Li Meng ជាតារាសម្តែងម្នាក់ដែលស្ទើរតែបាត់បង់អាជីពដោយសារ «ផ្លែប៉ោម»

តារាសម្តែង Li Meng ដែលត្រូវបានគេស្គាល់ថាជាតារាស្រីមានសមត្ថភាពសម្តែងខ្លាំង កំពុងទទួលបានការចាប់អារម្មណ៍ជាថ្មីប៉ុន្តែជាមួយគ្នានោះរឿងរ៉ាវចម្រូងចម្រាសពីអតីតកាលរបស់នាងក៏ត្រូវបានគេលើកមកពិភាក្សាឡើងវិញជាពិសេសគឺហេតុការណ៍ដែលគេហៅថា «រឿងផ្លែប៉ោម» ដែលត្រូវបានគេចាត់ទុកថាជាចំណុចមួយធ្វើឱ្យអាជីពរបស់នាងប្រឈមនឹងបញ្ហា។
Li Meng កើតនៅឆ្នាំ ១៩៩២ និងបានបញ្ចប់ការសិក្សាពី Beijing Film Academy។ តាំងពីដើមអាជីព នាងត្រូវបានកោតសរសើរចំពោះទេពកោសល្យ និងរូបរាងដែលស័ក្តិសមនឹងវិស័យភាពយន្ត។ នាងក៏ធ្លាប់ចូលរួមក្នុងខ្សែភាពយន្តនិងគម្រោងល្បីៗជាច្រើនហើយបានបង្ហាញខ្លួនលើកម្រាលព្រំក្រហមនៃមហោស្រពភាពយន្ត Cannes ផងដែរ។

ចំណុចរបត់បានកើតឡើងអំឡុងពេលថតរឿង «The Bad Kids»។ តារាសម្តែង Zhang Songwen ដែលធ្លាប់ធ្វើការជាមួយ Li Meng បានរៀបរាប់ពីហេតុការណ៍មួយដែលនាងត្រូវថតឈុតចិតសំបកផ្លែប៉ោម។បន្ទាប់ពីថតឈុតមួយបានល្អ អ្នកដឹកនាំរឿងចង់ថតឈុតដដែលពីមុំផ្សេងទៀត។ ប៉ុន្តែ Li Meng បានស្នើឱ្យក្រុមការងាររក ផ្លែប៉ោមដែលមានរូបរាងដូចគ្នាបេះបិទនឹងផ្លែប៉ោមមុនដើម្បីរក្សាភាពជាប់លាប់របស់ឈុត។ ក្រុមការងារផ្នែកសម្ភារៈត្រូវចំណាយពេលស្វែងរកប៉ុន្តែមិនអាចរកផ្លែប៉ោមដែលនាងពេញចិត្តបាន។

ហេតុការណ៍នេះបានធ្វើឱ្យ Li Meng រងការរិះគន់ថាពិបាកធ្វើការជាមួយនិងមានអាកប្បកិរិយាដូចតារាល្បីដែលទាមទារច្រើនពេក។ ទោះជាយ៉ាងណាក្រោយមក Li Meng បានពន្យល់ថា នាងមិនមានបំណងចង់បង្កការលំបាកដល់ក្រុមការងារឡើយ ប៉ុន្តែនាងបារម្ភថា ប្រសិនបើផ្លែប៉ោមមានពណ៌ ឬរូបរាងខុសគ្នា វាអាចធ្វើឱ្យឈុតដែលថតពីមុំផ្សេងគ្នាមើលទៅមិនជាប់លាប់។ មុនពេលរឿងផ្លែប៉ោមល្បី Li Meng ក៏ធ្លាប់ប្រឈមនឹងការរិះគន់ពីហេតុការណ៍ផ្សេងៗក្នុងអាជីព។

ក្នុងការថតរឿង «White Deer Plain» នាងត្រូវបានប្តូរចេញពីតួ Bai Ling បន្ទាប់ពីថតបានមួយរយៈ។ មានពាក្យចចាមអារ៉ាមជាច្រើនអំពីមូលហេតុ រួមទាំងការមកយឺត ការកែសម្រួលឃ្លា ឬការមិនស្របគ្នាជាមួយក្រុមផលិត។ ប៉ុន្តែរហូតមកដល់ពេលនេះ មូលហេតុផ្លូវការនៃការប្តូរតួមិនត្រូវបានបញ្ជាក់ច្បាស់ឡើយ។ Li Meng ក៏ធ្លាប់មានជម្លោះជុំវិញការមកយឺត និងបញ្ហាក្នុងការធ្វើការជាមួយក្រុមផលិតក្នុងគម្រោងមួយចំនួនទៀត។ ហេតុការណ៍ទាំងនេះបានបន្តបង្កើតរូបភាពថា Li Meng ជាតារាស្រីដែលមានបុគ្គលិកលក្ខណៈរឹងមាំ និងពិបាកសម្របសម្រួល។

ទោះអតីតកាលមានភាពចម្រូងចម្រាសក៏ដោយ Li Meng មិនបានបាត់ពីវិស័យសម្តែងឡើយ។ ផ្ទុយទៅវិញ ក្នុងរយៈពេលប៉ុន្មានឆ្នាំចុងក្រោយនាងបានបង្ហាញសមត្ថភាពសម្តែងកាន់តែច្បាស់ តាមរយៈតួអង្គដែលមានភាពស្មុគស្មាញ កាចឆ្នាស និងជាញឹកញាប់ជាតួអង្គដែលធ្វើឱ្យទស្សនិកជនមិនពេញចិត្ត។ ជាពិសេសការសម្តែងជាតួព្រះនាង Wanning ក្នុងរឿង «The Double» បានធ្វើឱ្យឈ្មោះរបស់នាងល្បីខ្លាំងលើបណ្តាញសង្គម។ តួអង្គដែលមានចរិតឈ្លានពាន ច្រណែន និងចង់គ្រប់គ្រងអ្នកដទៃ បានក្លាយជាតួអង្គដែលធ្វើឱ្យទស្សនិកជនស្អប់ ប៉ុន្តែជាមួយគ្នានោះក៏សរសើរទេពកោសល្យសម្តែងរបស់ Li Meng ផងដែរ។

ការសម្តែងរបស់ Li Meng ក្នុង «Against the Current» ក៏ទទួលបានការចាប់អារម្មណ៍ ដោយនាងសម្តែងជាតួ Zhao Xingtang ដែលជាស្ត្រីមានទ្រព្យសម្បត្តិ មានភាពឆ្លាតវៃក្នុងការរកស៊ី ប៉ុន្តែជួបភាពឯកោក្នុងជីវិតអាពាហ៍ពិពាហ៍៕