Cheng Lei និង Xu Ruohan មានភាពស៊ីចង្វាក់គ្នាទាំងក្នុងនិងក្រៅសាច់រឿង

តារាសម្ដែង Cheng Lei និងតារាសម្ដែងស្រី Xu Ruohan ព្រមទាំងតារាសម្ដែង Guo Yuxin, Dai Yunfan, Liu Dongqin និង Chang Long បានជួបជុំគ្នាក្នុងកម្មវិធី Live ពិសេសរបស់រឿងភាគ «The Lament of Autumn» នៅទីក្រុងប៉េកាំង កាលពីថ្ងៃទី១៥ ខែតុលា ឆ្នាំ២០២៦ ដោយបង្កើតបរិយាកាសរីករាយនិងទាក់ទាញចំណាប់អារម្មណ៍ពីអ្នកគាំទ្រ។
 
កម្មវិធីនេះមានប្រធានបទដែលផ្ដោតលើឈុតឆាកស្នេហាត្រីកោណ និងជម្លោះស្នេហាដ៏ស្មុគស្មាញក្នុងរឿង។ តួសម្ដែងបាននាំគ្នារំឭកឈុតឆាកសំខាន់ៗនិងបង្ហាញពីអារម្មណ៍របស់តួអង្គដែលធ្លាប់ធ្វើឱ្យទស្សនិកជនរំភើប និងឈឺចាប់តាមសាច់រឿង។ ក្នុងអំឡុងពេលកម្មវិធី Cheng Lei និង Xu Ruohan បានសម្ដែងឡើងវិញនូវឈុតប្រឈមមុខគ្នារវាងតួអង្គ Yu Changxuan និង Ye Pingjun ដែលពោរពេញដោយភាពតានតឹង និងមនោសញ្ចេតនាស្មុគស្មាញ។
 
ទោះជាយ៉ាងណា នៅពេលចាកចេញពីតួអង្គ អ្នកទាំងពីរបានបង្ហាញការលេងសើច និងការឆ្លើយឆ្លងគ្នាយ៉ាងរីករាយ ដែលខុសប្លែកពីបរិយាកាសតានតឹងក្នុងរឿង។ ភាពខុសគ្នារវាងក្នុងឆាក និងក្រៅឆាកនេះបានធ្វើឱ្យអ្នកគាំទ្រជជែកគ្នាយ៉ាងផុសផុល ដោយមនុស្សមួយចំនួនពេញចិត្តនឹងភាពស៊ីចង្វាក់គ្នារបស់តារាទាំងពីរ។ Cheng Lei ក៏បានចែករំលែកពីការចូលតួ និងភាពស្មុគស្មាញនៃទំនាក់ទំនងរវាងតួអង្គក្នុងសាច់រឿងផងដែរ។
 
អ្វីដែលគួរឱ្យចាប់អារម្មណ៍មិនចាញ់តួឯក គឺការបង្ហាញខ្លួនរបស់ Guo Yuxin ដែលសម្ដែងជាតួ Tao Ziyi ក្នុងរឿង។ តួអង្គរបស់នាងជានារីមានចរិតរឹងមាំ ស្រស់ស្អាត និងស្រលាញ់តួ​ឯកប្រុសយ៉ាងខ្លាំងប៉ុន្តែស្នេហារបស់នាងមិនបានទទួលការឆ្លើយតបដូចបំណងឡើយ។
ក្នុងកម្មវិធី Live នាងបានសម្ដែងឡើងវិញនូវឃ្លាសន្ទនាល្បីៗរបស់តួអង្គ ដែលបង្ហាញទាំងភាពមានមោទនភាព និងភាពផុយស្រួយក្នុងចិត្តរបស់ Tao Ziyi។
 
នៅពេលពន្យល់ពីតួអង្គ Guo Yuxin បានលើកឡើងថា Tao Ziyi មិនមែនជាមនុស្សអាក្រក់ដែលមានចរិតតែមួយមុខនោះទេ។ នាងគ្រាន់តែជាមនុស្សដែលមានភាពរឹងរូសដូចក្មេង និងប្រកាន់ខ្ជាប់នឹងអ្វីដែលខ្លួនជឿថាគួរតែជារបស់ខ្លួន ខណៈផ្នែកខាងក្នុងនៅតែមានភាពទន់ភ្លន់។ ការបកស្រាយតួអង្គនេះបានធ្វើឱ្យអ្នកទស្សនាមើលឃើញមុំផ្សេងទៀតរបស់ Tao Ziyi និងយល់កាន់តែច្បាស់ពីមូលហេតុនៅពីក្រោយសកម្មភាពរបស់នាងក្នុងរឿង។
 
ក្រៅពីការរំឭកឈុតឆាកសំខាន់ៗ តួសម្ដែងក៏បានចែករំលែករឿងរ៉ាវកំប្លែង និងបទពិសោធន៍ពីការថតរឿងផងដែរ។ បរិយាកាសរីករាយក្នុងកម្មវិធីបានបង្ហាញពីភាពខុសគ្នារវាងទំនាក់ទំនងតួអង្គដែលពោរពេញដោយការប្រឈមមុខគ្នាក្នុងរឿង និងមិត្តភាពរបស់តួសម្ដែងនៅក្រៅឆាក។
 
រឿងភាគ «The Lament of Autumn» ត្រូវបានកែសម្រួលពីប្រលោមលោករបស់អ្នកនិពន្ធ Ling Xi ដោយមានសាច់រឿងកើតឡើងក្នុងសម័យសាធារណរដ្ឋចិន និងផ្ដោតលើស្នេហា ជម្លោះអំណាច និងជោគវាសនារបស់មនុស្សក្នុងសម័យចលាចល។ បន្ទាប់ពីការចាក់ផ្សាយកាលពីថ្ងៃទី១២ ខែតុលា ឆ្នាំ២០២៦ រឿងភាគនេះទទួលបាននូវការចាប់អារម្មណ៍ភ្លាមៗពីសំណាក់ទស្សនិកជននិងទទួលបានប្រជាប្រិយភាពយ៉ាងខ្លាំង៕