បន្ទាប់ពីបញ្ចប់ការប្រកួត មាន សូនីតា លំដាប់រងទី៤ Universal Woman 2026 បានចេញមក Live បង្ហាញអារម្មណ៍របស់ខ្លួនជាលើកដំបូងជុំវិញមតិរិះគន់កន្លងមកអំឡុងពេលនាងប្រកួត។ មិនត្រឹមតែប៉ុណ្ណោះ មាន សូនីតា បានបង្ហាញថាមេរបស់ខ្លួនទំនងចង់សំដៅដល់ស្ថាប័ន Universal Woman Cambodia មិនជួយជ្រោមជ្រែងបង្ហាញផ្លូវខណៈនាងត្រូវរ៉ាប់រងអ្វីៗតែម្នាក់ឯងក្នុងរយៈពេលដ៏ខ្លីត្រឹមតែ១ខែមុនពេលចាប់ផ្តើមប្រកួតជាផ្លូវការ។.png)
នៅយប់ថ្ងៃទី១៥ ខែតុលា មាន សូនីតា បាន Live នៅលើបណ្តាញសង្គមហ្វេកប៊ុកដោយភ្ជាប់មកជាមួយនឹងចំណងជើងយ៉ាងខ្លីថា «សុបិនអាក្រក់»។ នៅក្នុងការ Live នេះ មាន សូនីតា បាននិយាយថានាងគឺជាមនុស្សស្ងប់ស្ងៀមមិនសូវបង្ហាញអារម្មណ៍នៅលើបណ្តាញសង្គមឡើយ។ ទោះយ៉ាងណា មាន សូនីតា បានដឹងពីបញ្ហាចំពោះការប្រកួតរបស់នាងដែលរងនូវការរិះគន់យ៉ាងច្រើនពីសំណាក់អ្នកគាំទ្រវិស័យបវរកញ្ញា។
ជុំវិញការលើកឡើងអំពីមតិរិះគន់ Universal Woman Cambodia 2026 បានបង្ហាញថាបេក្ខភាពផ្សេងៗមុននឹងចេញមកប្រកួតគឺមានរយៈពេលជាច្រើនខែដើម្បីត្រៀមខ្លួនប៉ុន្តែសម្រាប់នាងវិញគឺមានពេលវេលាខ្លីណាស់ដោយត្រឹមតែ១ខែប៉ុណ្ណោះមិនថាការរៀនដើរ ការធ្វើវីដេអូប្រកួត រៀនឆ្លើយសំណួរ សូម្បីតែរកអ្នកច្នៃម៉ូតក៏មិនបានដោយសារតែគេជាប់ធ្វើឱ្យអ្នកដទៃ។
មាន សូនីតា ក៏បង្ហាញដោយក្តីអន់ចិត្តដែលនាងមានមេនៅក្បែរខ្លួនហើយប៉ុន្តែមិនអាចបង្ហាញផ្លូវក្នុងការត្រៀមខ្លួនឱ្យនាងបាន។ បវរកញ្ញារូបនេះបានប្រៀបធៀបខ្លួនជាមនុស្សដែលឈរនៅចំកណ្តាលទន្លេទៅមុខក៏ពិបាកថយក្រោយក៏ពិបាក។ 
មិនត្រឹមតែបង្ហើបពីបញ្ហាត្រួសៗក្នុងដំណើរថ្មីជាបវរកញ្ញា មាន សូនីតា ក៏បានបង្ហោះជាសំណេរនៅលើបណ្តាញសង្គមតែម្តង។ លំដាប់រងទី៤ Universal Woman 2026 បានបង្ហាញយ៉ាងច្បាស់ថានាងទទួលបានពាក្យសម្តីដូចជា ផាត់មុខក្រាស់ពេក ដើរមិនកើត ឈុតមិនស្អាត រ៉ូបមិនស្អាត អត់សមជាបវកញ្ញា ឈុតតំណាងជាតិមិនឡូយ មើលទៅឆ្គងណាស់ មើលទៅខ្សោះៗ ដូចអត់មានកម្លាំង។
មាន សូនីតា ថានាងមិនអាចផ្គាប់ចិត្តមនុស្សគ្រប់គ្នាបានទេ ប៉ុន្តែនាងនឹងមិនចុះចាញ់ចំពោះការរិះគន់ឡើយ។ ផ្ទុយទៅវិញ នាងនឹងយកការរិះគន់ជាកម្លាំងចិត្ត ដើម្បីអភិវឌ្ឍខ្លួនឱ្យកាន់តែប្រសើរ និងសម្រេចក្តីស្រមៃរបស់ខ្លួន។ Universal Woman Cambodia 2026 ថា «នៅពីក្រោយការបង្ហាញខ្លួនមួយលើឆាក មានការហាត់ សម ការត្រៀមខ្លួន សម្ពាធ ភាពនឿយហត់ និងការលះបង់ជាច្រើនដែលមនុស្សមិនបានឃើញ។ អ្នកឃើញតែអ្វីដែលកើតឡើងនៅលើឆាក ប៉ុន្តែអ្នកប្រហែលជាមិនបានឃើញដំណើរដ៏លំបាកនៅពីក្រោយវាទេ»។
ក្រោយពីបញ្ចេញអារម្មណ៍របស់ខ្លួននិងបានរៀបរាប់ពីទុក្ខលំបាកក្រោយឆាកដែលមនុស្សមួយចំនួនមិនបានដឹងថានាងត្រូវរងនូវសម្ពាធបែបណា អ្នកគាំទ្រមួយចំនួនក៏បានលើកទឹកចិត្តនិងបង្ហាញការយល់អារម្មណ៍ចំពោះ មាន សូនីតា ផងដែរ៕
