Tesla តម្រូវឲ្យអតិថិជនទៅរៀនបើកយន្តហោះជាមុន បើចង់ទិញឡានហោះរបស់ខ្លួន

មិនមែនមានលុយសុទ្ធតែអាចបើកបាន! យុគសម័យថ្មីនៃយានយន្តអនាគតបានមកដល់ហើយ ប៉ុន្តែវាក៏នាំមកនូវរបាំងខាងផ្លូវច្បាប់ដ៏តឹងរ៉ឹងបំផុតដែលមិនធ្លាប់មានពីមុនមក។ ក្រុមហ៊ុនមហាសេដ្ឋីបច្ចេកវិទ្យា Tesla ទើបតែបានបង្ហាញនូវសមត្ថភាពរថយន្តហោះជំនាន់ថ្មី Roadster ដែលអាចហោះឡើងលើអាកាស និងស្ទុះលឿនដូចរន្ទះ។ ទោះជាយ៉ាងណា របាយការណ៍ថ្មីៗបានបង្ហើបថា ដើម្បីអាចបញ្ជាឡានហោះលំដាប់កំពូលនេះបានស្របច្បាប់ អតិថិជនប្រហែលជាត្រូវមានលើសពីបណ្ណបើកបរធម្មតា ពោលគឺត្រូវមានបណ្ណបើកបរយន្តហោះថែមទៀតផង។

យោងតាមការចុះផ្សាយរបស់សារព័ត៌មាន Wired និងការធ្វើបង្ហាញសមត្ថភាពដ៏គួរឱ្យភ្ញាក់ផ្អើលនៅក្នុងទីក្រុង McGregor រដ្ឋតិចសាស់ រថយន្តស្ព័រអគ្គិសនីហោះស៊េរីថ្មីនេះ ត្រូវបានគេឃើញបើកបរផ្អាប់ផ្អែកទៅលើផ្លូវជម្រាលកោងដោយប្រើប្រព័ន្ធបឺត រួចក៏ហោះក្រឡាប់ខ្លួននៅលើអាកាស និងចុះចតមកវិញយ៉ាងល្អឥតខ្ចោះ។ អ្វីដែលកាន់តែរំភើបនោះគឺ ឡានហោះដ៏ប្រណីតនេះអាចបង្កើនល្បឿនពី ០ ដល់ ៩៦ គីឡូម៉ែត្រ/ម៉ោង (60 mph) ក្នុងរយៈពេលមិនដល់ ១ វិនាទីផង នៅពេលដែលវាហោះហើរឡើងលើអាកាស។ លក្ខណៈសម្បត្តិដ៏ខ្លាំងក្លា និងខុសប្លែកពីធម្មតានេះហើយ ទើបធ្វើឱ្យអាជ្ញាធរគ្រប់គ្រងចរាចរណ៍អាចនឹងត្រូវបង្កើតច្បាប់វិន័យពិសេសសម្រាប់អ្នកបើកបរ។

ការណ៍នេះសបញ្ជាក់ឱ្យឃើញថា ឡានហោះរបស់ Tesla លែងជាយានយន្តសម្រាប់តែអ្នកមានលុយទូទៅទៀតហើយ។ ក្រុមហ៊ុនបានបញ្ជាក់ថា ខ្សែសង្វាក់ផលិតកម្មរថយន្ត Roadster នេះនឹងមិនទាន់ចាប់ផ្តើមរហូតដល់ឆ្នាំ ២០២៨ នោះឡើយ។ ជាងនេះទៅទៀត សម្រាប់អ្នកដែលចង់បញ្ជាទិញរថយន្តនេះ គឺត្រូវបានតម្រូវឱ្យមានការកក់ប្រាក់មុនចំនួន ៥០,០០0 ដុល្លារអាមេរិក ព្រមទាំងត្រូវមានលិខិតអញ្ជើញជាពិសេស ពីខាងក្រុមហ៊ុនផ្ទាល់ថែមទៀតផង។ ហើយចុងក្រោយ បើទោះជាមានលុយនិងមានលិខិតអញ្ជើញក៏ដោយ ប្រសិនបើអ្នកមិនទៅរៀនយកបណ្ណបើកបរយន្តហោះទេនោះ គឺមិនអាចបើកបរវាបានឡើយ។

របកគំហើញបច្ចេកវិទ្យាឡានហោះរបស់ក្រុមហ៊ុន Tesla នៅពេលនេះ បានបង្ហាញឱ្យឃើញច្បាស់ថា ពិភពលោកកំពុងឈានជើងចូលទៅក្នុងយុគសម័យថ្មីមួយ ដែលព្រំដែនរវាងយានយន្តផ្លូវគោក និងផ្លូវអាកាសត្រូវបានរលាយចូលគ្នា។ ទោះជាយ៉ាងណា វាក៏បានផ្ញើសារព្រមានមួយផងដែរថា មិនមែនឱ្យតែមានលុយទិញ គឺអាចយកមកបើកបរបានតាមចិត្តនោះទេ ព្រោះសុវត្ថិភាព និងជំនាញបច្ចេកទេសពិតប្រាកដត្រូវបានទាមទារជាចម្បង។ ប្រសិនបើបងប្អូនចង់ក្លាយជាម្ចាស់ឡានហោះនាឆ្នាំ ២០២៨ ខាងមុខ អ្វីដែលត្រូវរៀបចំមុនគេ គឺការចុះឈ្មោះចូលរៀនវគ្គបើកបរយន្តហោះឱ្យបានស្ទាត់ជំនាញជាមុនសិន៕