មន្ទីរពេទ្យកាល់ម៉ែត ផ្ដើមវះកា.ត់ផ្សាំតម្រងនោមជាលើកដំបូងបង្អស់!

យោងតាមប្រសាសន៍របស់ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល មន្ទីរពេទ្យកាល់ម៉ែតចាប់ផ្តើមអនុវត្តគម្រោងវះកាត់ផ្សាំសរីរាង្គ (ប្តូរតម្រងនោម) ជាលើកដំបូង ក្រោមកិច្ចសហការជាមួយភាគីក្រុងលីយ៉ុង ប្រទេសបារាំង ដើម្បីផ្តល់ក្តីសង្ឃឹម និងជម្រើសព្យាបាលកម្រិតខ្ពស់ជូនពលរដ្ឋដែលមានជំងឺខ្សោយតម្រងនោមដំណាក់កាលចុងក្រោយ។
____________
ដំណឹងល្អសម្រាប់អ្នកជំងឺតម្រងនោម! កម្ពុជាចាប់ដៃជាមួយបារាំង នាំយកបច្ចេកទេសវះកាត់ផ្សាំសរីរាង្គកម្រិតខ្ពស់មកដីខ្មែរ ដោយមន្ទីរពេទ្យកាល់ម៉ែតបានប្រកាសចាប់ផ្តើមអនុវត្តគម្រោងផ្សាំតម្រងនោមជាលើកដំបូងបង្អស់របស់ខ្លួន។ របត់ថ្មីដ៏ឧត្តុង្គឧត្តមនេះ ត្រូវបានឯកឧត្តមរដ្ឋមន្ត្រីក្រសួងសុខាភិបាល ចាត់ទុកថាជាការបើកទំព័រប្រវត្តិសាស្ត្រថ្មីមួយ នៃវិស័យសុខាភិបាលកម្ពុជា ក្នុងការផ្តល់ជម្រើសសង្គ្រោះជីវិតដ៏មានប្រសិទ្ធភាព និងគុណភាពខ្ពស់បំផុតជូនដល់ប្រជាពលរដ្ឋ។

នៅក្នុងពិធីសិក្ខាសាលាអន្តរជាតិស្តីពីការប្តូរតម្រងនោម កាលពីថ្ងៃទី ២ ខែតុលា ឆ្នាំ២០២៦ ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាលកម្ពុជា បានមានប្រសាសន៍សង្កត់ធ្ងន់ថា គម្រោងការវះកាត់ផ្សាំតម្រងនោមនៅមន្ទីរពេទ្យកាល់ម៉ែត គឺជាសមិទ្ធផលបន្ថែម និងជាជំហានថ្មីមួយដ៏សំខាន់។ វាបានស្តែងឱ្យឃើញពីវឌ្ឍនភាព និងការអភិវឌ្ឍផ្នែកបច្ចេកទេសវេជ្ជសាស្ត្រដ៏ទំនើប សម្រាប់ព្យាបាលអ្នកជំងឺដែលមានសភាពស្មុគស្មាញនៅក្នុងប្រទេស។ បេសកកម្មចម្បងនៃគម្រោងប្រវត្តិសាស្ត្រនេះ គឺផ្តោតលើការផ្តល់អត្ថប្រយោជន៍ដល់អ្នកជំងឺដែលកំពុងមានបញ្ហាសុខភាពខ្សោយតម្រងនោមដំណាក់កាលចុងក្រោយ ដែលកន្លងមកត្រូវពឹងផ្អែកលើការលាងឈាមជាប្រចាំ ឱ្យមានឱកាសទទួលបានការវះកាត់ផ្លាស់ប្តូរសរីរាង្គប្រកបដោយសុវត្ថិភាពខ្ពស់ និងកាត់បន្ថយការចំណាយចេញទៅព្យាបាលនៅបរទេស។



គួររំលឹកឡើងវិញថា ផ្អែកលើប្រវត្តិសាស្ត្រវេជ្ជសាស្ត្រ ការវះកាត់ដូរតម្រងនោមនៅកម្ពុជាត្រូវបានសម្រេចជោគជ័យដំបូងបង្អស់តាំងពីខែវិច្ឆិកា ឆ្នាំ២០១០ នៅមន្ទីរពេទ្យព្រះកេតុមាលា ក្រោមការសហការជាមួយគ្រូពេទ្យជំនាញចិន និងបន្តអនុវត្តដោយជោគជ័យនៅមន្ទីរពេទ្យមិត្តភាពខ្មែរ-សូវៀត។ យ៉ាងណាមិញ គម្រោងថ្មីរបស់មន្ទីរពេទ្យកាល់ម៉ែតនាពេលនេះ គឺជាការចាប់ផ្តើមឡើងជាលើកដំបូងសម្រាប់ប្រវត្តិរបស់មន្ទីរពេទ្យផ្ទាល់ ដែលត្រូវបានផ្តួចផ្តើមឡើងសហការជាមួយភាគីទីក្រុងលីយ៉ុង (Lyon) នៃប្រទេសបារាំង តាំងពីឆ្នាំ២០១៤ មកម៉្លេះ។ គម្រោងនេះត្រូវបានកំណត់យកមន្ទីរពេទ្យកាល់ម៉ែតជាទីតាំងគំរូ ដោយរួមគ្នាបង្កើតសមត្ថភាព បំពាក់ហេដ្ឋារចនាសម្ព័ន្ធ សម្ភារៈបរិក្ខារពេទ្យ ការបណ្តុះបណ្តាលធនធានមនុស្សផ្នែកបច្ចេកទេសវះកាត់ ព្រមទាំងប្រព័ន្ធមន្ទីរពិសោធន៍យ៉ាងហ្មត់ចត់បំផុត។

ការចាប់ផ្ដើមរបស់មន្ទីរពេទ្យកាល់ម៉ែតនៅពេលនេះ សបញ្ជាក់ពីភាពភ្លឺស្វាងនៃវិស័យវេជ្ជសាស្ត្រកម្ពុជា ដែលកាន់តែមានការអភិវឌ្ឍទៅមុខឥតឈប់ឈរ និងរីកចម្រើនកាន់តែខ្លាំងក្លា។ ជោគជ័យនៃគម្រោងសហការអន្តរជាតិនេះ នឹងបន្តផ្តល់ពន្លឺសង្ឃឹមថ្មីមួយ ដោះស្រាយទុក្ខលំបាក និងផ្តល់ជីវិតទីពីរដល់អ្នកជំងឺខ្សោយតម្រងនោមរាប់ម៉ឺននាក់នៅកម្ពុជាឱ្យមានអនាគតដ៏រឹងមាំយូរអង្វែង៕