អ៊ិន លក្ខិណា មកពីប្រកួតវិញរូតរះបង្ហាញការដឹងគុណ ទេព បូព្រឹក្ស និងអ្នកជួយជ្រោមជ្រែងផ្សេងទៀត

ក្រោយបើកទ្វារកម្ពុជាចូល TOP 40 លើកដំបូងក្នុងប្រវត្តិសាស្រ្តនៃកម្មវិធីប្រកួតសម្រស់ Miss World អ៊ិន លក្ខិណា បានបង្ហាញពីការដឹងគុណរបស់ខ្លួនទៅកាន់លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី តារាចម្រៀង ទេព បូព្រឹក្ស ចែតាបារាំង និងអ្នកមួយចំនួនទៀត ដែលបានជួយជ្រោមជ្រែងផ្តល់ទាំងកម្លាំងចិត្តនិងថវិកាសម្រាប់ការបោះឆ្នោតឱ្យនាង។

បន្ទាប់ពីវិលត្រឡប់មកពីការប្រកួតនៅឯប្រទេសវៀតណាម នាពេលថ្មីៗនេះ អ៊ិន លក្ខិណា បានចាប់ផ្តើមដំណើរជាបន្តបន្ទាប់ជាមួយនឹងកន្រ្តកផ្កាបង្ហាញពីការដឹងគុណទៅកាន់មនុស្សសំខាន់ៗដែលជួយជ្រោមជ្រែងនាងក្នុងការប្រកួតកន្លងមកនេះ។ Miss World Cambodia 2026 បានបង្ហាញការដឹងគុណដំបូងគេទៅកាន់ ទេព បូព្រឹក្ស ជាមួយនឹងការអបអរសាទរសមិទ្ធផលថ្មីក្នុងការបើកម៉ាតរបស់តារាចម្រៀងរូបនេះ។ ទេព បូព្រឹក្ស បាននិយាយដោយសិទ្ធិស្នាលថាខ្លួនគាំទ្រ លក្ខិណា សឹងតែមួយជីវិតទៅហើយដោយនាងប្រលងតាំងពីតូចដល់ធំ។

តារាចម្រៀង ទេព បូព្រឹក្ស ក៏បានបង្ហាញការសប្បាយចិត្តដែល អ៊ិន លក្ខិណា បានឈានដល់ TOP នៅក្នុងការប្រកួតដែលជាប្រវត្តិសាស្រ្តសម្រាប់ប្រទេសកម្ពុជាហើយ លក្ខិណា មានការតស៊ូនិងសាច់កម្មមិនខុសពីជីវិតខ្លួនឡើយ។

ក្រៅពីមានជាកន្រ្តកផ្កាជូនទៅកាន់តារាចម្រៀង ទេព បូព្រឹក្ស អ៊ិន លក្ខិណា ក៏បានជូនកន្រ្តកផ្កាទៅកាន់ ចែតាបារាំង លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី រួមទាំងអ្នកជួយជ្រោមជ្រែងនាងផ្សេងទៀត។

នេះបង្ហាញពីការដឹងគុណរបស់ អ៊ិន លក្ខិណា ដែលជា Miss World Cambodia 2026 សម្រាប់ការប្រកួតរបស់នាងដែលសមិទ្ធផលនីមួយៗកើតឡើងគឺទាំងការខិតខំរបស់នាងផ្ទាល់ ការគាំទ្រពីទស្សនិកជន និងអ្នកឧបត្ថម្ភមួយចំនួនទៀតដែលចំណាយថវិកាជួយបោះឆ្នោតដើម្បីជាមុខមាត់ប្រទេសជាតិទាំងមូល។ សកម្មភាពនេះក៏ជាភាពគំរូមួយទៅកាន់បវរកញ្ញាដទៃទៀតឱ្យមានការដឹងគុណអ្នកដែលជួយខ្លួន៕