ការស៊ើបអង្កេតលើ Kim Soo Hyun និង Kim Sae Ron បានបញ្ចប់ហើយ

នៅថ្ងៃទី៨ ខែកញ្ញា ប្រព័ន្ធផ្សព្វផ្សាយកូរ៉េខាងត្បូងបានរាយការណ៍ថា ការស៊ើបអង្កេតលើលើ Kim Soo Hyun ទាក់ទងនឹងការចោទប្រកាន់ពីបទរំលោភលើច្បាប់សុខុមាលភាពកុមារ បានបញ្ចប់ជាស្ថាពរបន្ទាប់ពីប្រហែល ១ ឆ្នាំ និង ៤ ខែ។ ការិយាល័យរដ្ឋអាជ្ញាទីក្រុងសេអ៊ូលខាងកើតមិនបានស្នើសុំការស៊ើបអង្កេត ឬការស៊ើបអង្កេតឡើងវិញបន្ថែមទៀតទេ ហើយបានប្រគល់សំណុំរឿងទៅឱ្យប៉ូលិសវិញ។

តាមប្រភពព័ត៌មានកូរ៉េខាងត្បូង ស្ថានីយប៉ូលិស Seongdong ក្នុងទីក្រុងសេអ៊ូល បានសម្រេចកាលពីថ្ងៃទី ២៩ ខែកក្កដា ឆ្នាំ២០២៦ មិនបញ្ជូនសំណុំរឿងរបស់ Kim Soo Hyun ទៅកាន់ការិយាល័យរដ្ឋអាជ្ញាដោយសាររកឃើញថាមិនមានភស្តុតាងគ្រប់គ្រាន់សម្រាប់បញ្ជាក់ការចោទប្រកាន់។ បន្ទាប់មករដ្ឋអាជ្ញាបានពិនិត្យសំណុំរឿងហើយនៅថ្ងៃទី ៣ ខែកញ្ញា បានប្រគល់ឯកសារត្រឡប់ទៅប៉ូលិសវិញ ដោយមិនស្នើការស៊ើបអង្កេតបន្ថែម។

ការស៊ើបអង្កេតនេះបានចាប់ផ្តើមបន្ទាប់ពីគ្រួសាររបស់ Kim Sae Ron ដាក់ពាក្យប្តឹងក្នុងខែឧសភា ឆ្នាំ២០២៥ ដោយចោទប្រកាន់ថា Kim Soo Hyun មានទំនាក់ទំនងជាមួយ Kim Sae Ron នៅពេលនាងនៅក្រោមអាយុ ១៨ឆ្នាំនិងមានអំពើដែលអាចពាក់ព័ន្ធនឹងការរំលោភបំពានផ្លូវភេទ និងផ្លូវអារម្មណ៍។ Kim Soo Hyun បានបដិសេធការចោទប្រកាន់នេះដោយទទួលស្គាល់ថាមានទំនាក់ទំនងនៅពេលនាងគ្រប់អាយុ។ ក្នុងអំឡុងពេលស៊ើបអង្កេត ប៉ូលិសបានពិនិត្យឯកសារ សក្ខីកម្ម និងសម្ភារៈផ្សេងៗដែលត្រូវបានដាក់ជាភស្តុតាង។

ប្រភពសារព័ត៌មានកូរ៉េរាយការណ៍ថា អាជ្ញាធរបានចាត់ទុកសំឡេងមួយដែលត្រូវបានអះអាងថាជាសំឡេងរបស់ Kim Sae Ron ថា មានការកែច្នៃ ឬប្រើប្រាស់បច្ចេកវិទ្យា AI ហើយសារដែលត្រូវបានអះអាងថាជាការសន្ទនាតាម KakaoTalk ក៏ត្រូវបានស៊ើបអង្កេត និងចាត់ទុកថាមិនអាចប្រើជាភស្តុតាងគាំទ្រការចោទប្រកាន់បាន។

ការសម្រេចរបស់ប៉ូលិសកាលពីថ្ងៃទី ២៩ ខែកក្កដា គឺ មិនបញ្ជូនសំណុំរឿងទៅរដ្ឋអាជ្ញា ដោយសារភស្តុតាងមិនគ្រប់គ្រាន់។ បន្ទាប់ពីរដ្ឋអាជ្ញាពិនិត្យសំណុំរឿង ហើយមិនស្នើឱ្យមានការស៊ើបអង្កេតបន្ថែម ការសម្រេចមិនបញ្ជូនសំណុំរឿងរបស់ប៉ូលិសនៅតែមានប្រសិទ្ធភាព។ ដូច្នេះ ប្រព័ន្ធផ្សព្វផ្សាយកូរ៉េកំពុងរាយការណ៍ថា ដំណើរការស៊ើបអង្កេតបាន បញ្ចប់ជាក់ស្តែង បន្ទាប់ពីប្រហែល ១ ឆ្នាំ ៤ ខែ។ ទោះជាយ៉ាងណាប្រភពព័ត៌មានក៏បញ្ជាក់ថា ភាគីដើមបណ្តឹងនៅតែអាចប្រើសិទ្ធិតាមនីតិវិធីច្បាប់ ប្រសិនបើច្បាប់អនុញ្ញាត។

ការស៊ើបអង្កេតលើ Kim Soo Hyun បានបញ្ចប់ទៅហើយដោយបើកផ្លូវឱ្យតារាសម្តែងរូបនេះបន្តសកម្មភាពរបស់ខ្លួននៅក្នុងប្រទេសកូរ៉េខាងត្បូង។ ទោះជាយ៉ាងណាក៏ដោយ ការវិលត្រឡប់របស់តារាប្រុសរូបនេះបានទទួលប្រតិកម្មចម្រុះពីសាធារណជនបន្ទាប់ពីរយៈពេលដ៏ចម្រូងចម្រាសនៃជីវិតឯកជនកន្លងមកនេះ៕