ថ្មីៗនេះនៅក្នុងសហគមន៍អនឡាញអ្នកមួយចំនួនប្រាកដជាជ្រាបមកហើយថាតារាចម្រៀង ពេជ្រ សូលីកា និងហាង Diamond Kitchen បានចេញមកបកស្រាយរៀងៗខ្លួនក្នុងនាមតារាចម្រៀងរូបនេះជាអតិថិជន។ ទោះយ៉ាងណាបន្ទាប់ពីផ្ទុះភាពចម្រូងចម្រាសមួយប្រាវជាមួយនឹង ពេជ្រ សូលីកា និងធ្លាយរឿងអាស្រូវមានការចោទប្រកាន់ថាហាងខ្វះអនាម័យពេលនេះគេស្រាប់តែឃើញ Diamond Kitchen ប្រកាសបិទហាងនិងបញ្ចេញតួនាទី Si Dalis ពី BA។
នៅយប់ថ្ងៃទី៧ ខែកញ្ញា Diamond Kitchen បានបង្ហោះវីដេអូចំនួន២ មួយក្នុងចំណោមនោះគឺជាការឆ្លងឆ្លើយរបស់ក្រុមការងារ ពេជ្រ សូលីកា ជាមួយនឹងហាងជុំវិញភាពចម្រូងចម្រាសមកនេះ។ ហាងមួយនេះបានភ្ជាប់ជាមួយនឹងខ្លឹមសារដោយបញ្ជាក់ថាហាងបានធ្វើកំហុស ហើយក៏បានព្យាយាមដោះស្រាយបញ្ហា ដូច្នេះហាងសូមប្រកាសបិទហាងដើម្បីបញ្ចប់រឿងនេះ។ Diamond Kitchen ថារឿងរ៉ាវទាំងឡាយ និងរាល់កំហុសឆ្គងដែលបានកើតឡើង នឹងក្លាយជាមេរៀនដ៏មានតម្លៃជាមេរៀនសម្រាប់ម្ចាស់អាជីវកម្មគ្រប់រូប ក្នុងការសិក្សា កែលម្អ និងអភិវឌ្ឍខ្លួន ដើម្បីផ្តល់នូវផលិតផល និងសេវាកម្មឱ្យកាន់តែប្រសើរឡើងនៅថ្ងៃខាងមុខ។
មុននឹងបង្ហាញសំឡេងឆាតឆ្លើយឆ្លង Diamond Kitchen បានចេញសេចក្តីប្រកាសបិទដំណើរការហាងរបស់ខ្លួនចាប់តាំងពីថ្ងៃទី៧ ខែកញ្ញា ឆ្នាំ២០២៦ នេះតទៅ។ ក្នុងសេចក្តីប្រកាសនោះបានបញ្ជាក់ថា ហាងរបស់ពួកគេមិនត្រឹមតែជាអាជីវកម្មមួយតែមានមោទកភាពដែល បានក្លាយជាអ្នកត្រួសត្រាយមួយក្នុងចំណោមអ្នកដំបូងៗនៃ Local Cloud Kitchen នៅកម្ពុជា និង បានព្យាយាមបង្ហាញថា អាហារដែលមានគុណភាព នឹងគំនិតថ្មីៗ អាចត្រូវបានបង្កើត និងផ្តល់ជូនអតិថិ ជនតាមរយៈរបៀបថ្មីមួយ ដែលយកពីគ្រប់ប្រទេស។ Diamond Kitchen ថាហាងអាចនឹងបិទទ្វារ ប៉ុន្តែ រសជាតិដែលពួកគេបានបង្កើតនឹងនៅដក់ក្នុងបេះដូង និងការចងចាំជារៀងរហូត។ ចំពោះរឿងរ៉ាវទាំងឡាយដែលបានកើតឡើង Diamond Kitchen ស្នើសុំបញ្ចប់ត្រឹមនេះ។ ហាងមួយនេះបានបញ្ជាក់ទៀតថាក្នុងករណីមានបុគ្គលណាមួយបន្តធ្វើសកម្មភាពខាងហាងសូមមិនទទួលខុសត្រូវនោះឡើយ។ ជាងនេះទៅទៀតមុននឹង Diamond Kitchen ប្រកាសបិទទ្វារជាផ្លូវការខាងហាងបានប្រកាសបញ្ចប់តួនាទី Si Dalis ដែលជា BA សម្រាប់ហាងនេះដូចគ្នា។
គួរបញ្ជាក់ផងដែរថាជុំវិញ Diamond Kitchen ប្រកាសបិទហាងគឺផ្តើមចេញពីភាពចម្រូងចម្រាសជាមួយតារាចម្រៀង ពេជ្រ សូលីកា ដោយតារាចម្រៀងរូបនេះបានឱ្យក្រុមការងាររបស់ខ្លួនកម្ម៉ង់អាហារនៅហាងនេះសម្រាប់ក្រុមការងាររបស់ខ្លួនដែលសរុបជាទឹកប្រាក់៧០០-៨០០ដុល្លារ។ ទោះយ៉ាងណា ពេជ្រ សូលីកា បានអះអាងថាម្ចាស់ហាងគ្មានទំនួលខុសត្រូវជាមួយនឹងអតិថិជនដោយមានការយឺតយ៉ាវដឹកជូនភ្ញៀវ។ ក្រោយមក Si Dalis បានចេញបកស្រាយថាពួកគេបានព្យាយាមដោះស្រាយជាមួយនឹង ពេជ្រ សូលីកា ប៉ុន្តែតារាចម្រៀងរូបនេះមិនព្រមយកដំណោះស្រាយរបស់ហាង។
ក្រោយពីមានរឿងចម្រូងចម្រាសនេះផ្ទុះឡើងស្រាប់តែមានអតិថិជនមួយចំនួនទៀតរួមទាំងមានការអះអាងថាជាអតីតបុគ្គលិកនៅទីនោះថាហាងខ្វះអនាម័យ ស្របពេលដែលអតិថិជនផ្សេងទៀតក៏ធ្លាប់ជួបប្រទះហេតុការណ៍ចម្រូងចម្រាសដូចគ្នា៕
