ក្រោយចូលសំចតនៅប៉ាតាយ៉ា ទាហានម៉ារីនអាមេរិកមួយចំនួនផ្ដើមទម្លាយអារម្មណ៍មិនពេញចិត្ត

យោងតាមការចុះផ្សាយរបស់សារព័ត៌មាន Independent ក្រុមនាវិកមួយចំនួននៅលើនាវា USS Abraham Lincoln របស់សហរដ្ឋអាមេរិក បានបង្ហាញអារម្មណ៍មិនសប្បាយចិត្តយ៉ាងខ្លាំង ព្រោះពួកគេចង់មានពេលវេលាជួបជុំគ្រួសារ ជាជាងការដើរលេងកម្សាន្តនៅទីក្រុងប៉ាតាយ៉ា បន្ទាប់ពី “បទពិសោធន៍ដ៏លំបាកវេទនាបំផុតក្នុងជីវិត” រយៈពេល ២៦០ថ្ងៃនៅលើមហាសមុទ្រ។
____________
ខណៈដែលនាវាចម្បាំងយក្ស USS Abraham Lincoln បានចូលសំចតនៅទីក្រុងប៉ាតាយ៉ា បាននាំមកនូវក្ដីរំភើប និងភាពរីករាយយ៉ាងខ្លាំងដល់ប្រជាជនថៃ ប៉ុន្តែមានក្រុមនាវិកមួយចំនួនលើនាវា បានទម្លាយពីអារម្មណ៍មិនពេញចិត្តរបស់ពួកគេថា ដំណើរកម្សាន្តមកកាន់ទីក្រុងរមណីយដ្ឋាននេះមិនមែនជាក្ដីប្រាថ្នារបស់ពួកគេនោះទេ ហើយបានចាត់ទុកបេសកកម្មចុងក្រោយនេះថាជា “បទពិសោធន៍ដ៏លំបាកវេទនាបំផុតក្នុងជីវិត”។

យោងតាមការចុះផ្សាយរបស់សារព័ត៌មាន Independent នាវាផ្ទុកយន្តហោះចម្បាំងអាមេរិកដែលផ្ទុកកម្លាំងទ័ពជិត ៥,០០០ នាក់ មួយនេះ បានចាកចេញពីសហរដ្ឋអាមេរិកតាំងពីខែវិច្ឆិកា ឆ្នាំ២០២៥ មកម៉្លេះ ដើម្បីបំពេញបេសកកម្មយោធាប្រឈមមុខនឹងប្រទេសអ៉ីរ៉ង់ នៅតំបន់មជ្ឈិមបូព៌ា។ នៅក្នុងបេសកកម្មនោះ ក្រុមទាហានត្រូវរស់នៅលើផ្ទៃសមុទ្រឥតឈប់ឈរដោយគ្មានការចូលចតសម្រាកសោះរហូតដល់ទៅ ២៦០ ថ្ងៃជាប់ៗគ្នា។ រយៈពេលជិតមួយឆ្នាំនៃការដាច់ឆ្ងាយពីដីគោក រួមផ្សំនឹងបញ្ហាខ្សត់ខ្សោយស្បៀងអាហារ និងប្រព័ន្ធទឹករំភាយក្នុងនាវាមានការខូចខាត បានរុញច្រានឱ្យក្រុមទាហានជួបប្រឈមនឹងវិបត្តិសុខភាពផ្លូវចិត្ត និងការធ្លាក់ចុះស្មារតីទឹកចិត្តយ៉ាងធ្ងន់ធ្ងរ។

នៅក្នុងកិច្ចសម្ភាសន៍ជាមួយអ្នកយកព័ត៌មានរបស់ប្រព័ន្ធផ្សព្វផ្សាយ MS NOW ក្រុមទាហានបានទម្លាយឱ្យដឹងថា នៅពេលដែលនាវាចម្បាំងបានចូលចតនៅកំពង់ផែ Laem Chabang ជំនួសឱ្យការដើរស្វែងរកភាពសប្បាយរីករាយ ឬការកម្សាន្តពេលរាត្រីនៅក្នុងទីក្រុងប៉ាតាយ៉ា អាទិភាពចម្បងបំផុតរបស់ពួកគេគឺ ការទូរស័ព្ទមើលមុខគ្នា (FaceTime) ជាមួយក្រុមគ្រួសារ និងមនុស្សជាទីស្រឡាញ់។ ទាហានជាច្រើនបានបង្ហាញការស្តាយក្រោយ និងបាក់ទឹកចិត្តយ៉ាងខ្លាំង ដោយពួកគេចង់តែរកកន្លែងស្ងាត់ដើម្បីនិយាយទូរស័ព្ទទៅផ្ទះ និងចង់បានការត្រឡប់ទៅជួបជុំក្រុមគ្រួសារវិញឱ្យបានឆាប់រហ័ស ព្រោះពួកគេនឿយហត់ខ្លាំងណាស់ទៅហើយ។

សរុបសេចក្តីមក ទោះបីជាការមកដល់នៃនាវាចម្បាំងអាមេរិក USS Abraham Lincoln បានជួយជម្រុញសេដ្ឋកិច្ច និងវិស័យទេសចរណ៍នៅក្នុងទីក្រុងប៉ាតាយ៉ាឱ្យមានភាពគគ្រឹកគគ្រេងយ៉ាងណាក៏ដោយ ប៉ុន្តែការទម្លាយអារម្មណ៍មិនពេញចិត្តរបស់ក្រុមទាហានម៉ារីននាពេលនេះ បានលាតត្រដាងឱ្យឃើញពីភាពជូរចត់ និងសម្ពាធផ្លូវចិត្តដ៏ធ្ងន់ធ្ងរនៅពីក្រោយល្បែងសង្គ្រាម។ បច្ចុប្បន្ន ទោះបីជាមានការបញ្ជូននាវាចម្បាំង USS George Washington មកប្តូរវេនបេសកកម្មហើយក៏ដោយ ប៉ុន្តែវាបានក្លាយជាមេរៀនមួយបង្ហាញថា សេចក្តីសុខផ្លូវចិត្ត និងការជួបជុំគ្រួសារ គឺជារឿងសំខាន់បំផុតសម្រាប់មនុស្សគ្រប់រូប ទោះជាទាហានម៉ារីនដ៏រឹងមាំកម្រិតណាក៏ដោយ៕