ប៊ឺរី វិលមកកាន់អាជីពសិល្បៈវិញក្រោយបែកស្នេហ៍ជាមួយ ម៉ាដាម ដា

តារាសម្តែង បឺរី បានវិលមកកាន់អាជីពសិល្បៈវិញហើយបន្ទាប់ពីបែកស្នេហ៍ជាមួយនឹង ម៉ាដាម ដា និងបានឃ្លាតពីអាជីពនេះជាង២ឆ្នាំ។ ចាប់ផ្តើមឡើងវិញលើវិថីនេះ បឺរី បានសម្តែង MV ជាមួយនឹងតារាចម្រៀង ប៉ាច គីមមួយ។

កន្លងមកក្នុងអំឡុងពេលដែល ប៊ឺរី មានទំនាក់ទំនងស្នេហាជាមួយអ្នកលក់អនឡាញ ម៉ាដាម ដា គេសង្កេតឃើញថាលោកមិនសូវមានសកម្មភាពក្នុងវិស័យសិល្បៈជាដុំកំភួននោះទេ។ ផ្ទុយទៅវិញលោកបានបង្ហាញវត្តមានតាមរយៈការថតផ្សព្វផ្សាយផលិតផល និងជួយ Live ជាមួយ ម៉ាដាម ដា ជាប្រចាំ។ ទោះយ៉ាងណា បន្ទាប់ពីប្រកាសបែកស្នេហ៍ជាមួយនឹងអ្នកលក់អនឡាញរូបនេះ បឺរី បានចាប់ផ្តើមជាមួយនឹងអាជីពសិល្បៈរបស់លោកឡើងវិញហើយ។

កាលពីពេលថ្មីៗនេះ បឺរី បានបង្ហោះវីដេអូមួយដែលបង្ហាញពីតួអង្គរបស់លោកកំពុងតែសាសងគ្នាក្នុងរបៀបជាគូស្នេហ៍ជាមួយនឹងតារាចម្រៀង ប៉ាច គីមមួយ ក្នុង MV សម្រាប់ពិធីបុណ្យភ្ជុំបិណ្ឌ។ តារាប្រុសរូបនេះក៏បានភ្ជាប់មកជាមួយនឹងពាក្យក្នុងចិត្តថា «ត្រឡប់មកកាន់ការងារចាស់ ដែលខ្ញុំស្រលាញ់បំផុត។ ខានជាង២ឆ្នាំហើយ មកវិញដូចគាំងៗក្បាច់ អាវុធចេញមិនសូវធ្ងន់ ហើយឆាប់អស់ស៊ូស»។

ទោះបីជា បឺរី បញ្ជាក់ពីការស្រលាញ់និងការសម្តែងមិនទាន់ស្ទាត់និងពេញលេញដូចមុនប្រិយមិត្តមួយចំនួនក៏បានបង្ហាញការអបអរចំពោះតារាប្រុសរូបនេះដែលឃើញលោកវិលមកកាន់អាជីពសិល្បៈវិញ។

បឺរី គឺជាតារាសម្តែងលេចធ្លោមួយរូបដែលគ្រងតំណែងជាតួឯកនៅក្នុងខ្សែភាពយន្តខ្មែរជាច្រើនដូចជា «ថ្ងៃមុនស្អប់ ថ្ងៃនេះស្រលាញ់» «ហ្គេមជីវិត» «ម្តាយ២» «ខោល» និងស្នាដៃមួយចំនួនទៀត។

ការបង្ហាញខ្លួនក្នុង MV ជាមួយនឹងតារាចម្រៀង ប៉ាច គីមមួយ អាចបង្ហាញថា បឺរី កំពុងចាប់ផ្តើមដំណាក់កាលអាជីពរបស់ខ្លួនឡើងវិញបន្តិចម្តងៗមុននឹងឈានដល់ការសម្តែងក្នុងវិស័យភាពយន្ត៕