ឈិត សុវណ្ណបញ្ញា Cover បទរបស់ Phương Mỹ Chi ធ្វើឱ្យមានការចាប់អារម្មណ៍យ៉ាងខ្លាំង

តារាចម្រៀង ឈិត សុវណ្ណបញ្ញា បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងបន្ទាប់ពីរូបនាងបាន Cover បទវៀតណាមដ៏ល្បីមួយបទដែលរំលេចពីវប្បធម៌ខ្មែររបស់តារាចម្រៀង ផឿង មីជី (Phương Mỹ Chi) ។ សំឡេងរបស់តារាចម្រៀងរូបនេះទទួលបាននូវការសរសើរជាច្រើនជាពិសេសមតិថែមទាំងនិយាយថាមុខមាត់របស់ ឈិត សុវណ្ណបញ្ញា គឺមានភាពស្រដៀងគ្នានឹង ផឿង មីជី។

កាលពីខែសីហា តារាចម្រៀងប៉ុបវៀតណាម ផឿង មីជី បានធ្វើឱ្យផ្ទុះការចាប់អារម្មណ៍ភ្លូកទឹកភ្លូកដីនៅពេលរូបនាងបានបញ្ចេញបទចម្រៀងមួយបទដោយបង្ហាញពីវប្បធម៌ទំនៀមទម្លាប់របស់បងប្អូនខ្មែរកម្ពុជាក្រោម។ លើសពីនេះទៅទៀត ផឿង មីជី ក៏បានបញ្ចូលឃ្លាច្រៀងជាភាសាខ្មែរផងដែរ។ បន្ទាប់ពីការចេញផ្សាយបទនេះទស្សនិកជននៅតំបន់អាស៊ីអាគ្នេយ៍ផ្ទុះការចាប់អារម្មណ៍យ៉ាងខ្លាំង ខណៈចុងក្រោយនេះ ផឿង មីជី ក៏បានលើកយកបទនេះទៅសម្តែងដោយគ្រងឈុតប្រពៃណីខ្មែរយ៉ាងស្រស់ស្អាតបង្ហាញនៅលើឆាកដ៏ធំក្នុងប្រទេសវៀតណាម។

ក្រៅពីការចាប់អារម្មណ៍កន្លងមកគេស្រាប់តែឃើញតារាចម្រៀង ឈិត សុវណ្ណបញ្ញា ដែលទើបវិលត្រឡប់មកកាន់អាជីពសិល្បៈវិញបាន Cover បទរបស់ ផឿង មីជី ដែលបណ្តាលឱ្យមានការចាប់អារម្មណ៍យ៉ាងច្រើនពីទស្សនិកជនពីព្រោះនេះគឺជារឿងកម្រដែលទស្សនិកជនបានស្តាប់តារាចម្រៀងកម្ពុជារូបនេះច្រៀងបទវៀតណាម។

តាមការបញ្ជាក់របស់កញ្ញា ឈិត សុវណ្ណបញ្ញា បានឱ្យដឹងថាការ Cover បទរបស់ ផឿង មីជី គឺជាកាដូជូនអ្នកគាំទ្របន្ទាប់ពីពិធីបុណ្យភ្ជុំបិណ្ឌ។ ចម្រៀង Cover របស់ ឈិត សុវណ្ណបញ្ញា ទទួលបាននូវមតិវិជ្ជមានដោយមានការសរសើរជាច្រើនពីទស្សនិកជនជាមួយនឹងសម្តីថាពីរោះស្រទន់ ដោយមតិខ្លះថែមទាំងនិយាយថាតារាចម្រៀងរូបនេះនិង ផឿង មីជី ក៏មានមុខមាត់ស្រដៀងគ្នាផងដែរ។

ក្រៅពីទស្សនិកជនទូទៅគេសង្កេតឃើញថានៅលើបណ្តាញសង្គមហ្វេកប៊ុកតារាចម្រៀង សុគន្ធ និសា ក៏បានចូលទៅបញ្ចេញមតិយោបល់ដូចគ្នាដែលបង្ហាញពីការគាំទ្រនិងសរសើរមកកាន់តារាចម្រៀង ឈិត សុវណ្ណបញ្ញា ផងដែរ។

ចេញផ្សាយនៅថ្ងៃទី ១២ ខែសីហា ឆ្នាំ២០២៦ បទ «Heaven With My Love» (Thiên Đường Với Người Thương) មានការស្តាប់លើសពី៤១លានដង(គិតត្រឹមព្រឹកថ្ងៃទី១៩ ខែតុលា) នៅលើឆាណែលយូធូបរបស់ ផឿង មីជី ហើយវាក៏ក្លាយជាបទដ៏ល្បីបំផុតរបស់តារាចម្រៀងប៉ុបវៀតណាមរូបនេះដែលមានការទស្សនាដល់តួលេខនេះ៕