ភ្នំពេញ៖ ប៉ុន្មានថ្ងៃចុងក្រោយនេះ នៅតាមដងទន្លេសាប ក្នុងទឹកដីខណ្ឌឫស្សីកែវ ក៏ដូចជាខណ្ឌជ្រោយចង្វារ ត្រូវបានបងប្អូនប្រជាពលរដ្ឋ ដែលរកសុីចិញ្ចឹមត្រីក្នុងបែរ តាមដងទន្លេសាប នាំគ្នាអូសបែរចេញ ពីទីតាំងដើម ហើយផ្លាស់ប្តូរទៅទីតាំងថ្មី អនាធិបតេយ្យពេញទន្លេ ដោយពួកគាត់អះអាងថា ប្តូរទឹកថ្មីដើម្បីកុំឲ្យត្រីក្នុងបែរ ងាប់ដូចឆ្នាំទៅមិញ ។
មូលហេតុដែលប្រជាពលរដ្ឋ ចិញ្ចឹមត្រីនៅតាមដងទន្លេសាប បាននាំគ្នាអូសបែរចេញព្រោងព្រាត ពីទីតាំងដើម មកនៅកណ្តាលទន្លេ ម្តុំក្បែរស្ពានជ្រោយចង្វារ ជាប្រយោជន៍ផ្លាស់ប្តូរទឹកថ្មីផង ដើម្បីកុំឱ្យត្រីងាប់ ម្យ៉ាងខែនេះ ទឹកមិនមានហូរចេញចូល ទើបបណ្តាលឱ្យគ្មានអុកសុីសែន ហើយត្រីចេះតែងាប់ជាបន្តបន្ទាប់ ។
អជ្ញាធរខណ្ឌឫស្សីកែវ បានឱ្យដឹងថា បញ្ហាខាងលើគឺដើម្បីផ្លាស់ប្តូរទឹកថ្មី ព្រោះខែនេះ មិនមានទឹកហូចេញចូលនោះទេ (ពោលគឺទឹកនឹង) បណ្តាលឱ្យត្រីក្នុងបែរ គ្មានអុកសុីសែនចេញចូល ម្យ៉ាងដោយសារមានភ្លៀងម្តងៗ ទឹកស្អុយហូរចូលផង ទើបបណ្តាលឱ្យត្រីងាយនឹងងាប់ ដូច្នេះហើយ បានជាប្រជាពលរដ្ឋ អូសបែរចេញប្តូទីតាំងថ្មី ហើយគេតែងតែ ធ្វើរបៀបនេះ ជារៀងរាល់ឆ្នាំ ឱ្យតែដល់ខែនេះ ។ ជាក់ស្តែងភ្លៀង១មេ កាលពីសប្តាហ៍មុន បានធ្វើឱ្យត្រីធម្មជាតិ និងបង្កងក្នុងទន្លេ ពុលងាប់និងខ្លះងីងើៗ រត់ចូលខាង ត្រូវប្រជាពលរដ្ឋបង់សំណាញ់ បានយ៉ាងច្រើនផងដែរ ។
លោកងិនឌី ប្រធានរដ្ឋបាលជលផល ភ្នំពេញ បានប្រាប់តាមទូរស័ព្ទ កាលពីព្រឹកថៃ្ងទី១ ខែឧសភាថា ការដែលប្រជាពលរដ្ឋ ចល័តបែរត្រីចេញនេះ គឺដោយសារខែនេះ ក្តៅខ្លាំង ហើយមានភ្លៀងម្តងៗ ទឹកហូរចូលទន្លេ វាធ្វើឱ្យត្រីពុល ហើយទឹកទន្លេអត់ហូរ អត់មានអុកសុីសែន ទើបពួកគាត់ចល័តបែរត្រី ចេញដើម្បីផ្លាស់ប្តូរទឹក ឱ្យតែដល់ខែនេះ ពួកគាត់ធ្វើបែបនេះ ជារៀងរាល់ឆ្នាំ ។
ចល័តពេញទន្លេបែបនេះ សួរថា តើមានប៉ះពាល់បរិស្ថានដែរឬទេ លោក ងិន ឌី ឆ្លើយថាលោកដឹងតែបច្ចេកទេសទេ ចំណែកបរិស្ថាន ទាល់តែសួរជំនាញបរិស្ថាន ។
