ភ្នំពេញ៖ ហេតុការណ៍គ្រោះថ្នាក់ចរាចរមួយ បានបណ្តាលឲ្យបុរសម្នាក់ស្លាប់ ដោយសារជិះម៉ូតូជែងរថយន្តមួយគ្រឿង ចូលទៅចំណីផ្លូវម្ខាងទៀត ជ្រុលទៅបុក និងរថយន្តហាយឡែនឌឺ មួយគ្រឿង ដែលកំពុងបើកបញ្ច្រាសទិសគ្នា ចំពីមុខពេញទំហឹង បណ្តាលអោយអ្នកបើកម៉ូតូ ហោះផ្លោងផ្ទុបទៅកញ្ចក់រថយន្ត បោកក្បាលហូរឈាមស្លាប់ ហេតុការណ៍នេះ កើតឡើង នៅវេលាម៉ោង៨យប់ ថ្ងៃទី២៨ ខែកក្កដា ឆ្នាំ២០១៧ ទុលមុខនិងបុរីពិភពថ្មី ផ្លូវជាតិលេខ២ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ ។
បើតាមសេចក្តីរាយការណ៍ បានឲ្យដឹងថា សពជនរងគ្រោះ មានឈ្មោះ មុំ រតនា ភេទប្រុស អាយុ៣០ឆ្នាំ មុខរបរមន្ត្រីអង្គរក្ស ស្នាក់នៅក្នុងបន្ទាយ មានស្រុកកំនើត នៅភូមិជើងកើប ស្រុកកណ្ដាលស្ទឹង ខេត្តកណ្ដាល ។
បើតាមការរៀបរាប់ ពីអ្នកឃើញហេតុការណ៍ នៅកន្លែងកើតហេតុ បានអោយដឹងថា មុនពេលកើតហេតុ គេបានឃើញ ជនរងគ្រោះខាងលើ បានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ កណ្ដាល 1M9910 បានធ្វើដំនើរ តាមផ្លូវជាតិលេខ២ ក្នុងទិសដៅ ពីលិចទៅកើត ក្នុងល្បឿនលឿន ខណៈមកដល់ចំនុចកើតហេតុ អ្នកបើកម៉ូតូ បានបើកវ៉ាជែងរថយន្ត មិនស្គាល់ម៉ាកមួយគ្រឿង ដែលធ្វើដំណើរស្របទិសគ្នា ធ្វើឲ្យម៉ូតូ ចូលទៅចំនីផ្លូវម្ខាងទៀត ជ្រុលទៅបុកនិងរថយន្ត ម៉ាក ហាយឡែនឌឺ ពណ៌ស្ករ ពាក់ស្លាកលេខ ភ្នំពេញ 2AJ 7332 ធ្វើដំនើរតាមផ្លួវបញ្ច្រាសទិសគ្នា ពីកើតទៅលិច ចំពីមុខពេញទំហឹង បណ្តាលអោយអ្នកបើកម៉ូតូ ហោះផ្លោងផ្ទុបទៅកញ្ចក់រថយន្ត បោកក្បាលហូរឈាម និងបាក់.ក ស្លាប់នៅនិងកន្លែងតែម្ដង ចំនែកម៉ូតូ រងការខូចខាត ខ្ទេចផ្នែកខាងមុខ ស្ទើរតែទាំងស្រុង ។
ដោយឡែកខាងរថយន្ត រងការខូចខាតខ្ទេចផ្នែកខាងមុខ ចំហៀងស្តាំ និងកញ្ចក់ខាងមុខផ្នែកខាងស្តាំ ពេលនោះដែលអ្នកបើករថយន្ត បានបើករថយន្តរត់ ចេញពីកន្លែងកើតហេតុ បាន១០០ម៉ែត្រ បានទុករថយន្តចោល រួចហើយបានរត់ គេចខ្លួនបាត់ស្រមោល។
ចំណែកសាច់ញាតិ របស់ជនរងគ្រោះ ដែលចុះមកដល់កន្លែងកើតហេតុ បានអះអាងថា រថយន្តនិងម៉ូតូបើកស្របទិសគ្នា ហើយរថយន្តបើកបុក ម៉ូតូពីក្រោយពេញទំហឹង បណ្តាលឲ្យ អ្នកបើកម៉ូតូស្លាប់ភ្លាមៗ ។
បន្ទាប់ពីកើតហេតុឃើញ មានសាច់ញាតិ របស់ជនរងគ្រោះ បានមកយំសោកបោកខ្លួន អោបសពជនរងគ្រោះ ទាំងអារម្មណ៍សោកស្ដាយបំផុត ។
ក្រោយពីសមត្ថកិច្ចជំនាញ ចុះទៅដល់ បានប្រគល់សពជនរងគ្រោះ ទៅអោយក្រុមគ្រួសារ យកទៅតម្កល់ធ្វើបុណ្យ នៅវត្តព្រែកឬស្សី ក្រុងតាខ្មៅ ខេត្តកណ្ដាល។ ចំនែកម៉ូតូ និងរថយន្តត្រូវសមត្ថកិច្ច បានធ្វើវាស់វែងយកទៅរក្សាទុក នៅការិយាល័យចរាចរណ៍ ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
សហការី KBN