ភ្នំពេញ ៖ ប្តីប្រពន្ធទើបរៀបការបាន ៥ខែ ជិះម៉ូតូចេញពីធ្វើការត្រឡប់ទៅផ្ទះវិញ ចៃដន្យម៉ូតូបែកកង់ បានឈប់អោយជាងប៉ះកង់ ដោយបាននាំគ្នាមកឈរមើលនៅចិញ្ចើមផ្លូវ ស្រាប់តែមានរថយន្តមួយគ្រឿង បើកជែងគ្នាជ្រុលទៅបុកបុរសជាប្តីផ្លោងបោកក្បាលស្លាប់ ចំណែកប្រពន្ធរងរបួសធ្ងន់ ហេតុការណ៍នេះកើតឡើងនៅវេលាម៉ោង ៨និង២៥នាទីយប់ ថ្ងៃទី៣ ខែឧសភា ឆ្នាំ២០១៧ ជិតច្រកចូលកន្លែងចាក់សំរាមស៊ីនទ្រី ផ្លូវ២១៧ ភូមិខ្វាលិច សង្កាត់ដង្កោ ខណ្ឌដង្កោ ។
សពជនរងគ្រោះមានឈ្មោះ រឿន បូរិន ភេទប្រុស អាយុ ២០ឆ្នាំ មុខរបរកម្មកររោងចក្រ W and D CAMBODAI CO LTD ស្នាក់នៅភូមិព្រែកថ្លឹង សង្កាត់ព្រែកកំពឹស ខណ្ឌដង្កោ មានប្រពន្ធឈ្មោះ ភឿន រីដា ភេទស្រី អាយុ ១៩ឆ្នាំ មុខរបរកម្មកររោងចក្រ រងរបួសធ្ងន់ ស្នាក់នៅជាមួយប្តី ទើបនិងរៀបការ ហើយបានរយៈពេល៥ខែ ។
តាមសម្ដីបងស្រីរបស់ជនរងគ្រោះ ដែលឃើញហេតុការណ៍ផ្ទាល់ភ្នែក បានអោយដឹងថា មុនពេលកើតហេតុ ប្អូនរបស់គាត់ ដែលជាជនរងគ្រោះទាំង ២នាក់ធ្វើការរោងចក្រ ទើបនឹងរៀបការកាលពីខែមករា ឆ្នាំ២០១៧ បានចេញពីធ្វើការគោលបំណងត្រលប់ផ្ទះរបស់វិញ ដោយបានជិះម៉ូតូម៉ាក ស្កុបពី ពណ៌ស ពាក់ស្លាកលេខ ភ្នំពេញ 1DW 3551 ធ្វើដំនើរតាមផ្លូវ ២១៧ ក្នុងទិសដៅពីជើងទៅត្បូង លុះជិះដល់ពាក់កណ្ដាលផ្លូវ ក៍ស្រាប់តែម៉ូតូបែកកង់ ត្រូវប្តីប្រពន្ធនេះ បានបណ្តើរម៉ូតូទៅរកជាងប៉ះកង់បានហើយ ខណៈពេលកំពុងតែ អោយជាងប៉ះកង់ម៉ូតូ ពួកគេទាំង២នាក់បាននាំគ្នាទៅឈរនៅកៀនផ្លូវ ស្របពេលនោះដែរ មានរថយន្តមិនស្គាល់ម៉ាកមួយគ្រឿង បានបើកជែងគ្នាជាមួយនឹងរថយន្តមិនស្គាល់ម៉ាកមួយគ្រឿងទៀត ដោយសារតែផ្លូវរៀងកោងផងនោះ បានជ្រុលទៅបុកពីរនាក់ប្តីប្រពន្ធទាំងកំរោល ធ្វើឲ្យបុរសជាប្តីហោះផ្លោងជិត ១០ម៉ែត្រ បណ្តាលអោយបាក់ជើងបោកក្បាលទៅនិងផ្លូវ ហូរឈាមស្លាប់ភ្លាមៗនៅកន្លែងកើត ។
ចំនែកប្រពន្ធវិញរងរបួសធ្ងន់ ត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លីនិកឯកជនសួគ៌ា តែដោយសាររបួសធ្ងន់ធ្ងរ ក៏ត្រូវបញ្ជូនបន្តទៅសង្គ្រោះនៅមន្ទីរពេទ្យព្រះកុសុមៈ ។
ដោយឡែករថយន្តបង្ក ឃើញសភាពការណ៍បែបនេះ បានបន្ថែមល្បឿនបើករត់គេចខ្លួនបាត់ស្រមោល ។ បន្តិចក្រោយមក ឃើញមានកម្លាំងសមត្ថកិច្ចមូលដ្ឋាន ព្រមទាំងកងរាជអាវុធហត្ថខណ្ឌដង្កោ បានចុះទៅកន្លែងកើតហេតុ ដើម្បីជួយសម្រួលចរាចរណ៍ កុំឱ្យមានការកកស្ទះផងដែរ ហើយនៅក្នុងហេតុការណ៍នេះ គេឃើញមានបងប្អូនឪពុករបស់ជនរងគ្រោះ បានមកយំសោកបោកប្រាណឱបជនរងគ្រោះ ឡើងទ្រហឹងពេញកន្លែងកើតហេតុ ។
ក្រោយពេលកើតហេតុ សពជនរងគ្រោះត្រូវសមត្ថកិច្ច ធ្វើកំណត់ហេតុ រួចបានប្រគល់សពទៅក្រុមគ្រួសារដឹកតាមរថយន្តយកទៅធ្វើបុណ្យនៅផ្ទះជនរងគ្រោះផ្ទាល់ ចំនែកម៉ូតូរបស់ជនរងគ្រោះត្រូវបានសមត្ថកិច្ច យកទៅរក្សាទុកនៅអធិការដ្ធានខណ្ឌដង្កោ ដើម្បីប្រគល់ អោយក្រុមគ្រួសារសាច់ញាតិរបស់ជនរងគ្រោះវិញ ៕ សហការី kbn-live.com
