ព្រឹត្តិការបោះឆ្នោតជុំទី២ នៅបារាំងកំពុងប្រឈមមុខ នឹងការតវ៉ាយ៉ាងខ្លាំង ពីសំណាក់ប្រជាជន រាប់ពាន់នាក់ មកពីសហជីពបារាំងជាច្រើន ដោយកាលពីថ្ងៃចន្ទ ទី០១ ខែឧសភា ម្សិលមិញនេះ ក្រុមបាតុករទាំងនោះ បានប្រមូលផ្ដុំគ្នា នៅទីក្រុងប៉ារីស ដើម្បីធ្វើបាតុកម្មតវ៉ាប្រឆាំង នឹងបេក្ខភាពប្រធានាធិបតី បារាំងទាំងពីររូប ដែលជាប់ឈ្មោះបោះឆ្នោត ជ្រើសរើសប្រធានាធិបតី ជុំទី០២ នាពេលដ៏ខ្លីខាងមុខ។
នៅថ្ងៃទី០៧ ខែឧសភា ឆ្នាំ២០១៧ខាងមុខនេះ ជាពេលដែលត្រូវបោះឆ្នោត ជ្រើសរើសប្រធានាធិបតីបារាំង ជុំទី០២ ដោយមានបេក្ខភាព តែពីររូបប៉ុណ្ណោះ គឺលោក Emmanuel Macron និងលោកស្រី Marine Le Pen ហើយទាំងពីររូបនេះផងដែរ ក៏កំពុងមានប្រជាជនជាច្រើន ផ្ទុះការតវ៉ាឡើងប្រឆាំងនឹងពួកគេ ដោយប្រមូលគ្នាដង្ហែក្បួនស្រែកថា «គ្មានលោកស្រី Le Pen! គ្មានលោក Macron!»។
លើសពីនេះទៅទៀត ក្រុមបាតុករមួយចំនួន បានពាក់ម៉ាស់បិទមុខ គប់ផាវផ្ទុះ និងចោលដបសាំង ទៅលើប៉ូលិស បង្កឲ្យឆេះ ៣នាក់របួស និងមនុស្ស០៤នាក់ផ្សេងទៀត ត្រូវបានចាប់ខ្លួន។ ទន្ទឹមគ្នានេះដែរ ក្រុមអ្នកតវ៉ាទាំងនោះ ត្រូវបានគេស្គាល់ថា ជាក្រុមសហជីពបារាំងមាន CGT, FO, FSU ក្នុងគោលបំណងប្រឆាំងជំទាស់ នឹងបេក្ខភាពប្រធានាធិបតីបារាំង លោកស្រី Le Pen និងលោក Macron និងថែមទាំងទទូច កុំឲ្យប្រជាជនទៅចូលរួម បោះឆ្នោតនៅជុំទី២ទៀតផង៕
ផ្តល់សិទ្ធដោយ៖ kqube.net