បន្ទាប់ពីភ្ជាប់ពាក្យបានជាង៧ខែពេលនេះតារាចម្រៀង វណ្ណថាន ម្ចាស់បទ «កំលោះស្រុកខ្មែរ» ត្រៀមខ្លួនក្លាយជាឪពុកគេនិងស្វាគមន៍កូនដំបូងរបស់លោកជាមួយនឹងគូដណ្តឹង។ តារាចម្រៀង វណ្ណថាន បានបង្ហោះវីដេអូដោយផ្ទាល់ជាមួយនឹងការពរពោះរបស់គូដណ្តឹងក្នុងថ្ងៃខួបកំណើតលោក។
គេចាំបានថាកាលពីថ្ងៃទី ២៩ ខែធ្នូ ឆ្នាំ២០២៥ តារាចម្រៀង វណ្ណថាន បានរៀបចំកម្មវិធីភ្ជាប់ពាក្យជាមួយនឹងកញ្ញា ចាំ សនលីហ្សា ជាកូនអ្នកខេត្តស្វាយរៀង ហើយនាងធ្លាប់ជាតារាម៉ូដែលមួយរូបដែលមានសម្រស់ស្រស់ស្អាតផងដែរ។ កម្មវិធីរបស់ទាំងពីរបានប្រព្រឹត្តទៅនៅគេហដ្ឋានខាងស្រីដោយមានការចូលរួមពីមិត្តរួមអាជីពដូចជា វណ្ណដា យូហៃ ឌីជេក្តិប និងអ្នកមួយចំនួនទៀត។
បន្ទាប់ពីភ្ជាប់ពាក្យមានការដឹងឮពីចាស់ទុំទាំងសងខាង ទាំងតារាចម្រៀង វណ្ណថាន និង លីហ្សា បានរក្សាជីវិតឯកជនរបស់ខ្លួនដោយពុំសូវបង្ហាញរូបភាពគូនៅលើបណ្តាញសង្គមដូចគូស្នេហ៍មួយចំនួននោះទេ។ យ៉ាងណាក៏ដោយ នាឱកាសថ្ងៃខួបកំណើតរបស់ តារាចម្រៀង វណ្ណថាន នាថ្ងៃទី៩ ខែកញ្ញា លីហ្សា បានបង្ហោះរូបភាពជូនពរគូដណ្តឹងរបស់ខ្លួនជាមួយនឹងនំខួបកំណើត អបដោយការជូនពរ និងការផ្តល់ស្នាមថើបឱ្យគ្នា។
ក្រៅពីរូបភាពផ្អែមល្ហែម វណ្ណថាន ក៏បានបង្ហោះវីដេអូនៅលើ Story ដែលបង្ហាញពីគូដណ្តឹងរបស់ខ្លួនដែលកំពុងពរពោះដែលទំនងមិនយូរទៀតទេអ្នកទាំងពីរនឹងបានជួបមុខកូនដំបូងរបស់ខ្លួនវិញហើយ។
គួរបញ្ជាក់ផងដែរថា វណ្ណថាន បានសាងភាពល្បីល្បាញខ្លាំងតាមរយៈបទ«កំលោះស្រុកខ្មែរ» ដែលសហការជាមួយនឹង វណ្ណដា ហើយបទនេះមកទល់ពេលនេះមានការស្តាប់រហូតដល់ទៅ ១១៧លានដង។ លើសពីនេះលោកត្រូវបានទស្សនិកជនស្គាល់ថាជាសិល្បករដែលពូកែខ្លាំងទៅលើឧបករណ៍បុរាណនិងសម័យ៕
