ក្រូចពោធិ៍សាត់ ត្រូវបានចុះបញ្ជីជាម៉ាកសមូហភាពជាផ្លូវការ

ក្រូចពោធិ៍សាត់ គឺជាដំណាំហូបផ្លែដ៏ល្បីល្បាញ និងមានរសជាតិផ្អែមឆ្ងាញ់ប្រចាំប្រទេសកម្ពុជា។

បច្ចុប្បន្ន “ក្រូចពោធិ៍សាត់” ត្រូវបានក្រសួងពាណិជ្ជកម្ម សម្រេចចុះបញ្ជី ជាម៉ាកសមូហភាព (Collective Mark) ជាផ្លូវការ ដែលជាជំហានមួយបន្ថែមទៀតក្នុងការពង្រឹងអត្តសញ្ញាណ និងលើកកម្ពស់ការទទួលស្គាល់ផលិតផលខ្មែរនៅលើទីផ្សារក្នុងប្រទេស និងអន្តរជាតិ ព្រមទាំងរួមចំណែកការពារកម្មសិទ្ធិបញ្ញារបស់សហគមន៍អ្នកដាំដុះ និងអាជីវករក្រូចពោធិ៍សាត់ ក្នុងខេត្តពោធិ៍សាត់។

ក្រូចពោធិ៍សាត់មានផ្ទៃដីដាំដុះសរុបចំនួន ៣ ០៤៧ ហិកតា ក្នុងនោះ ផ្ទៃដីប្រមូលផលមានចំនួន ១ ៩៣៨ ហិកតា ដោយផ្តល់បរិមាណផលប្រមាណ ២៩ ៨៨១ តោនក្នុងមួយឆ្នាំ។

ដោយឡែកការប្រមូលផល គឺមានរយៈពេល ៨ ខែ ចាប់ពីខែមិថុនា ដល់ខែវិច្ឆិកា ជារៀងរាល់ឆ្នាំ និងផ្តល់ទិន្នផលជាមធ្យមពី ១២ ទៅ ១៦ តោនក្នុងមួយហិកតា។

គួរបញ្ជាក់ថា ដំណាំក្រូចពោធិ៍សាត់ ដើមកំណើតនៅក្នុងសម័យអាណានិគម និយមបារាំង ដែលបារាំងបានយកមកដាំនៅស្រុកភ្នំក្រវាញ ហើយនៅពេលនោះ មិនដឹងឈ្មោះអ្វី ក៏ហៅថា”ក្រូចពោធិ៍សាត់”។ ឈ្មោះនេះក៏បានហៅតៗរហូតមកដល់សព្វថ្ងៃ៕