ភ្នំពេញ៖ ជនសង្ស័យម្នាក់ បានធ្វើសកម្មភាពចូលលួចទូរស័ព្ទ ម៉ាកអាយហ្វូនហ្វាយ (ihone5) មួយគ្រឿននៅក្នុងបន្ទប់ជួល តែត្រូវម្ចាស់ឃើញទាន់ ដេញតាមចាប់វាយទ្រមខ្លួន ប្រគល់ឱ្យសមត្ថកិច្ចកាលពីវេលាម៉ោង១១និង៣០នាទី ថ្ងៃទី០៥ ខែឧសភា ឆ្នាំ២០១៧ នៅចំណុចបន្ទប់ជួលលេខ៨ ក្នុងផ្សារមង្គុល ភូមិទួលទួលសង្កែ ខណ្ឌឬស្សីកែវ ។
សមត្ថកិច្ចបានឲ្យដឹងថា ជនសង្ស័យម្នាក់នោះឈ្មោះ វ៉ាន់ វី ភេទប្រុស អាយុ ២២ឆ្នាំ មុខរបរមិនពិតប្រាដក់ ស្នាក់នៅផ្ទះជួលភូមិទួលសង្កែ សង្កាត់ទួលសង្កែ ខណ្ឌឬស្សីកែវ និងមានស្រុកកំណើតនៅភូមិកោះ ឃុំព្រែកបាក់ ស្រុកស្ទឹងត្រង់ ខេត្តកំពង់ចាម ។ ចំណែកជនរងគ្រោះឈ្មោះ សំ ភី ភេទប្រុស អាយុ ៦៤ឆ្នាំ មុខរបរលក់ដូរស្នាក់នៅកន្លែងកើតហេតុខាងលើ និងមានស្រុកកំណើតនៅភូមិត្រពាំងសង្កែ ឃុំស្វាយភ្លើង ស្រុកបារាយ ខេត្តកំពង់ធំ ។
តាមប្រភពព័ត៌មាន ពីជនរងគ្រោះបានឱ្យដឹងថា នៅមុនពេលកើតហេតុ រូបគេបានទុកទូរស័ព្ទនៅលើការ៉ូក្នុងបន្ទប់ជួល ក្បែរក្មួយប្រុសដេក ហើយរូបគេបានចេញទៅទិញទឹកកកមកហូប នៅក្បែរនោះ បន្ទាប់ពីទិញទឹកកកបានហើយ ត្រឡប់មកបន្ទប់ជួលវិញ ស្រាប់តែមិនឃើញទូរស័ព្ទនៅកន្លែងទុក ភ្លាមៗនោះមានការសង្ស័យឃើញជនសង្ស័យបានដើរចេញពីបន្ទប់ជួលរបស់ខ្លួន ក៏ស្រែកឆោឡោដេញតាមចាប់ បានឆែកឃើញទូរស័ព្ទនៅហោប៉ៅខោ ក៏វាយមួយដៃមួយជើងទ្រមខ្លួន ទើបប្រគល់ឱ្យសមត្ថកិច្ចប៉ុស្តិ៍ទួលសង្កែ ដើម្បីសាកសួរបន្ត។
បច្ចុប្បន្នជនសង្ស័យត្រូវបានបញ្ជូនខ្លួន ទៅបណ្តោះអាសន្ននៅអធិការដ្ឋាននគរបាលខណ្ឌឬស្សីកែវ ដើម្បីធ្វើការសាកសួរនិងកសាងសំណុំរឿងបញ្ជូនទៅតុលាការចាត់ការបន្ត ៕ សហការី kbn-live.com
