នៅក្នុងបរិបទសង្គមបច្ចុប្បន្ន ដែលពេញដោយការប្រកួតប្រជែង ភាពតានតឹងពីការងារ និងសម្ពាធជីវភាព យុវជនកម្ពុជាក៏ដូចជាយុវជនជុំវិញពិភពលោកជាច្រើន កំពុងជួបប្រទះនូវវិបត្តិអស់កម្លាំងល្ហិតល្ហៃផ្លូវចិត្ត ឬដែលហៅថា Burnout។ យ៉ាងណាមិញ ដើម្បីគិចវេសពីបញ្ហានេះ ជម្រើសដេកស្ពឹកនៅលើគ្រែ (Bed Rotting) បានក្លាយជារឿងដ៏ពេញនិយមបំផុតមួយសម្រាប់ Gen Z និង Millennials នៅរៀងរាល់ថ្ងៃចុងសប្តាហ៍ ឬថ្ងៃឈប់សម្រាកពីការងារ។.jpg)
ទម្លាប់នេះស្ដែងឡើងតាមរយៈការចំណាយពេលពេញមួយថ្ងៃ ឬពេញមួយចុងសប្តាហ៍ ដេកនៅលើគ្រែ ចុចមើល TikTok, Reels, មើលរឿងភាគតាម Netflix និងកុម្ម៉ង់អាហារតាម App មកញ៉ាំដល់កន្លែង ដោយមិនព្រមចេញទៅណាទាំងអស់។ សម្រាប់យុវជនក្នុងសម័យឌីជីថល នេះជាវិធីសាស្ត្រសាកថ្មជីវិត ដ៏តម្លៃថោក និងជាកន្លែងសុវត្ថិភាពដើម្បីគេចចេញពីភាពស្មុគស្មាញនៃពិភពខាងក្រៅ។
ទោះជាយ៉ាងណា ផ្អែកលើការអង្កេតរបស់អ្នកជំនាញផ្លូវចិត្ត និងសុខភាព ការសម្រាកបែបអកម្មជ្រុលក្នុងសង្គមទំនើបនេះ បែរជាបង្កើតជាផលវិបាកផ្ទុយមកវិញ៖
ទី១. វិបត្តិនៃការប្រៀបធៀប និងសម្ពាធបណ្តាញសង្គម៖ ការដេកមើលអេក្រង់ទូរស័ព្ទរាប់ម៉ោងជារៀងរាល់ថ្ងៃ ធ្វើឱ្យយុវជនកាន់តែងាយធ្លាក់ចូលទៅក្នុងអន្ទាក់នៃការប្រៀបធៀបជីវិតខ្លួនឯងជាមួយអ្នកដទៃ (FOMO) ដែលនាំឱ្យកើតមានអារម្មណ៍ភ័យព្រួយ ឯកោ និងស្ត្រេសលើសដើម។.jpg)
ទី២. ការរំខាននាឡិកាជីវសាស្ត្ររាងកាយ៖ ការនៅស្ពឹកលើគ្រែស្ទើរតែ ២៤ ម៉ោង ធ្វើឱ្យរាងកាយបាត់បង់ការបែងចែករវាង “ពេលវេលាធ្វើការ” និង “ពេលវេលាគេង”។ លទ្ធផលគឺនៅពេលយប់ ពួកគេប្រឈមនឹងជំងឺគេងមិនលក់ ហើយពេលភ្ញាក់ឡើងនៅថ្ងៃចន្ទ បែរជាមានអារម្មណ៍ល្ហិតល្ហៃ និងគាំងស្មារតី (Brain Fog)។
ទី៣. ការកាត់ផ្តាច់ទំនាក់ទំនងក្នុងពិភពពិត៖ សង្គមបច្ចុប្បន្នបានរញ៉េរញ៉ៃដោយសារការប្រាស្រ័យទាក់ទងតាមបណ្តាញសង្គមស្រាប់ទៅហើយ។ ការជ្រើសរើសពួនសំងំនៅលើគ្រែម្នាក់ឯងកាន់តែធ្វើឱ្យបាត់បង់ការប្រាស្រ័យទាក់ទងផ្ទាល់មុខ ដែលជាកត្តាសំខាន់ក្នុងការជួយសម្រាលវិបត្តិផ្លូវចិត្ត។
.jpg)
អ្នកជំនាញបានសង្កត់ធ្ងន់ថា ក្នុងយុគសម័យដែលជីវិតរត់លឿនបែបនេះ ការសម្រាកពិតប្រាកដមិនមែនជាការផ្តេកខ្លួននៅលើគ្រែនោះទេ។ ផ្ទុយទៅវិញ ការបង្កើតទម្លាប់ សម្រាកបែបសកម្ម (Active Rest) ដូចជា ការបិទអេក្រង់ទូរស័ព្ទ (Digital Detox) ការចេញទៅស្រូបខ្យល់អាកាសបរិសុទ្ធ ធ្វើលំហាត់ប្រាណស្រាលៗ ឬការចំណាយពេលផ្ទាល់ជាមួយមនុស្សជាទីស្រឡាញ់ ទើបជាដំណោះស្រាយដ៏ពិតប្រាកដក្នុងការស្តារថាមពលរាងកាយ និងផ្លូវចិត្តឱ្យមាំទាំឡើងវិញ៕