គួរំលឹកថា បច្ចុប្បន្ន គេសង្កេតឃើញ មានការសង់ទីលំនៅ លើផ្ទៃទឹក រួមមានផ្ទះទឹក និងបែរចិញ្ចឹមត្រីយ៉ាងអានាធិបតេយ្យ នៅតាមដងទន្លេសាប កំពុងតែធ្វើប៉ះពាល់ ដល់បរិស្ថាននិងសោភណ្ឌភាព តាមដងទន្លេ ហើយពុំត្រូវបានអាជ្ញាធរ ក៏ដូចជារដ្ឋាភិបាល យកចិត្តទុកដាក់ឡើយ។ នៅតាមដងទន្លេសាប គេតែងតែឃើញ មានភាពអានាធិតេយ្យ ដែលសម្បូរទៅដោយសំណង់ផ្ទះទឹក និងបែរចិញ្ចឹម ចម្រុះជាតិសាសន៍ ក្នុងនោះរួមមាននិគមជនជាតិវៀតណាម ជនជាតិខ្មែរអ៊ិស្លាម និងខ្មែរនៅត្រៀបត្រា តាមដងទន្លេ ដែលមើលទៅដាក់ដូចជា អនាធិបតេយ្យខ្លាំងណាស់។
ជាក់ស្តែងនៅតាមសងខាងទន្លេសាប ក្នុងរាជធានីភ្នំពេញ ចាប់ពីគល់ស្ពានជ្រោយចង្វារ ទៅដល់ខណ្ឌព្រែកព្នៅខាងជើង ស្ពានព្រែកព្នៅ គឺមានផ្ទះទឹក និងបែរចិញ្ចឹមត្រី នៅពាសពេញតាមដងទន្លេសាប មិនតែប៉ុណ្ណោះ តាមមាត់ច្រាំងទន្លេ ក៏សម្បូរទៅដោយ សំណង់អានាធិបតេយ្យអត់ច្បាប់ដែរ ដោយសារការឃុបឃិត របស់អាជ្ញាធរមូលដ្ឋាន ។ នៅរដូវក្តៅនេះ គេឃើញផ្ទះទឹក និងបែរត្រីទាំងនោះ ត្រូវបានម្ចាស់អូរ ទាញចេញពេញទន្លេ ដើម្បីការពារកុំអោយត្រីងាប់ ហើយបញ្ហានេះ ក៏បានភ្ញាក់ផ្អើលដល់អ្នកដំណើរផងដែរ ។
តាមប្រជាពលរដ្ឋ បានធ្វើការរិះគន់ថា ភាពអានាធិបតេយ្យ នៅតាមដងទន្លេ កំពុងតែធ្វើអោយប៉ះពាល ដល់បរិស្ថាន និងសោភណ្ឌភាព តាមដងទន្លេយ៉ាងធ្ងន់ធ្ងរ ដោយអ្នករស់នៅលើទឹកទាំងនោះ បានបន្ទោរបង់ និងបោះចោលកាកសំណល់ របស់របរចូលទៅក្នុងទន្លេ។ ម្យ៉ាងទៀតថា ការសង់ផ្ទះទឹកបែរត្រី សំណង់តាមដងទន្លេបែបនេះ វាមិនល្អភ្នែកសម្រាប់ភ្ញៀវ ដែលធ្វើដំណើរទេសចរណ៍ តាមដងទន្លេឡើយ។
ប្រជាពលរដ្ឋក៍បានសំណូមពរ ដល់អាជ្ញាធរដែនដី ក៍ដូចជាក្រសួងពាក់ព័ន្ធ មានវិធានការទប់ស្កាត់ផង កុំចេះតែបណ្តែតបណ្តោយ អោយសំណង់អត់ច្បាប់ រីកពេញផ្ទៃទឹក ច្រាំងទន្លេបែបនេះ ។ ចំណុចនេះ ត្រូវគេមើលឃើញថា ជាភាពកំសោយរបស់អាជ្ញាធរមូលដ្ឋាន ដែលបណ្តែតបណ្តោយ ឱ្យមានការតាំងទីលំនៅខុសច្បាប់ កាន់ច្រើនឡើងៗ ដែលមិនងាយនឹងដោះស្រាយឡើយ ៕
សហការី KBN