ក្តៅៗ! ធ្លាយពាក្យចចាមអារ៉ាមថា T.O.P និងតារាសម្ដែង Nana កំពុងមានទំនាក់ទំនងស្នេហា

ពិភពកម្សាន្តកូរ៉េខាងត្បូងកំពុងទទួលបានការចាប់អារម្មណ៍ជាថ្មីទៅលើ T.O.P អតីតសមាជិក BIGBANG និង Nana អតីតសមាជិក After School បន្ទាប់ពីមានសេចក្ដីរាយការណ៍ថា អ្នកទាំងពីរកំពុងមានទំនាក់ទំនងស្នេហាជាមួយគ្នា។ តាមការចុះផ្សាយរបស់សារព័ត៌មានកូរ៉េ Dispatch បានបង្ហាញរូបថតដែលត្រូវបានរាយការណ៍ថា T.O.P និង Nana បានចំណាយពេលជួបជុំគ្នាជាច្រើនលើករួមទាំងនៅតំបន់ក្បែរលំនៅដ្ឋានរបស់ Nana ក្នុងទីក្រុង Guri។ ក្រោយមកក្រុមហ៊ុនគ្រប់គ្រងអ្នកទាំងពីរបានទទួលស្គាល់ថាពួកគេកំពុងមានទំនាក់ទំនងគ្នាពិតមែន។

ប្រភពក្នុងសេចក្ដីរាយការណ៍បានឱ្យដឹងថា អ្នកទាំងពីរបានស្គាល់គ្នាជាលើកដំបូងនៅ ខែមករា ឆ្នាំ ២០២៦ បន្ទាប់ពី Nana បានចូលរួមសម្ដែងក្នុងវីដេអូចម្រៀង «Studio54» របស់ T.O.P។ ការសហការនេះត្រូវបានគេចាត់ទុកថាជាចំណុចសំខាន់មួយក្នុងការធ្វើឱ្យអ្នកទាំងពីរមានឱកាសស្គាល់ និងធ្វើការជាមួយគ្នាកាន់តែច្រើន។ Nana បានបង្ហាញខ្លួនជាតួសំខាន់ក្នុង MV ខណៈ T.O.P ទទួលបន្ទុកផ្នែកតន្ត្រី និងការងារដែលពាក់ព័ន្ធនឹងគម្រោងនេះ។

បន្ទាប់ពីការសហការក្នុង MV អ្នកទាំងពីរក៏បានបង្ហាញខ្លួនជាមួយគ្នាម្ដងទៀតក្នុង មាតិកា YouTube របស់ T.O.P កាលពីខែមេសា ឆ្នាំ ២០២៦។ ក្នុងវីដេអូនោះ T.O.P និង Nana បានអង្គុយជាមួយគ្នា ញ៉ាំអាហារ និងស្ដាប់អាល់ប៊ុមរបស់ T.O.P ព្រមទាំងពិភាក្សាអំពីតន្ត្រី និងការងាររបស់លោក។

ការបង្ហាញខ្លួនរួមគ្នានេះបានធ្វើឱ្យអ្នកគាំទ្រចាប់អារម្មណ៍ជាពិសេសទៅលើសកម្មភាពរបស់អ្នកទាំងពីរ។ ការស្លៀកពាក់ដែលមានភាពស្រដៀងគ្នា និងបរិយាកាសស្និទ្ធស្នាលក្នុងវីដេអូ ក៏បានធ្វើឱ្យមានការពិភាក្សានៅលើបណ្ដាញសង្គមថា តើទំនាក់ទំនងរបស់ពួកគេអាចលើសពីការងារឬយ៉ាងណា។
ប៉ុន្តែរឿងបានកាន់តែមានការចាប់អារម្មណ៍ បន្ទាប់ពីមានសេចក្ដីរាយការណ៍ថា T.O.P និង Nana ត្រូវបានគេឃើញចំណាយពេលជាមួយគ្នាក្រៅពេលធ្វើការ។ របាយការណ៍ខ្លះបានអះអាងថា អ្នកទាំងពីរបានបន្តទំនាក់ទំនងគ្នាបន្ទាប់ពីបញ្ចប់ការងាររួមគ្នា ហើយត្រូវបានរាយការណ៍ថា បានចាប់ផ្ដើមទំនាក់ទំនងក្នុងនាមជាគូស្នេហ៍នៅប្រហែលខែមិថុនា ឆ្នាំ ២០២៦។

គួរឱ្យកត់សម្គាល់ថា T.O.P និង Nana សុទ្ធតែជាតារាដែលមានបទពិសោធន៍យូរឆ្នាំក្នុងវិស័យកម្សាន្តកូរ៉េ។ T.O.P បានកសាងកេរ្តិ៍ឈ្មោះជាសមាជិក BIGBANG ខណៈ Nana ល្បីល្បាញតាំងពីសម័យសមាជិកក្រុម After School ហើយក្រោយមកបានពង្រីកអាជីពទៅកាន់វិស័យសម្ដែង។ ថ្មីៗនេះនាងទើបបង្ហាញខ្លួននៅក្នុងរឿង«The Scandal»។ ការដែលអ្នកទាំងពីរមានបទពិសោធន៍ក្នុងវិស័យតន្ត្រី និងការសម្ដែងដូចគ្នា ក៏បានធ្វើឱ្យការសហការរបស់ពួកគេក្នុង MV និងកម្មវិធី YouTube ទទួលបានការចាប់អារម្មណ៍ពីអ្នកគាំទ្រ៕