កសិករថៃយំលែងចេញ! ចម្ការទុរេនជាង ២០,០០០រ៉ៃ ត្រូវបានទឹកជំនន់បំផ្លា.ញខ្ទិចគ្មានសល់

យោងតាមសារព័ត៌មាន Khaosod របស់ថៃ ចម្ការទុរេនជាង ២០,០០0រ៉ៃ ត្រូវបានគ្រោះទឹកជំនន់កម្ពស់ ៤ ទៅ ៥ ម៉ែត្រ អូសបន្លាយ ៦ ថ្ងៃ ក្នុងខេត្តច័ន្ទបុរី វាយបំផ្លា.ញឲ្យខ្ទេចខ្ទីរគ្មានសល់ ធ្វើឱ្យកសិករថៃជាង ៤,០០០ នាក់រងទុក្ខយ៉ាងខ្លាំង និងត្រូវរង់ចាំពី ៥ ទៅ ៦ ឆ្នាំទើបបានផលឡើងវិញ ខណៈរដ្ឋកំពុងអន្តរាគមន៍ជួយពន្យារបំណុលធនាគារបន្ទាន់។
_________
ត្រូវចាំយ៉ាងហោចណាស់ពី ៥ ទៅ ៦ ឆ្នាំ ដើម្បីស្ដារឡើងវិញ! គ្រោះទឹកជំនន់ខេត្តច័ន្ទបុរី បានវាយប្រហារបោសសម្អាតបំផ្លិចបំផ្លាញផ្ទៃដីចម្ការដំណាំហូបផ្លែរបស់កសិករថៃ អស់ជាង ២០,០០០ រ៉ៃ ធ្វើឱ្យដើមធុរេនដែលធ្លាប់ខៀវស្រងាត់ ត្រូវប្រែជាក្រៀមស្វិតងាប់ស្រោចពេញដី និងត្រូវកាប់ចោលទាំងទឹកភ្នែក។ ស្ថានភាពនេះបានបង្កើតជារបួសថ្មីលើស្នាមដំបៅចាស់ ព្រោះវាធ្វើឱ្យកសិករដាំធុរេនថៃកាន់តែខាតបង់ធ្ងន់ធ្ងរបន្ថែមទៀត ខណៈក្នុងឆ្នាំនេះ ទីផ្សារផ្លែធុរេនរបស់ថៃកំពុងជួបបញ្ហារាំងស្ទះ ធ្លាក់ចុះតម្លៃ និងពិបាកនាំចេញស្រាប់ផង។

យោងតាមការចុះផ្សាយរបស់សារព័ត៌មានថៃ Khaosod English កាលពីថ្ងៃទី៤ ខែតុលា នេះបានឲ្យដឹងថា គ្រោះទឹកជំនន់ដ៏កាចសាហាវនៅក្នុងខេត្តច័ន្ទបុរី បានជះឥទ្ធិពលអាក្រក់ និងធ្វើឱ្យកសិករប្រមាណ ៤,០០០ នាក់ រងទុក្ខវេទនាយ៉ាងខ្លាំង ក្រោយផ្ទៃដីដាំដុះដំណាំរួមផ្សំ និងធុរេនលើសពី ២០,០០០ រ៉ៃ (ប្រហែលជាង ៣,២០០ ហិកតា) រងការលិចលង់ទាំងស្រុង។ កសិករម្នាក់នៅក្នុងស្រុក Kaeng Hang Maeo បានរៀបរាប់ទាំងក្តុកក្តួលថា ទឹកជំនន់បានជន់លិចដក់ជាប់នៅក្នុងចម្ការរបស់លោកអស់រយៈពេល ៦ ថ្ងៃពេញ ក្នុងកម្ពស់ជ្រៅរហូតដល់ទៅ ៤ ទៅ ៥ ម៉ែត្រ។ បន្ទាប់ពីទឹកស្រកចុះទៅវិញ ដើមធុរេនទាំងអស់បានប្រែជាក្រៀមស្វិត និងងាប់ស្រោចពេញចម្ការ ដែលធ្វើឱ្យដើមទុនវិនិយោគរាប់សិបម៉ឺនដុល្លារត្រូវរលាយបាត់បង់ដូចផ្សែង។ កសិករដែលត្រូវបង្ខំចិត្តកាប់រំលាយដើមងាប់ចោល គឺត្រូវរង់ចាំរយៈពេលរហូតដល់ទៅ ៥ ទៅ ៦ ឆ្នាំឯណោះ ទើបដើមថ្មីអាចចាប់ផ្តើមផ្តល់ផលផ្លែផ្កាឡើងវិញ។

គ្រោះធម្មជាតិនេះបានក្លាយជាវិបត្តិ «ដំបៅជាន់លើដំបៅ» យ៉ាងពិតប្រាកដ ព្រោះមុនពេលទឹកជំនន់វាយប្រហារ វិស័យកសិកម្មធុរេនថៃនៅក្នុងឆ្នាំនេះ ក៏កំពុងតែជួបប្រទះបញ្ហារាំងស្ទះច្រកព្រំដែន និងពិបាកនាំចេញទៅកាន់ទីផ្សារអន្តរជាតិ (ជាពិសេសប្រទេសចិន) ដែលធ្វើឱ្យតម្លៃធ្លាក់ចុះយ៉ាងគំហុកស្រាប់ទៅហើយ។ ការបាត់បង់ផលកសិកម្មទាំងស្រុង បូករួមនឹងតម្លៃទីផ្សារដួលរលំ បានរុញច្រានឱ្យគ្រួសារកសិករធ្លាក់ចូលក្នុងស្ថានភាពស្ត្រេស និងវិបត្តិផ្លូវចិត្តយ៉ាងធ្ងន់ធ្ងរ ។ បច្ចុប្បន្ន មន្ត្រីកសិកម្មថៃកំពុងប្រញាប់ប្រញាល់រៀបចំវិធានការសង្គ្រោះបន្ទាន់ ព្រមទាំងធ្វើការសម្របសម្រួលជួយអន្តរាគមន៍លើការបន្ធូរបន្ថយ ឬពន្យារពេលការបង់បំណុលធនាគារ ជូនដល់កសិករដែលកំពុងរងគ្រោះអន្តរាយទាំងនេះ។

គួរបញ្ជាក់ថា វិនាសកម្មចម្ការធុរេននៅក្នុងខេត្តច័ន្ទបុរី គឺជាសោកនាដកម្មសេដ្ឋកិច្ចកសិកម្មដ៏ធ្ងន់ធ្ងរបំផុតមួយរបស់ប្រទេសថៃ។ វិបត្តិទ្វេភាគទាំងគ្រោះធម្មជាតិទឹកជំនន់ និងការធ្លាក់ថ្លៃនៃទីផ្សារនាំចេញ បានបន្សល់ទុកនូវបំណុល និងការខាតបង់ដែលត្រូវចំណាយពេលរាប់ឆ្នាំទើបអាចស្តារឡើងវិញបាន៕