ភ្នំពេញ៖ បុរសជាអ្នកដឹកកាតុង តាមរោងចក្រម្នាក់ ត្រូវជនដៃដល់សម្លា ប់រួចយកទៅចាក់ប្រេងម៉ាស៊ូតដុតចោល នៅគុម្ពឬស្សីគាស់ទុកចោល នៅលើដីទួលមួយកន្លែង បង្កឲ្យមានការភ្ញាក់ផ្អើល កាលពីវេលាម៉ោង ៧និង៣០នាទីព្រឹក ថ្ងៃទី៤ ខែឧសភា ឆ្នាំ២០១៧ ស្ថិតនៅក្នុងភូមិអង្គ សង្កាត់ប្រទះឡាង ខណ្ឌដង្កោ ។
បើតាមការបញ្ជាក់ ពីសាច់ញាតិ បានអោយដឹងថា សពជនរងគ្រោះ មានឈ្មោះ ណូន សំណាង ភេទប្រុស អាយុ៣៦ឆ្នាំ មុខរបរអ្នកបើករថយន្ត ដឹកកាតុងតាមរោងចក្រ រស់នៅក្នុងភូមិស្លែងគង់ ឃុំដើមឬស ស្រុកកណ្ដាលស្ទឹង ខេត្តកណ្ដាល មានប្រពន្ធឈ្មោះ ហ៊ិន ចាន់ណា អាយុ ៣៥ឆ្នាំ មានកូន ៣នាក់ ស្នាក់នៅភូមិជាមួយគ្នា ។
ប្រភពព័ត៌ពីកន្លែងកើតហេតុ បានអោយដឹងដឹងថា នៅមុនពេលកើតហេតុ បុរសឈ្មោះ វ៉ន សុប៉ាញ់ អាយុ ២៧ឆ្នាំ មុខរបរកសិករ និងឈ្មោះ ឆៃ អាយុ ២៥ឆ្នាំ បានជិះគោរថយន្ត ទៅរើសអុសនៅក្បែរនោះ ក៏ប្រទះឃើញសពបុរសម្នាក់ ត្រូវបានគេយកទៅដុត នៅគុម្ពឬស្សី ដែលប្រជាពលរដ្ឋគាស់ទុកចោល ដោយចាក់ប្រេងម៉ាស៊ូត មួយកានចំណុះ៣០លីត្រ ចាក់អស់ពាក់កណ្តាល បានទុកចោលនៅក្នុងកាន ពាក់កណ្តាលទៀត ពេលដែលឃើញបែបនេះ ពួកគាត់ទាំងពីរ បានរត់ទៅប្រាប់អ្នកភូមិ ហើយបានរាយកាណ៍ ប្រាប់ទៅដល់សម្ថតកិច្ចក្នុងមូលដ្ឋាន បង្កឲ្យមានការផ្អើល ឆោឡោដល់សមត្ថកិច្ច ចុះទៅឡោមព័ទ្ធ ទីតាំងខាងលើ រង់ចាំសមត្ថកិច្ចជំនាញចុះទៅពិនិត្យ ។
ក្រោយពេលកើតហេតុ សាច់ញាតិបានឃើញ រថយន្តរបស់ជនរងគ្រោះ តាមរយៈហ្វេសប៊ុក ក៏បានមកដល់កន្លែងកើតហេតុ ឃើញជនរងគ្រោះ ត្រូវជនដៃដល់សម្លាប់ រួចអូសយកទៅចាក់ប្រេងម៉ាស៊ូត ដុតចោលនៅគុម្ពឬស្សី គាស់ទុកចោលមួយគុម្ពយ៉ាងធំ ធ្វើឲ្យឆេះខ្លោច នៅដេកច្រង៉ាងស្លាប់ គួរឲ្យអាណោចអាធ័ម ។
បើតាមសាច់ញាតិជនរងគ្រោះ បានឲ្យដឹងថា ជារៀងរាល់ថ្ងៃជនរងគ្រោះ និងប្រពន្ធរបស់គាត់ តែងតែចេញពីផ្ទះ នៅម៉ោង៦ព្រឹក បើករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-8343 ជារថយន្តឃ្លុបបិទជិត ទៅដឹកកាតុងនៅតាម បណ្ដារោងចក្រក្នុងរាជធានីភ្នំពេញ ។ ដោយឡែក នៅព្រឹកកើតហេតុ ប្ដីរបស់គាត់ បានចេញរថយន្ដទៅ ដូចសព្វមួយដង ប៉ុន្តែទៅតែម្នាក់ឯងទេ ដោយសារប្រពន្ធ ជាប់រវល់ជួយ ហែរជំនូនការអ្នកជិតខាង ។ លុះមកដល់ម៉ោង កើតហេតុខាងលើ ទើបមានគេរាយកាណ៍ប្រាប់ថា គេបានឃើញ ជនរងគ្រោះត្រូវបានគេសម្លាប់ រួចយកទៅដុតចោល នៅដីទួលមួយកន្លែង ក្នុងសង្កាត់ប្រទះឡាង ខណ្ឌ ដង្កោ ។
ក្រោយពីទទួលបាន ព័ត៌មានភ្លាម ក្រុមគ្រួសាររបស់ជនរងគ្រោះ បានទៅដល់កន្លែងកើតហេតុ ធ្វើឲ្យស្រ្តីជាបងជីដូនមួយ របស់ជនរងគ្រោះ យំសោកស្តាយ រហូតសន្លប់ ចំណែកប្រពន្ធបាន នៅរៀបចំ ផ្ទះមិនបានមកកន្លែងកើតហេតុទេ ។ ទោះបីជាយ៉ាងណា សាច់ញាតិរបស់ជនរងគ្រោះ បានអះអាងថា ជនរងគ្រោះ មិនដែលមានទំនាស់ជាមួយអ្នកដទៃទេ ។
បើតាមការបញ្ជាក់ពីលោក ជឹម ស៊ីថា អធិការខណ្ឌដង្កោ បានបញ្ជាក់ប្រាប់ថា លោកនឹងធ្វើការស្រាវជ្រាវ ករណីឃាតកម្មដុតសម្លាប់ចោលនេះ ដោយយកចិត្តទុកដាក់បំផុត ដើម្បីតាមចាប់យកជនដៃដល់ យកមកដាក់ទោស ទៅតាមផ្លូវច្បាប់ ។
សពបន្ទាប់ពីសមត្ថកិច្ចធ្វើកោសល្យ វិច័យរួចហើយ បញ្ជាក់ថា ជាករណីឃាតកម្ម និងបានប្រគល់សព ទៅឲ្យសាច់ញាតិ យកទៅធ្វើបុណ្យតាមប្រពៃណី ៕ សហការី kbn-live.com
