលថ្ងៃទី២២ ខែសីហា ឆ្នាំ២០១៧ ស្ថិតក្នុងភូមិជ្រួយ សង្កាត់វិហារលួង ក្រុងសួង ខេត្តត្បូងឃ្មុំ។
លោកវរសេនីយ៍ ឈន សុធន អធិការនគរបាលក្រុងសួង បានឲ្យដឹងថា ជនរងគ្រោះ ឈ្មោះ ហេង សុខឃន់ ភេទស្រី អាយុ៤១ឆ្នាំ មានលំនៅក្នុងភូមិ-ឃុំកើតហេតុខាងលើ។ រីឯជនសង្ស័យ ឈ្មោះ ម៉ា រ៉េន ភេទប្រុស អាយុ៥១ឆ្នាំ ជាតិខ្មែរ រស់នៅក្នុងភូមិជីកែ សង្កាត់សួង ក្រុងសួង។ នៅក្នុងអំពើគាស់ផ្ទះនោះ គឺជនសង្ស័យលួចបានប្រាក់ខែ្មរ ៧,៦លានរៀល និងប្រាក់អាមេរិក ២៧០ដុល្លារ។
លោកអធិការនគរបាលក្រុងសួង បានបន្តថា កាលពីព្រលប់ថ្ងៃទី២១ ខែសីហានោះ ជនរងគ្រោះបាននាំគ្នាហូបបាយទឹក រួចហើយក៏ចូលដេកលង់លក់ នៅក្នុងដំណេករៀងៗខ្លួនទៅ។ លុះមកដល់វេលារំលងអធ្រាត្រ ស្រាប់តែជនសង្ស័យបានចូលទៅគាស់ផ្ទះលួចទ្រព្យសម្បត្តិ និងលុយកាក់អស់ជិត ៩លានរៀល រួចគេចខ្លួនបាត់។ បន្ទាប់ពីដឹងថា មានចោរចូលគាស់ផ្ទះលួចលុយរបស់ខ្លួនហើយ ជនរងគ្រោះក៏បានឆែកកាមេរ៉ាមើល រួចហើយប្ដឹងទៅសមត្ថកិច្ច ទើបនគរបាលជំនាញចុះទៅឃាត់ខ្លួន រួមជាមួយនឹងលុយមួយចំនួនទៀត។
ក្រោយពេលឃាត់ខ្លួន សមត្ថកិច្ចបាននាំខ្លួនជនសង្ស័យទៅកាន់អធិការដ្ឋាននគរបាលក្រុងសួង ដើម្បីសាកសួរ និងកសាងសំណុំរឿងបញ្ជូនទៅសាលាដំបូងខេត្តត្បូងឃ្មុំ ចាត់ការបន្តតាមនីតិវិធី៕
សហការី KBN