Liu Yifei និង Zhao Lusi ជាប់ក្នុងពាក្យចចាមអារ៉ាមការកាត់បន្ថយតម្លៃខ្លួនក្នុងគម្រោងភាពយន្ត

យោងតាមប្រព័ន្ធផ្សព្វផ្សាយចិនប្រភពមួយក្នុងឧស្សាហកម្មកម្សាន្តថ្មីៗនេះបានបង្ហាញថា កាលពីប៉ុន្មានឆ្នាំមុនតម្លៃខ្លួនរបស់តារាសម្ដែងស្រីឈានមុខគេម្នាក់បានឡើងដល់រាប់សិបលានយ័នប៉ន្តែតម្លៃដែលបានដាក់ស្នើសម្រាប់គម្រោងថ្មីៗនេះគឺត្រឹមតែប្រហែល ១លានយ័នប្រមាណជិត១៥ម៉ឺនដុល្លារប៉ុណ្ណោះ។

ព័ត៌មាននេះបានឡើងដល់កំពូលនៃចំណាត់ថ្នាក់ស្វែងរកនៅលើ Weibo យ៉ាងឆាប់រហ័ស ដែលបង្កឱ្យមានការភ្ញាក់ផ្អើលនៅលើបណ្តាញសង្គម។ អ្នកលេងអ៊ីនធឺណិតមួយចំនួនបានសង្ស័យថា តារាល្បីៗដូចជា Liu Yifei, Zhao Lusi និង Li Yitong អាចមានជាប់ពាក់ព័ន្ធ ព្រោះតារាសម្តែងទាំងនេះត្រូវបានគេរាយការណ៍ថាបានទទួលប្រាក់កម្រៃរាប់សិបលានយ័នកាលពីអតីតកាល។

ទោះជាយ៉ាងណាក៏ដោយ អ្នកទស្សនាផ្សេងទៀត និងអ្នកនៅក្នុងឧស្សាហកម្មមួយចំនួនបានអះអាងថា ការធ្លាក់ចុះប្រាក់ខែពីរាប់សិបលានយន់មកត្រឹម ១លានយ័នគឺខ្លាំងពេក និងមិនសមរម្យដោយសារស្ថានភាពបច្ចុប្បន្ននៃទីផ្សាររឿងភាគទូរទស្សន៍។ បន្ទាប់ពីគោលនយោបាយគ្រប់គ្រងប្រាក់ខែរបស់តារាសម្តែង និងសម្ពាធពីវេទិកានានាដើម្បី «កាត់បន្ថយថ្លៃដើម និងបង្កើនប្រសិទ្ធភាព» ថ្លៃសេវារបស់តារាសម្តែងជាទូទៅត្រូវបានកែតម្រូវចុះក្រោម។

យោងតាមប្រភពឧស្សាហកម្មមួយចំនួន តម្លៃខ្លួនរបស់តារាសម្តែងកំពូលសម្រាប់រឿងភាគទូរទស្សន៍ ដែលមានកម្រិតខ្ពស់បំផុតរាប់រយលានយន់ ឥឡូវនេះបានធ្លាក់ចុះមកត្រឹមប្រហែល ២៥ លានយ័នប្រមាណ៣.៧លានដុល្លារ ប៉ុន្តែចំនួននេះនៅតែឆ្ងាយពីកម្រិតនៃពាក្យចចាមអារ៉ាមចំនួន១លានយ័ន។

ទីផ្សារសម្រាប់រឿងភាគទូរទស្សន៍ក៏កំពុងរួមតូចផងដែរ។ នៅក្នុងត្រីមាសទីមួយនៃឆ្នាំ ២០២៦ មានតែរឿងភាគចំនួន ២៨ប៉ុណ្ណោះដែលបានចាប់ផ្តើមថតនៅលើវេទិកាសំខាន់ៗចំនួន៤របស់ប្រទេសចិន ដែលជាការថយចុះគួរឱ្យកត់សម្គាល់បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ ការផ្គត់ផ្គង់គម្រោងដែលថយចុះកំពុងធ្វើឱ្យតារាសម្តែងបាត់បង់អំណាចចរចារបស់ពួកគេក្នុងការចរចាប្រាក់ខែ។ ទន្ទឹមនឹងនេះ ការអភិវឌ្ឍយ៉ាងឆាប់រហ័សនៃខ្សែភាពយន្តខ្លី AI ដែលមានតម្លៃទាបកំពុងប្រកួតប្រជែងដោយផ្ទាល់ជាមួយនឹងរឿងភាគទូរទស្សន៍បែបសកម្មភាពផ្ទាល់។ នេះត្រូវបានគេជឿថាជាកត្តាមួយដែលដាក់សម្ពាធលើប្រាក់ខែរបស់តារាសម្តែង។

យ៉ាងណាក៏ដោយ មតិសាធារណៈនៅតែមានភាពច្របូកច្របល់ទាក់ទងនឹងដំណឹងនៃការកាត់បន្ថយប្រាក់ខែសម្រាប់តារាល្បីៗ។ អ្នកខ្លះអះអាងថា សូម្បីតែប្រាក់ចំណូល ១លានយ័នក៏នៅតែជាចំនួនទឹកប្រាក់ដែលកម្មករធម្មតាភាគច្រើនពិបាករកបានក្នុងរយៈពេលជាច្រើនឆ្នាំ។ ដូច្នេះ ការកាត់បន្ថយប្រាក់ខែរបស់តារាសម្តែងមិនទទួលបានការអាណិតអាសូរពីអ្នកនិយមលេងអ៊ីនធឺណិតមួយក្រុមនោះទេ។ អ្នកវិភាគមួយចំនួនបានលើកឡើងថា ការធ្លាក់ចុះនៃប្រាក់ខែគឺជាសញ្ញាមួយដែលបង្ហាញថា ទីផ្សារកំពុងលុបបំបាត់ថ្លៃសេវាដែលកើនឡើងខ្ពស់ និងនាំប្រាក់ចំណូលរបស់តារាសម្តែងឱ្យដល់កម្រិតសមហេតុផលជាងមុន។

ទោះជាយ៉ាងណាក៏ដោយ ក្រុមមួយផ្សេងទៀតបានចង្អុលបង្ហាញថា ការកាត់បន្ថយប្រាក់ខែមិនបានបង្ហាញពីភាពប្រសើរឡើងគួរឱ្យកត់សម្គាល់នៃគុណភាពខ្សែភាពយន្តនោះទេ ហើយការសន្សំថវិកាអាចត្រូវបានប្រើជាចម្បងដើម្បីទូទាត់សងការខាតបង់នៃវេទិកានានា៕