ចំពេលមានការចាប់អារម្មណ៍ជុំវិញអនាគតរបស់ Cristiano Ronaldo ជាមួយក្រុមជម្រើសជាតិព័រទុយហ្គាល់ តារាចម្រៀង ចេន បានបង្ហោះសារលើបណ្តាញសង្គមដោយលើកឡើងពីតម្លៃនៃស្នាដៃ កិត្តិយស និងការផ្លាស់ប្តូរទស្សនៈរបស់មនុស្សចំពោះបុគ្គលម្នាក់ នៅពេលដែលរូបគេចាប់ផ្តើមធ្លាក់ចុះតាមអាយុ ឬសមត្ថភាព។ មុននោះ Ronaldo ត្រូវបានគេរាយការណ៍ថាលោកបានចាកចេញពីជំរុំហ្វឹកហាត់ក្រុមជម្រើសជាតិព័រទុយហ្គាល់ហើយលោកបានបញ្ជាក់ថាពេលវេលាសមស្រប លោកនឹងប្រាប់ប្រជាជនព័រទុយហ្គាល់អំពី «ការពិត» នៃមូលហេតុដែលលោកចាកចេញ។
.png)
នៅថ្ងៃទី១ ខែតុលា តារាចម្រៀង ចេន ម្ចាស់បទ «ពងទា» បានបង្ហោះរូបកីឡាបាលទាត់ Ronaldo និងបានលើកឡើងថា «គ្រប់យ៉ាងបានបង្ហាញច្បាស់ណាស់ពីចិត្តមនុស្ស ខ្ញុំនិងគាត់មិនខុសគ្នាទេជាមួយការខកចិត្ត»។ លោកថា ទោះបីមនុស្សម្នាក់ធ្លាប់សាងស្នាដៃ និងសមិទ្ធផលធំធេងប៉ុណ្ណាក៏ដោយ នៅពេលឈានដល់ដំណាក់កាលធ្លាក់ចុះ មនុស្សមួយចំនួនអាចឈប់ផ្តល់តម្លៃ ឬភ្លេចស្នាដៃដែលធ្លាប់បានបង្កើតឡើងយ៉ាងឆាប់រហ័ស។
លោកបានសរសេរថា «ទោះបីយើងសាងស្នាដៃ សមិទ្ធផលអស្ចារ្យធំប៉ុណ្ណា ច្រើនប៉ុណ្ណា និងល្បីប៉ុណ្ណាក៏ដោយ នៅថ្ងៃដែលយើងធ្លាក់ ដោយធម្មជាតិនៃវ័យ ឬដោយមូលហេតុអ្វីក៏ដោយ មនុស្សនឹងលែងឱ្យតម្លៃយើង។ មនុស្សភ្លេចយើងលឿនណាស់»។
តាមរយៈសាររបស់ ចេន បានយក Cristiano Ronaldo ជាឧទាហរណ៍ ដោយលើកឡើងពីស្នាដៃដ៏ធំធេងរបស់កីឡាករព័រទុយហ្គាល់រូបនេះក្នុងប្រវត្តិសាស្ត្របាល់ទាត់។ លោកបានសង្កត់ធ្ងន់ថា សូម្បីតែកីឡាករដែលធ្លាប់សាងប្រវត្តិសាស្ត្រ និងរកគ្រាប់បាល់បានយ៉ាងច្រើន ក៏អាចប្រឈមនឹងការរិះគន់ និងការថយចុះនៃការគាំទ្រ នៅពេលឈានដល់ដំណាក់កាលចុងក្រោយនៃអាជីព។ តារាចម្រៀង ចេន បានបន្ថែមថា ប្រសិនបើមនុស្សម្នាក់ដែលធ្លាប់មានស្នាដៃដ៏ធំធេងដូច Ronaldo នៅតែអាចជួបការរិះគន់ និងការមើលរំលង នោះមនុស្សទូទៅដែលមានស្នាដៃត្រឹមកម្រិតក្នុងប្រទេស ក៏គួរតែយល់ថា ការទទួលស្គាល់ពីសង្គមអាចផ្លាស់ប្តូរបាន។
.png)
ជាមួយគ្នានេះ ចេន ក៏បានបញ្ចេញមតិផ្ទាល់ខ្លួនចំពោះស្ថានភាពរបស់ Ronaldo ក្នុងក្រុមជម្រើសជាតិព័រទុយហ្គាល់ ដោយអះអាងថា ឥទ្ធិពលរបស់ Ronaldo លើក្រុមជម្រើសជាតិបានថយចុះជាយូរមកហើយ។ លោកយល់ថា ការដែល Ronaldo នៅតែបន្តពាក់ព័ន្ធជាមួយក្រុមជម្រើសជាតិ អាចមានផ្នែកមួយពាក់ព័ន្ធនឹងប្រជាប្រិយភាព និងការចាប់អារម្មណ៍របស់អ្នកទស្សនា។
.png)
ម្ចាស់បទ«ប្រុសម្នាក់នេះសំខាន់នៅពេលណា?» ក៏បានលើកឡើងពីទស្សនៈដែលថាការប្រកួតរបស់ព័រទុយហ្គាល់អាចទទួលបានការចាប់អារម្មណ៍ខុសគ្នា ប្រសិនបើគ្មាន Ronaldo ចូលរួម៕
